Zaur Hüseynovun çörəksiz qoyduğu ticarətçilər etirazlara hazırlaşır,
işsizlər ordusu hakimiyyətə qarşı birləşib meriya önünə toplaşacaq

Metropoliten rəisi Zaur Hüseynovun çörəksiz qoyduğu tacirlər aksiyalara hazırlaşır. Bakı meriyası ticarətçilərin bir hissəsini bazarlarda yerləşdirsə də, əksəriyyət işsiz qalıb. Bu barədə əldə etdiyimiz son xəbərdə deyilir ki, gələn həftə tacirlər yenidən etirazlara başlayır. Onlar Bakı merindən kompensasiya verilməsini və yerlə təmin olunmasını istəyəcəklər. İqtidarın üstünə qaldırılan tacirlər bayramdan sonraya qədər hökumətə möhlət verdi. Apreldə ticarət köşkləri ilə təmin olunacağı vədinə inanan tacirlər yalan olduğunu görüb, aksiyalara başlamağı müzakirə edirlər. Bu haqda ticarətçilərdən “Gündəm-xəbər”ə verilən məlumata görə, etirazlara hazırlıq gedir. Yüzlərlə tacir işsiz qalıb və hara gedəcəyini bilmir. Artıq bir aydır işsiz qalan ticarətçilər çıxış yolunu aksiyalarda görür. Çünki, Bakı Metropolitetindən qovulan işsizlər ordusunun böyük bir qismi yeni iş yeri tapmaqda çətinlik çəkir. Metropoliten rəhbərliyi və Bakı Şəhər İcra Hakimiyyəti onlara pulsuz yer vəd etsə də, buna əməl olunmadı.
Metropoliten rəhbərliyi onların digər yerlərə köçürüləcəyini və bir neçə aylıq icarə haqqından azad ediləcəyini bildirsə də, verilən vədlərə əməl edilmir. Metropolitendəki bu qəfil qərarın nəticəsində dükanları dağıdılan ticarətçilərin böyük əksəriyyəti hazırda işsizdir. Ticarətçilərin kiçik bir hissəsi icarə yer tapıb işləyirlər.
Ümumilikdə, ticarətçilərə divan tutulması siyasi hakimiyyət üçün yeni böhrandır. Hökumət bu zümrəni də ram etdiyinə arxayınlaşıb. Amma hesablamayıb ki, növbəti narazı təbəqə formalaşdırır. Hakimiyyət tez bir vaxtda onları işlə təmin edə bilərdi ki, etirazlar tamamilə səngisin.
Ancaq görünür ki, qamçı siyasəti kökəni arxa plana salıb. Ticarətçilər qəzetimizdə bidirdilər ki, Bakı meriyası önünə toplaşıb, Hacıbala Abutalıbova etiraz edəcəklər. Meriya qarşısında yaxın günlərdə aksiyalar olacaq. Abutalıbovdan təzminat və iş yeri tələb ediləcək.
Qeyd edək ki, metro keçidlərindən biri indiyədək sökülməyib. “20 Yanvar” stansiyasındakı bütün köşklər fəaliyyətini davam etdirməkdədir. Əvvəlcə həmin stansiyanın martın 27-də söküləcəyi söylənilsə də, indiyədək stansiyada alver gedir.
Bu günlərdə isə rəsmi şəkildə bildirildi ki, metroda fəaliyyət göstərmiş ticarət obyektləri sahiblərinin yalnız 10 faizi alternativ yerlərdə yerləşdirilib. Səbəb kimi sözügedən ticarət obyektləri sahiblərinin böyük əksəriyyətinin meriyaya müraciət etmədiyi bildirilib. Yəni ticarətçilərdən 90 faizi təklif olunan yerlərə getməyiblər.
Ümumiyyətlə, tacirlərin işsiz qalması həm də Tağı Əhmədovla bağlıdır. Bakı Metropoliteninin yeni rəisi Zaur Hüseynov sabiq sədr Tağı Əhmədovun qohumlarının işdən çıxarılması haqqında təlimat verib. Bu da onların müəyyən dərəcədə imkanlarının azalması deməkdir. Ən azından ticarətçilərə yerləşdirməyə köməklik edilə bilərdi.
Mənbə qeyd edir ki, Zaur Hüseynov Metropolitendə keçridiyi qapalı iclasda sabiq sədr Tağı Əhmədovun qohumlarının müəyyələşdirilməsi və onların fəaliyyətinin yoxlanılması ilə bağlı təlimat verib. İclasda iştirak edən mənbənin sözlərinə görə, Zaur Hüseynov Tağı Əhmədova bağlı kadrların işdən cıxarılacağını elə iclasındaca bildirib.
Mənbənin iddiasına görə, artıq Zaur Hüseynovun əlində Tağı Əhmədovun qohum-əqrəbasının siyahısı var və mayın 1-dən bu siyahıya uyğun sabiq rəisin qohumları işdən cıxarılacaq. Məlumat verən mənbəmizin sözlərinə görə, artıq bir müddətdir ki, işə gəlməyən ölü canlar olan işçilər işə çıxmağa başlayıb və onların metropolitendə peyda olması hamını təəccüblü vəziyyətə gətirib.
R.QARA