gundemxeber.az Tovuzdakı mənbələrə instinadən xəbər verir ki, dünən günorta saatlarında Azərbaycan Ordusuna məxsus 6 döyüş helikopteri cəbhə xəttinə doğru uçub. Mənbə ordumuzun həmin istiqamətdə hərbi təlimlər keçdiyini bildirib. Bunun ardınca isə ermənilər Tovuz istiqamətində atəşkəsi pozublar.
müsavat.com xəbər yayıb ki, Ermənistan silahlı qüvvələri Tovuz rayonunun Əlibəyli kəndini iriçaplı silahlardan aramsız atəşə tutublar. Gülləbaran nəticəsində kəndin iki sakini yaralanıb. Onlardan biri Anya Ələsgərovanın vəziyyəti ağırdır. Atışma nəticəsində kəndəki bir neçə evin yarasız vəziyyətə düşdüyü bildirilir.
Tovuz Mərkəzi rayon Xəstəxanasının baş həkimi Paşa Muradovun APA-ya verdiyi məlumata görə, atışma nəticəsində Tovuz rayonunun Əlibəyli kəndinin iki sakini, 1997-ci il təvəllüdlü Fərid Nəbi oğlu Məmmədov və 1962-ci il təvəllüdlü Anya Qara qızı Ələkbərova yaralanıblar. Onlar Tovuz Mərkəzi rayon Xəstəxanasına yerləşdiriliblər.
Xəstəxananın baş həkinin müavini Səyyad Yusifov isə bildirib ki, Fərid Məmmədov çənəsindən güllə yarası alıb. Anya Ələkbərovaya isə qarının ön divarının küt travması diaqnozu qoyulub. “Görünür, ona güllə dəyməyib. Güllə harasa dəyib və Anya Ələkbərova ya gülləbarandan qaçanda, ya da başqa bir şəraitdə xəsarət alıb”, - baş həkimin müavini deyib.
Müdafiə Nazirliyinin mətbuat xidmətindən APA-ya faktı təsdiqləyiblər. Bildirilib ki, Ermənistan silahlı birləşmələri Tovuz istiqamətində atəşkəs rejimini pozub. Azərbaycan Silahlı Qüvvələrinin bölmələri düşmənə cavab atəşi verir. Hərbçilər arasında ölən və ya xəsarət alan yoxdur.