Bakı şəhərində məşhur məktəbdə direktor-müəllim qarşıdurması pik həddə çatıb. Xətai rayonundakı 171 saylı orta məktəbin direktoru haqqında inanılmaz ittihamlar irəli sürülüb.

Məktəbin direktoru İradə Murğuzovanın banklardan müəllimlərin və digər işçilərin adına külli miqdarda kredit alaraq mənimsəməkdə, bunun ziyanını isə müəllimlərə ödətdirməkdə günahlandırılır.

Direktor barəsində iddiaların müəllifi, məktəbin müəllimi Mədinə Tağıyeva milli.az-a açıqlamasında bildirib ki, İ.Murğuzova təhsil ocağına direktor təyin olunandan sinif rəhbərlərinə pul yığdırır və bütün narazılıqların da mənbəyi budur: “Direktorun dediyi pulu yığa bilmədim, ona görə də, sinfimi bağlatdı. Uşaqlarımı pərən-pərən saldı. Elə o vaxtdan məndən əl çəkmir. İclarslara getmirəm, mənə töhmət yazıb vurur divara. Uşaqlar da həmin töhmətin şəkilini divardan çəkərək məni və digər töhmət almış müəlimləri şantaj edir. Bütün bu şəkillər uşaqların mobil telefonundadır. Töhmət alan müəlimin uşağa söz deməyə ixtiyarı yoxdur. Şagirdə söz deyən kimi telefonuna çəkdiyini göstərərək şantaj edir ki, sizə töhmət verilib”.

Müəllimənin sözlərinə görə, İ.Murğuzovanın ona hiddətinin başqa səbəbi isə müəlimlərin adına banklardan götrüdüyü külli miqdarda kredit məsələsi ilə bağlıdır: “Bütün müəllimlər kredit götürüb ona verib. Krediti ödəmədiyindən müəlimlər uşaqlardan pul yığıb kreditə ödəyir. Mən kredit götürmədiyimdən belə edir. Direktor deyir ki, arxamda da duran var, qabağımda da. Nazirlikdə bir neçə adamın adını çəkir. Tələbim odur ki, töhmət yazdırıb uşaqları üstümə qaldırmasın. Yanvardan bu yana 5 töhmət verib mənə. İlboyu dərsə gəlməyən uşağa qiymət yazdırmağı tələb edir. Uşaq üçün pul təklif edir, mən də rədd edirəm”.

Direktor İradə Murğuzova isə onun barəsində işçisinin dediklərinə çox sərt reaksiya verdi, hətta onu təhqir etməkdən belə çəkinməyib.

“Ay əclaf, ay əclaf qadın... Mədinə məktəbimdə ən savadısız müəlimdi. Onu məktəbdə 7 ildir necə yola verirəm, bunu bir Allah bilir. Onun kimi vicdansız bazar arvadı yoxdur” - deyə söhbətə başlayan direktor onun haqda şikayətlər edən M.Tağızadənin müəllim adına ləkə gətirən olduğunu bildirib.

İ.Murquzovanın sözlərinə görə, düşmənləri çoxdur və ömrü boyu onun kreslosunda gözü olanlar var: “Məmnuniyyətlə buradan rədd olub gedərəm, amma Mədinəyə görə getməyəcəm. Özümü min kişidən üstün sayıram, qaçan kişilərdən deyiləm. Bir Mədinənin xarici görkəminə baxın, görün elə müəllim olar? Uşaqları zəifdir, özu tərbiyəsizdir”.

Direktor əlavə edib ki, sentyabrdan M.Tağızadənin dərslərinə oturub yoxlamalar aparacaq: “Bu gün Təhsil Nazirliyində oldum. Dedilər ki, nə istəyir yazsınlar. İslanmışın yağışdan nə qorxusu?! Olmayan şeyi yazıblar haqqımda”.

* * *17:16

Bakı Şəhəri üzrə Təhsil İdarəsi Bakının Xətai rayonunda yerləşən 171 saylı orta məktəbdə baş verən biabırçı olayla bağlı araşdırmalara başlayıb.

Bu barədə virtualaz.org saytına idarənin mətbuat xidmətinin rəhbəri Arzu Tarıquliyeva məlumat verib.

A.Tarıquliyeva dedi ki, məktəbin direktoru İradə Məmmədəli qızı Murğuzovanın müəllimlərin adına götürdüyü kredit borclarını elə onların özünə məcburi şəkildə ödətdirməsi ilə bağlı məlumatlar araşdırılır. Araşdırmanın nəticələri ilə bağlı ictimaiyyətə məlumat veriləcək.

Qeyd edək ki, hüquq müdafiəçisi Teymur Rza məsələ ilə bağlı araşdırma aparılması üçün təhsil naziri Mikayıl Cabbarova müraciət edib.

T.Rza virtualaz.org saytına dedi ki, Təhsil Nazirliyinə etdiyi müraciətlərə yalnız məsələ mətbuata çıxandan sonra reaksiya verilib.

Ülviyyə - See more at: http://azerinews.info/index.php?newsid=11893#sthash.N2vGnLuh.dpuf