Muxtarlığa namizədlər bir-birinə bıçaqla hücum ediblər

Türkiyənin Şanlıurfa vilayətində Çankaya qəsəbəsinə muxtarlığa namizədlər İsmayıl Çiftçi ilə Şükrü Polatçı arasında dava düşüb. Qarşıdurma nəticəsində biri polis olmaqla 3 nəfər yaralanıb.
Hadisə səhər saat 8 radələrində baş verib. Məktəbin qarşısında gözləyərək seçicilərdən səs istəyən iki muxtarlığa namizəd bir-birinə bıçaqla hücum ediblər. Qohum olduqları bildirilən namizədlərdən biri ürək, digəri isə qarın nahiyəsindən yaralanıb. Davanın qarşısını almaq istəyən polis əməkdaşı və digər 3 nəfər bıçaq yarası alıb.
Yaralılar xəstəxanaya yerləşdirilib. Hadisə ilə əlaqədar 4 nəfər saxlanılıb. Hadisədən sonra məktəbə gələn polislər seçki məntəqəsinə daxil olan bütün seçiciləri yoxlayıblar.
Daha bir qarşıdurma Urfada yaranıb. Buradakı silahlı və dəyənəkli davada 6 nəfər yaralanıb. Şanlıurfanın Birecik qəsəbəsində də iki ailə arasında muxtarlıq üzündən çıxan silahlı və dəyənəkli davada 6 nəfər müxtəlif bədən xəsarətləri alıblar.
Hadisə səhər saatlarında Çiftlik kəndində baş verib. Kəndin muxtarlığına namizədlər Ersöz ilə Emin Öztürk ailələri arasında mübahisə yaranıb. Mübahihə qısa müddətdə davaya dönüb. Tapançadan açılan atəş muxtarlığa namizəd Emin Öztürk ilə yaxınları Salih Öztürk, Hasan Öztürk və Mehmet Öztürk yaralanıb. Daha iki nəfər isə dəyənək zərbələrindən xəsarətlər alıblar.
Qeyd edək ki, bu gün Türkiyədə bələdiyyə seçkilərinə start verilib. Türkiyədə qeydiyyatdan keçmiş seçicilərin sayı 52 695 831 nəfərdir. Onlardan 26 704 757 nəfəri qadın, 25 991 75 nəfəri isə kişidir. Ölkə üzrə 194 310 seçki qutusu quraşdırılacaq. Yerli bələdiyyə orqanları seçkilərində 26 siyasi partiya iştirak edir.
Səsvermənin nəticələri üzrə bələdiyyə başçıları, bələdiyyə şuralarının üzvləri, həmçinin kənd, şəhər rayonları və məhəllələrin muxtarları müəyyən olunacaq. Bələdiyyə seçkilərində 26 siyasi partiyanın iştirak etməsinə baxmayaraq, əsas mübarizənin hakim Ədalət və İnkişaf Partiyası (AKP) və Cümhuriyyət Xalq Partiyasının (CHP) nümayəndələri arasında gedəcəyi gözlənilir.