Səfər Əbiyevdən sonra da əsgər ölümlərinin sayı
durmadan artır; yeni nazirin dönəmində nə
korrupsiya, nə əsgər ölümündə müsbət irəliləyiş var

Orduda Səfər Əbiyevdən sonra da qırğın dayanmır. Yeni nazir Zakir Həsənovun təyinatı əsgər ölümünə, dedovşina hallarının azalmasına, intihar və özbaşınalıqlara heç də son qoymayıb. Orduda yen ədə səgrə qətlləri, intiharlar baş alıb gedir. Z.Həsənov isə hələlik bu haqda bir kəlmə də danışmayıb. Martın 24-də Müdafiə Nazirliyinin cəbhə bölgəsində yerləşən “N” saylı hərbi hissəsində növbəti intihar qeydə alınıb. Azərbaycan Ordusunun əsgəri, 20 yaşlı Heybətqulu Maqsud oğlu Əzizov tabeliyindəki avtomat silahdan açılan atəş nəticəsində dünyasını dəyişib.
Müdafiə Nazirliyinin mətbuat xidmətindən faktı təsdiqləyiblər. Hadisə ilə bağlı cinayət işi başlanıb, Hərbi Prokurorluq tərəfindən araşdırma aparılır. H.Əzizov Xaçmaz rayonundan həqiqi hərbi xidmətə çağırılıb. Zakir Həsənov təbii ki, məsuliyyət daşıyır. Ekspertlər hesab edir ki, müdafiə naziri və bütövlükdə nazirlik öz vəzifəsini icra edə bilmədiyi üçün orduda baş verən ölüm hallarının sayı artan xətt üzrə davam edir. Müdafiə Nazirliyinin rəhbərliyində baş verən dəyişiklikdən sonra hər hansısa bir müsbət addımlar atılacağı gözlənilirdi. Zakir Həsənovun Azərbaycan ordusuna gətirdiyi yenilik ondan ibarətdir ki, hər hansısa bir hadisə olanda Müdafiə Nazirliyinin rəhbərliyi mərhumun ailəsinə dərin hüznlə başsağlığı verir və bununla da işlərini bitmiş hesab edirlər.
Ekspertin sözlərinə görə, Zakir Həsənov adı rüşvət və korrupsiyada hallanan şəxsləri nazirlikdə yüksək vəzifələrə çəkməklə məşğuldur. Bacarıqsız generalların yüksək vəzifələrə çəkilməsi isə son nəticədə Azərbaycan ordusunda ölüm hallarının artmasına gətirib çıxarır. Ümumiyyətlə, yeni nazir gəldiyi dövrdə 100-ə yaxın orta və yüksək vəzifəli hərbi qulluqçu ehtiyata göndərildi və ya başqa vəzifəyə göndərildi. Bu dövrdə Müdafiə Nazirliyində kadr islahatlarının aparıldığı barədə məlumatlar verildi. Lakin bu kadrların Azərbaycan Silahlı Qüvvələrinə hər hansı fayda verəcəyinə inanmaq çox çətindir.
Birincisi, bu kadrların əksəriyyəti bir vaxtlar Səfər Əbiyevin yaxın adamları olublar və beləliklə, ordumuzdakı pis durumun ortaya çıxmasında, korrupsiya və rüşvətxorluğun tüğyan etməsində, əsgər ölümlərinin sayının artmasında onların da birbaşa və dolayı məsuliyyəti var.
Rafiq QARA