Məhəmmədəli Qəribli: «Nadiri boykot etmək lazımdır»

mahammad

Samir Güləliyev: «Nadir Qafarzadə sənətçi deyil, palatka oxuyanıdır»

Elnur Eltürk: «Nadir Qafarzadə mətbuat nümayəndələri haqqında danışmasa daha yaxşıdır»

Ceyran Əsgərova: «Sənətkar sözünü Nadir bəyin özü qazanmalıdır»



«Bundan sonra hansısa jurnalist mənə sənətçi desə, mikrofonu onun başına çırpacağam». Bu sözlərin müəllifi tanınmış müğənni Nadir Qafarzadədir. Şou-biznes aləmində özünü peşəkar sayan bu sənətçi indi də jurnalistləri təhdid edir. O deyir ki, yaşına və iş stajına görə özünə sənətkar deyə bilər: «Bundan sonra hansısa jurnalist mənə sənətçi desə, mikrofonu onun başına çırpacağam. Sənətçi də sənsən, pinəçi də, kolxozçu da. Mən sənətkaram».
Nadir Qafarzadə bu sözləri deyəndən bir az sonra nə danışdığının az da olsa fərqinə varıb və fikrinə aydınlıq gətirməyə çalışıb. O, böyük sənətkarları yada salıb, özünü kiçik sənətkar kimi qələmə verməli olub: «İnsanın istəyi yoxdursa, pulun gücünə heç bir şeyi həll etmək olmaz. Quyuya su tökməklə deyil. Düzdür, Zeynəb Xanlarova, İlhamə Quliyeva, Flora Kərimova, Ramiz Mirişli, Elmira Rəhimova kimi böyük sənətkarlar olan yerdə mən ancaq kiçik sənətkar ola bilərəm. Kiçik sənətkarların sırasına isə Teymur Əmrah, Samir Cəfərov, Aygün Kazımova, Azər Zeynalov daxildir. Sadaladıqlarım da zamanla böyük sənətkarlardan olacaq. Bu mənim subyektiv fikrimdir. Kimin buna şübhəsi varsa, gəlsin sözü üzümə desin. Daha efirlərdən səslənməsin. Efirdən sözünü deyən şəxs sadəcə olaraq qorxaq insandır».
Müğənninin jurnalistlərin ünvanına işlətdiyi sözlər media nümayəndələrinin narazılığına səbəb olub.Adıçəklən sənətçi yəqin unudub ki, istənilən müğənninin məşhur olmasında KİV-in rolu var. Əgər jurnalistlər hansısa müğənni barəsində heç nə yazmasalar, həmin ifaçı yaddan çıxar. Müğənninin məşhur olmasının əsas səbəbkarlarından biri də media təmsilçiləridir. İstər yazılı, istərsə də elektron mətbuatda müğənnilərin iş fəaliyyəti və ya onlar haqqında məlumat getməsə, heç kim onları tanımaz.

Qəzetimizin əməkdaşı Məhəmmədəli Qəribli hesab edir ki, müğənninin jurnalistləri təhdid etməsi yolverilməz haldır: «Adətən dünya praktikasından da görürük ki, tanınmış idmançılar və ya müğənnilər populyarlaşıb pullandıqca daha xeyirxah işlərlə məşğul olmağa başlayır. Bizdə isə bunun tərsini müşahidə edirik. Yalnız Azərbaycan səviyyəsində tanınan bizim müğənnilər xalqımızın səxavəti hesabına indiki vəziyyətə çatıblar. Ancaq bunun üçün xalqa və onun nümayəndələrinə minnətdar olmaq əvəzinə onlara yuxarıdan aşağı baxmaq istəyirlər. Xüsusilə də Nadir Qafarzadə kimi müğənnilərdə bu hala daha çox rast gəlinir. Bir dəfə o, milyonların seyr etdiyi efirdə açıq dedi ki, gedin ziyalının da soyuducusunu açın, mənimkini də, görün hansımız daha yaxşı yaşayırıq? Elə bu sözünə görə onu boykot etmək lazım idi. Nadir bilməlidir ki, dünyanın heç bir yerində onun kimi müğənninin bir saat oxumağına 5-6 min dollar verməzlər. Nadir xalqın bu səxavətindən sui-istifadə edir. İndi də deyir ki, kim ona sənətçi desə, mikrofonu başına çırpacaq. Aydındır ki, onun bu hədəsi jurnalistlərə ünvanlanıb. Jurnalistlərin də ona cavabı adekvat olmalıdır. Nadiri ağıllandırmağın yolları çoxdur. Sadəcə, media nümayəndələri ilə bunun detallarını müzakirə edib ortaq nəticəyə gəlmək lazımdır».

