Bu hələ onun haqlı iraddan nəticə çıxarması demək deyil

Zəngilan rayon İcra Hakimiyyətinin başçısı iki gün əvvəl keçirdiyi birinci rübün yekun yığıncağında şəhid ailələrinin problemlərinə toxunub. Kəskin və qəti şəkildə kəndlər (qəsəbələr) üzrə icra nümayəndələrindən sonuncu dəfə hansı şəhid ailəsinin problemləri ilə maraqlandıqlarını soruşub. Elə həmin gün bir neçə icra nümayəndəsi telefon vasitəsilə ərazi vahidinə daxil olan şəhid ailələri ilə maraqlanıb.
Xatırladaq ki, bu barədə qəzetin ötən nömrələrindən birində kiçik yazı dərc olunmuşdu. Həmin yazıda Zəngilan rayon İcra Hakimiyyətinin başçısı Ramiz Həsənovun bu vəzifəyə təyin olduğu üç il müddətində bir dəfə də olsun şəhid ailələrini qəbul edib onların problemləri ilə maraqlanmamasından bəhs olunaraq haqlı iradlar ortaya çıxarılmışdı. Keçirilən toplantının qəzetdə gedən yazı ilə heç bir aidiyyatı olmasa da başçının yanlış istiqamətdə hərəkətə keçməsi mövzuya bir daha qayıtmaq zərurətini yaratdı.
Həmsöhbət olduğumuz icra aparatı məmuru belə bir görüşün şəxsən başçı tərəfindən deyil, onun müavinləri, yaxud digər vəzifəli şəxs tərəfindən başçıya təklifi üzərində dayandığından məsələyə aydınlıq gətirmək məcburiyyətindəyik. Hazırda adıçəkilən rayon İcra Hakimiyyətində elə bir mühit yaranıb (yaradılıb) ki, müavinlər də daxil olmaqla heç kim öz inisiativi yönümündə başçıya təklif vermək iqtidarında deyil. Hər kəs ya başçının tapşırıqlarını yerinə yetirir, ya da kabinetində sakitcə oturub səsini çıxartmadan “vaxt öldürür”. Aparatda təmsil olunanlar ilk öncə vəzifələrini, işlərini itirəcəklərindən, şər və böhtana tuş gələcəklərindən qorxurlar. Bəli! Onlar məhz belə bir mühitdə çalışırlar. Adam oturduğu yerdə onun haqqında şər və böhtana tuş gələ bilər. Onun haqqında nəinki akt tərtib oluna, lap həkim kağızı da yazdırıla bilər.
Əldə etdiyimiz məlumata görə, bütün bu işlərin başında elə şəhid ailələrinin əsas fiqur hesab etdikləri Ceyhun bəy dayanır. Bir neçə il əvvəl müəllim işlədiyi, sinifə qorxa-qorxa olmasa da ehtiyatla daxil olan gənc müəllim indi siyasət meydanında at oynadır.
Ana tərəfdən başçıya qohum hesab olunduğu söylənilən Nizami müəllim isə bu sahənin adamı olmadığı üçün heç bir işdə Ceyhunun qabağına keçmir. Bəlkə də işğal olunmuş ərazilər azad olunsaydı Nizami müəllim kənd təsərrüfatı sahəsinin adamı kimi üzüm plantasiyalarında, taxıl və yonca zəmilərində, fermalarda çalışanlara həvəslə rəhbərlik edərdi. Amma indiki halda o, nə edə bilər ki?
Əlbəttə, Zəngilan rayon İcra Hakimiyyəti başçısının gec də olsa hərəkətə keçməsi təqdirəlayiq bir haldır. Amma bu hələ onun haqlı iraddan düzgün nəticə çıxarması demək deyil. Şəhid ailələri ümidlə onları şəxsən başçının qəbul edəcəyini və problemlərinin həllinə istiqamət verəcəyini gözləyirlər.
Əli bəy AZƏRİ