“Oğlumun qətlində Mərkəzi Klinik Xəstəxananın həkimlərindən şübhələnirəm”



Ötən il mayın 25-də Bakının Nərimanov rayonu, Həsən Əliyev küçəsi, ev 92, mənzil 8 ünvanında tibb elmləri namizədi, ürək-damar cərrahı, Tibb Universitetinin nəzdində fəaliyyət göstərən müalicə klinikasının kardiologiya şöbəsinin müdiri, 1977-ci il təvəllüdlü Cavid Həmişəyevin vəhşicəsinə öldürülməsi mətbuatın diqqətindədir. Mərhumun atası Zaməddin Həmişəyev KİV-lərə bildirib ki, onun oğlunun qətlə yetirilməsini gəlini İradə Orucova sifariş verib. İ.Orucovanın nümayəndəsi, tanınmış vəkil Aslan İsmayılov isə Z.Həmişəyevin söylədiklərinin həqiqət olmadığını, onun qətlə yetirilmiş oğlunun əmlakına sahiblənmək üçün gəlininə şər atmaqdan çəkinmədiyini söyləyib.



Bu qətli törədən üç şəxs — Türkan Bağırlını, Yasin Ərəbovu və Koroğlu Məmmədovu hüquq-mühafizə orqanlarının əməkdaşları həbs edib. 2014-cü il iyunun 23-də Bakı Ağır Cinayətlər Məhkəməsində bu səs-küylü qətldə təqsirləndirilən adıçəkilən şəxslərin cinayət işi üzrə proses başlayıb. Hər 3 şəxs tamah məqsədi ilə qəsdən adam öldürməkdə ittiham olunurlar.



“Yeni Müsavat” qanlı cinayətdə təqsirləndirilən Türkan Bağırlının müstəntiqlərə verdiyi ifadəsini dərc etdikdən sonra mərhum həkimin atası Zaməddin Həmişəyev redaksiyamıza gəlib və yazılı şəkildə təqdim etdiyi mövqeyinin dərc edilməsini istəyib.



Z.Həmişəyev yazır ki, Nərimanov Rayon Prokurorluğunun müstəntiqi Vüqar Kərimov, bu cinayət işini bilərəkdən 180 dərəcə səhv istiqamətə yönəldib. Zakir Qaralova ümidini ifadə edən Z.Həmişəyev baş prokurorun qəbulunda olduğunu və cinayətin izini azdıran müstəntiqlərin cəzalandırılacağına vəd aldığını açıqlayıb:



“Biz valideynlər, bu ağır cinayətin materialları ilə indiyədək tanış ola bilməmişik. Bilirsiniz niyə? Bax, bu, çox ciddi sualdır”.



Z.Həmişəyev vəkil Aslan İsmayılovu hədəf götürərək yazır: “Onun hüquqi məsləhətləri ilə və Nərimanov Rayon Prokurorluğunun müstəntiqi Vüqar Kərimovun havadarlığı və birbaşa iştirakı ilə oğlumun həyat yoldaşı İradə Oruclu, yas mərasiminin 2-ci günü, Cavidin ailəvi dostları — həkimlər Fərid Əliyev, Kamran Yaqubov, İkram Rüstəmov və onların həyat yoldaşları ilə birlikdə, Bakıya qayıtmış, mərhumun valideynlərinin xəbəri belə olmadan Aslan İsmayılovu may ayının 29-da rəsmi vəkil tutmuş və onun hüquqi məsləhəti ilə, həmçinin Vüqar Kərimovun birbaşa köməyi ilə özünü bir növ sığortalamışdır! Özünü zərərçəkmişin hüquqi varisi etdirmişdir ki, biz ondan şübhələnməyək, bu cinayət işinin materialları ilə nə biz, nə də nümayəndəmiz tanış ola bilməyək. Qanunlarımız isə ikinci şəxsin zərərçəkmiş kimi tanınmasına imkan vermir. Əslində isə bu cinayət işinin izləri Mərkəzi Klinikada olan şübhələndiyimiz həkimlərə aparıb çıxarır. Cavidin kardiologiya sahəsində uğurları onların bu yola əl atmalarına, ona qarşı peşə paxıllığı və tamah hisslərinin güclənməsi olaraq, Cavidin həyat yoldaşı və onun Ədliyyə Nazirliyi sistemində çalışan qardaşı — İsgəndər Əsəd oğlu Orucovun əməlləridir! Oğlumun (xoşagəlməz ifadə işlədir-E.M.) həyat yoldaşı İradə Oruclu sonradan etiraf edib ki, onsuz da son iki ildir ki, biz Cavidlə ər-arvad münasibətində yaşamırdıq.



