Həmid Rza Zəkəri ilə bağlı ilginc faktlar sadalandı

ABŞ-ın “The Blaze” informasiya portalında (eyni adda internet telekanalı və radio da fəaliyyət göstərir) 11 sentyabr terror hücumları ilə bağlı maraqlı, eyni zamanda sensasiyalı material dərc olunub.
Bu yazıda amerikalı yazıçı və siyasi şərhçi, radikal İslam mövzusunda araşdırmaların müəllifi olan Larri Kelli Səudiyyə Ərəbistanı kral ailəsinin 11 sentyabr hücumunda əlinin olduğuna dair yeni dəlillərin ortaya çıxdığını iddia edir. L.Kerri bundan əvvəl “The Blaze” saytında İranın “əl-Qaidə”yə gizli dəstəyi barədə bəhs edib. L.Kerri yazır ki, Səudiyyə kralının emissarları 11 sentyabr hücumlarını həyata keçirən terrorçularla ən azı bir dəfə görüşüb və onlara kömək edib. Onun bildirdiyinə görə, Səudiyyə kral ailəsinin 11 sentyabr hücumlarına dəstək verdiyinə dair məlumatlar yeni deyil. Vaxtilə ABŞ Mərkəzi Kəşfiyyat İdarəsi Səudiyyə Ərəbistanının bu terror hücumlarında əlinin olduğuna dair dəlilləri araşdırmaq üçün xüsusi qrup yaradıb və həmin qrup araşdırmaların nəticəsi olaraq prezidentə 28 səhifəlik məxfi hesabat təqdim edib.
Bu hesabat barədə “İnternational Business Times” nəşri xəbər yayıb. Məlumatın yayılmasından sonra iki konqresmen prezidentə həmin hesabatın açıqlanması barədə sorğu göndərib. Lakin hesabat açıqlanmayıb. Larri Kelli yazır ki, Səudiyyə Ərəbistanının 11 sentyabr hücumlarında əlinin olduğu barədə hələ bu terror hücumundan əvvəl İran kəşfiyyatının Bakıya qaçan yüksək rütbəli zabiti ABŞ-ı məlumatlandırıb. Məqalədə deyilir: “26 iyul, 2011-ci ildə ABŞ-ın Bakıdakı səfirliyinin giriş qapısına İranın yüksək rütbəli təhlükəsizlik məmuru Həmid Rza Zəkəri yaxınlaşdı. O, administratora bildirdi ki, Mərkəzi Kəşfiyyat İdarəsi ilə danışmaq istəyir, çünki ABŞ-ın təhlükəsizliyi ilə bağlı informasiyaya malikdir”.
Məqalədə bildirilir ki, səfirlikdə Həmid Rza Zəkərini Mərkəzi Kəşfiyyat İdarəsinin (MKİ) “Coan” adlı rezidenti qəbul edib. H.R.Zəkəri İranın İnformasiya və Təhlükəsizlik Nazirliyinin (SEPAH) qərargahında yüksək rütbəli zabit olduğunu bildirərək “Coan”a ərəb pilotlarının hazırlıq keçməsi və onların planları barədə danışıb. H.R.Zəkəri hətta Amerikada hazırlıq keçən ərəb pilotların təyyarələrlə Nyu-Yorkdakı Dünya Ticarət Mərkəzinin binalarına, Pentaqona və ABŞ prezidentinin Kemp-Devid iqamətgahına necə hücum edəcəyinin modelini də səfirliyin konfrans otağında təsvir edib. “Zəkəri danışıb ki, hücum havadan həyata keçiriləcək və ərəb pilotları hücumu həyata keçirmək üçün artıq Amerikaya yola düşüblər, hücumun tarixi isə 11.09.01-dir. “Coan” bu məlumatları qeydə alır.
Bir neçə gün sonra Mərkəzi Kəşfiyyat İdarəsinin Pensilvaniyadakı mənzil-qərargahından “Corc” adlı baş zabit Bakıya gəlir və ABŞ səfirliyində Zəkərini dindirir. O, dərhal qərara alır ki, Zəkəri yalan danışır, MKİ zabiti ona 200 dollar verib səfirliyi tərk etməsini istəyir. 3 mindən çox adamın həyatını xilas edə biləcək informasiya beləcə ciddi qəbul olunmur...”, - deyə məqalədə bildirilir. L.Kelli yazır ki, sonradan 11 sentyabr hücumlarını araşdıran Ken Timmerman Zəkəri ilə görüşüb və Bakıdakı bu söhbət barədə onunla geniş danışıb. K.Timmerman H.R.Zəkəri ilə söhbətinə 2005-ci ildə nəşr edilmiş kitabında yer verib. Müəllif yazır ki, Səudiyyə Ərəbistanı 11 sentyabr hücumlarında əlinin olduğunu inkar edir. Lakin MKİ-nin hesabatında göstərilir ki, səudiyyəli zənginlər, eyni zamanda kəşfiyyat zabitləri və diplomatları 11 sentyabr hücumlarını həyata keçirənlərə birbaşa dəstək veriblər.
[b]KƏRİM[/b]