Millət vəkilləri oliqarxlardan geri qalmır

Məmur övladlarının, habelə idmançıların və incəsənət adamlarının bahalı maşınları ilə bağlı məlumatlar son zamanlar ölkə mətbuatının gündəmində əsas yeri tutur.
Bu dəfə də deputatların sürdüyü maşınlarla maraqlandıq. Müşahidələrimiz zamanı məlum oldu ki, deputatlar daha çox “Mercedes” markalı avtomobillərə üstünlük verir.
Məsələn, YAP icra katibinin müavini, deputat Siyavuş Novruzov alman maşını həvəskarıdır. Deputatın 10 AS 601 dövlət nömrə nişanlı, “Mercedes” markalı maşınını sürücüsü idarə edir.
Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev də “Mercedes” markalı avtomobilə üstünlük verir. 10 MG 450 dövlət nömrə nişanlı avtomobil BAXCP sədrinin özünə məxsusdur, amma maşını sürücüsü idarə edir.
Azərbaycan Kikboksinq Federasiyasının prezidenti, deputat Adil Əliyevin maşını da “Mercedes”dir. Deputatın 90 GO 005 nömrəli avtomobilini sürücüsü idarə edir.
Azərbaycan Karate-do Federasiyaları Assosiasiyasının prezidenti, deputat Ülvi Quliyev də “Mercedes”də gəzən deputatlarımızdandır. Ü.Quliyevin 10 OJ 005 dövlət nömrə nişanlı avtomobilini sürücüsü idarə edir.
Milli Məclis sədrinin birinci müavini Ziyafət Əsgərovun avtomobili də alman malıdır, amma markası fərqlidir - “BMW”. Z.Əsgərovun 10 AA 403 dövlət nömrə nişanlı maşınını sürücüsü idarə edir.
“Mercedes” markalı avtomobil sürən deputatlarımızdan biri də Mirkazım Kazımovdur. Fotoda gördüyünüz 10 AH 934 dövlət nömrə nişanlı avtomobil deputat M.Kazımova məxsusdur.
İqtidaryönlü deputat Fuad Muradovun maşını 10 FM 705 dövlət nömrə nişanlı “Lexus” markalı CİP-dir. Nömrədəki FM seriyası deputatın ad və soyadının baş hərfləridir. F.Muradovun da sürücüsü var.
Ümid Partiyasının sədri, deputat İqbal Ağazadə isə “Toyota Land Cruiser” markalı avtomobil idarə edir. Avtomobilin nömrəsi 90 FH 017-dir. Sürücüsü olsa da, deputat adətən avtomobili özü idarə edir.
Qeyd edək ki, bu avtomobillərin qiyməti 80-100 min manat arasında dəyişir.
E.Qasımov