Cavidin anasına deyib ki, son altı ay Cavidi izlədib. Oğlumun və gəlinimizin bizim ailədən cidd-cəhdlə gizlətdikləri (İradə Oruclunun valideynlərinin tövsiyəsi ilə, əlbəttə…-Z.H.) bir çox məqamlar, naqisliklər bizə çox sonralar məlum olub. Halbuki yeganə oğlumuzun valideynləri kimi, bizimlə hər bir işin əvvəlindən məsləhətləşməli idilər. Bəs niyə etmədilər? Qazax rayonunda bir çox kriminal hadisələrin (həbs etdirmək, qətl, ölüm, ailələri sahibsiz qoymaq və s.) iştirakçısı və təşəbbüskarı olanlardan bundan artıq nə gözləmək olardı?! Nə isə, bütün bunlar hamısı məhkəməlikdir, Ağır Cinayətlər, Apelyasiya, Ali Məhkəmə və Avropa Məhkəməsi! Həqiqət tam üzə çıxıb öz yerini tutanacan! Əmin olsunlar buna. Tutulan (saxlanılan) cinayətkarların ömürlük cəza alacağı şübhəsizdir. Bunu qoy onlar da dərk etsinlər. Hələ gec deyil, açıq etiraf etsinlər həqiqəti. Saxlanılan Türkan ilk hazırlıq iclasında etiraf etdi ki, ifadə vermək istəmir! ”Rusiya səfirliyindən nümayəndə tələb edirəm» dedi. Ardınca da “çünki məndən ifadəni müstəntiq Vüqar məcbur edib” — masadakı su butulkalarına işarə edib — “qol çəkdiriblər” — söylədi.



Zaməddin Həmişəyev: “Bu qətlin sifarişçiləri arasında gəlinim və onun ədliyyə sistemində çalışan qardaşı İsgəndər Orucov da var”


Həmçinin o biri saxlanılan cinayətkarlar — Koroğlu və Yasin. Onların ilk yazılı ifadələri ilə, həmçinin telekanallarda isti-isti verdikləri ifadələrlə məhkəmədəki ifadələri arasında böyük təzadlar var. Vicdansız müstəntiqlər uydurma ifadələrlə öz işlərini bitmiş hesab ediblər. İnsan qanını pula satan vicdansızlar!



Keçən ilin avqust ayının 9-da müstəntiq Vüqar Kərimov mənə və nümayəndəm — vəkil Əlövsət Ağamoğlanova bildirmişdi ki, sizə “bomba” xəbər deyəcəm! Vaxt çatanda isə “bilirəm, ancaq deməyəcəm. Əlinizdən gələni edin! Lap Zakir Qaralova şikayət edin, istəsəniz lap İlham Əliyevə”, deməyəcəm. Kefim belə istəyir». O, prokuror işçisinin etik norma və qaydalarını pozmuş və vəzifə səlahiyyətlərini aşıb…»



Z.Həmişəyev cidd-cəhdlərinə baxmayaraq istintaq materialları ilə tanış ola bilmədiklərini yazır: “Görəsən, hansı məqsədlə Türkanın ”yazıq və yetim» obrazını yaradıblar?! Hansı ki, bu hadisəni boynuna götürən üç qatildən biridir. Qatilləri cəmiyyətimizə mələk libasında təqdim edənlər nə məqsəd güdür? Özü də məhkəmənin getdiyi zamanda… Belə çıxır ki, bizim şübhələndiklərimizin birbaşa sifarişi ilə xüsusi killer bu cinayəti törədibdir. Daha bunu ört-basdır edə bilməzlər.



Cinayətkarlar nə qədər maskalansalar da üzləri açılacaq, ifşa olunacaqlar. Çünki Türkan məhkəmə iclasında, birmənalı olaraq, hamının eşidəcəyi tərzdə etiraf edib dedi: “Mən heç bir vaxt Cavid həkimlə heç bir ünsiyyətdə olmamışam. Onun öldürülməsinə də razı olmamışam! O, çox yaxşı insan idi… Təbii ki, onun ifadəsi cinayət prosesinin protokolunda öz əksini tapıbdır. Bu cinayət işinin ədalətlə araşdırılması, sifarişçilərin və cinayəti törətmiş olanların cinayətə cəlb olunmaları üçün respublikamızda tanınmış akademiklər, xalq şairləri, ziyalılarımız, Milli Məclisin bir çox deputatı, Qazax rayonun ictimaiyyəti ölkə prezidentinə, baş prokuror Zakir Qaralova müraciətlər ediblər.



Bu müraciətlərin bir real nəticəsi olacaqdır. Olmasa, sonda Apelyasiya Məhkəməsi, Ali Məhkəmə və Avropa Məhkəməsi var! Faşistlər Böyük Vətən müharibəsi illərində ağ xalat geyinmiş həkimləri öldürmürdülər. Bir həkimi öldürmək — minlərlə insanı məhv etmək deməkdir! Ona görə inamımız böyükdür ki, bu cinayət işi Prezident Administrasiyası və Baş Prokurorluğun ciddi nəzarətindədir! Bu cinayətin əsl kökündə paxıllıq dayanır. Təkcə bizim ailə deyil — xalqımız bir layiqli övladını itirdi. Təki bu son olsun!



Bizim faciəmizə gizlincə sevinənlər isə bütün xalqımızın düşmənidirlər! Xalq düşməni!

Cavid özü idmanın bir çox növləri ilə məşğul olmuşdu. Sambo, karate növləri ilə. “Lokomotiv” idman klubunda futbol isə onun əsl hobbisi idi. Hər həftənin 5-ci günü həkim dostları ilə futbol oynayardı. Qətl günündən bir gün öncə də belə olub. Ona görə də saxlanılan Koroğlu və Yasinin onu müqavimətsiz qətlə yetirmələri ağlabatan deyil. Onun əlinin içində, üz nahiyəsində bıçaq izləri qalardı. Əfsus ki, burda həkim psixoloq terapevtin “əməyi” olub. Huşsuzlaşdırıb bütün qan dövranı damarlarını kəsib — tutulmuş canilərə böyük pul müqabilində boyunlarına götürmələrini planlaşdırmışlar. Sifarişin motivi əsl paxıllıqdır!»

E.MƏMMƏDƏLİYEV