Müstəqil jurnalist Elnur Eltürk hesab edir ki, N.Qafarzadə mətbuat nümayəndələri haqqında danışmasa daha yaxşı olar: »
Ömründə iki kitab oxumayanları başımızın üstünə qaldıranda bilmirdik ki, bu işlərin axırı belə olacaq? Televiziya məkanını zəbt edən və hətta özünü televiziyada apara bilməyən insanlardan hansısa normal söz gözləməyinə dəyməz. Ona görə sənətçi və sənətkar sözünü ayırd edə bilməyən şəxsin fikirlərinə münasibət bildirmək lazım deyil. Qafarzadə dəfələrlə özünü televiziya məkanında biabır edən şəxsdir. Yaxşı olar ki, o danışmasın. Danışdıqca, özünü tamam rəzil gününə salır. Amma bir məsələni qeyd edim ki, N.Qafarzadənin belə danışmasının arxasında bizlərin də böyük günahı var. Çünki toylara 10 min manatdan yuxarı gedən insanın axırda belə danışacağı gözlənilən idi. Vaxt var idi adının divar qəzetlərində getməsi üçün əldən-ayaqdan gedirdi. İndi isə jurnalistləri hədələyir. Eybi yoxdur, vaxt gələr təhqir etdiyi jurnalistlərin qapısını yenidən döyməli olar. Hər zamanın öz hökmü var».

«Olaylar» İnformasiya Agentliyinin yazarı Samir Güləliyev hesab edir ki, Nadir Qafarzadə sənətçi deyil, palatka oxuyanıdır: «Sənətçi adı hər adama verilmir. Sənətçi adı xalq tərəfindən sevilən, zövq oxşayan karifeylərə deyilir. Bu gün Ağadadaş Ağayev, Baloğlan Əşrəfov, Mələkxanım Əyyubova kimi məşhur və canlı karifeylər kənarda qalır və Nadir kimilər özlərini reklam edirsə, mən günahı onda yox, xalqda görürəm. Necə deyərlər, rezin qaloşu nə qədər rəngləyib parlatsan da, ayaqqabı olmaz.
Bu gün iki ara mahnısı əzbərləyib toylara 15 min manata getdiyini bəyan edən Qafarzadə hələ bizə az eləyir. Nadir yadına salsın, vaxtilə jurnalistlərə yalvarırdı ki, ondan müsahibələr götürək, efirə çıxaraq, reklam edək, məşhurlaşdıraq. Biz həmin jurnalistlərik, cənab Nadir».

SİA İnformasiya Agentliyinin mədəniyyət yazarı Ceyran Əsgərovanın sözlərinə görə, N.Qafarzadə gündəmdə olan müğənnilər siyahısında ola bilər: «Ancaq bu o demək deyil ki, jurnalistləri təhqir etməli və ya əl qaldırmalıdır. Sənətkar sözünü də Nadir bəyin özü qazanmalıdır. Özünə sənətkar deməklə olmaz. Odur ki, mətbuat bəzi sənətçilərə necə hörmət edirsə, onlar da bunu etməyi bacarsınlar».

Günel CƏLİLOVA