İlahə Həşimova: «Zeynəb hər gün yatmazdan öncə pəncərəyə yaxınlaşıb atasına qovuşması üçün Allaha dua edir»“Bizim Yol” əməkdaşları həbsdə olan həmkarlarının ailəsini ziyarət etdi
6 yaşlı Zeynəb: “Məktəbdə soruşsalar, necə deyim ki, atam həbsdədir...”

«Penitensiar Xidmətin rəhbərliyindən xahiş edirik ki, heç olmasa doğum günündə Pərvizə ailəsi ilə açıq görüşə şərait yaratsınlar»

"Bizim Yol" qəzetinin əməkdaşları Ramazan bayramı ərəfəsində həbsdə olan həmkarları Pərviz Həşimlinin ailəsinə baş çəkiblər.

P.Həşimlinin həyat yoldaşı İlahə xanım Pərvizin həbsi zamanı düşdükləri çətin vəziyyətdən danışaraq, hələ də yaşadıqları stressin təsiri altında olduqlarını bildirdi: "Pərvizin həbsi zamanı çox böyük qorxu yaşadıq. Hətta indiyə qədər bu qorxu, stress bizi tərk etməyib. Evdə tək qala bilmirik. Pərviz həbs edilərkən, Zeynəbin 5 yaşı vardı, uşaq ağır travmalar aldı. O hadisələrdən sonra tamam dəyişib, yaşından tez böyüyüb, danışığından, verdiyi suallardan belə təəssürat yaranır ki, sanki yetkinlik həddinə çatmış insandır".

Zeynəbin artıq 6 yaşı var. İ.Həşimlinin sözlərinə görə, Zeynəb hər gün yatmazdan öncə yatdığı otağın pəncərəsinə yaxınlaşıb atasının tezliklə azadlığa qovuşması üçün Allaha dua edir. "Yaşına baxmayaraq, o da bizimlə birgə imsaqa durdu, yemək yeyib bir gün oruc tutdu. Axşam iftar vaxtına qədər dözüb, Allaha dua edirdi ki, atası tezliklə evə qayıtsın".

- Pərvizin həbsindən sonra ilk görüşünüz nə vaxt baş tutdu?

- Həbsindən sonra 4 ay Pərvizlə görüşə bilmədik, yalnız vəkillər vasitəsilə onun haqqında məlumat ala bilirdik. O da həmçinin, bizim haqqımızda xəbərləri yalnız vəkillərdən alırdı. Çox əziyyət çəkdik. İlk görüşdüyümüzdə hər üçümüz ağladıq. Zeynəb körpə olmağına baxmayaraq, atasına toxtaqlıq verirdi. "Əsas odur ki, sən sağlamsan, yaxşısan. Allah qoysa sən evə gələcəksən, biz o günü gözləyirik" - deyə Pərvizə təskinlik verirdi. Körpə olmağına baxmayaraq o bizdən daha güclü idi. Həmin vaxtlar çox ağır idi. İndi oturub düşünəndə inana bilmirik, bu baş verənlərə necə dözə bildik. Həm Pərvizin yoxluğunu yaşamaq, həm də onun orada vəziyyətinin necə olacağını düşünmək çox çətin idi. Bundan başqa ailədə işləyən tək o idi, maddi cəhətdən də sıxıntılar yaşadıq. Düzdür, qohum-əqrəba, dostlar kömək edir, ancaq yenə də ailə başçısının yerini heç kim vermir.

- Pərviz həbs edilən zaman Zeynəbin 5 yaşı vardı. Hadisəni ona necə izah edə bildiniz?

- Pərviz həbs ediləndə Zeynəb o qədər olayların içərisində idi ki, onu baş verənlərdən uzaq tuta bilmədik. Yalnız Pərvizin həbsini bir müddət ondan gizlədə bildik. Demişdik, guya işlə əlaqədar Pərviz Türkiyəyə gedib. Bir müddət sonra onun bizə niyə zəng etmədiyini soruşmağa başladı. Çünki Pərviz evdən ayrı olduğu zaman imkanı olmayanda uzağı bir gün əlaqə saxlamazdı. Sonra mütləq bir yolunu tapıb zəng edərdi. Birtəhər başını qatırdım ki, işi var, zəng edəcək. Lakin bir gün məhkəmədən qayıdarkən telefonda internetdə yerləşdirilən videoya baxmışdıq. Telefonu unudub bir kənara qoymuşdum. O da təsadüf nəticəsində telefonda həmin videoya baxıb, hər şeydən xəbərdar olmuşdu. Atasının həbsini bildikdən sonra çox ağlamışdı. Təkrar, böyük stress yaşadıq. Daha sonra hər şeyi olduğu kimi ona danışdım. Bundan sonra artıq hər üçümüz olanları birgə yaşamağa başladıq.

Zeynəb bu il 1-ci sinfə gedəcək. "İstəyirdik ki, o məktəbə gedəndə Pərviz bizim yanımızda olsun. Bu, onun həyatında yeni bir mərhələdir" - deyən İlahə xanım bəzən qızının ona verdiyi suallara cavab tapa bilmədiyini bildirdi. "Zeynəb məndən soruşur: Birdən məktəbdə desələr ki, niyə atan səni məktəbə gətirib-aparmır? Axı mən onlara deyə bilmərəm ki, atama böhtan atıb həbs ediblər. Onlar həqiqətdə də elə düşünəcəklər ki, o böhtan üzündən deyil, doğrudan etdiyi hansısa pis əməlinə görə həbs edilib...".

Ümid edirik ki, Zeynəbin sinif yoldaşlarına nəyisə başa salmağına ehtiyacı olmayacaq, Pərviz azadlıqda olub həyat yoldaşı ilə birgə, elə özləri arzuladığı kimi Zeynəb üçün çox önəmli olan bu məqamı onunla paylaşıb, onu birgə məktəbə aparacaqlar.
Simasında 6 yaşlı uşağa xas olmayan, müdriklik ifadəsi olan bu qızcığaz hətta öz doğum gününü belə atası evdə olmadan qeyd etməyə razı olmayıb: "Mənim ad günümü atam gələndə qeyd edərik".

- Təcridxanada Pərvizlə görüşə gedərkən Zeynəbi də özünüzlə aparırsınızmı? Görüşləriniz necə keçir?

- Orada yalnız həftədə bir dəfə görüşmək imkanımız var. Təcridxanada ümumi görüş otağı var. Hamı həbsdəki yaxınları ilə orada görüşür. Məhbusları doğmalarından ayıran şüşə sədd var. Zeynəbi də həmişə özümlə götürürəm. Şüşə arxasından bir-birlərini öpürlər. Atasına "üzünü şüşəyə gətir, öpüm səni" deyir. Atası da üzünü şüşəyə söykəyir…

- Pərvizlə ailə üzvlərinə açıq görüş verilməsi ilə bağlı hüquq müdafiəçiləri vasitəsi ilə Penitensiar Xidmətin rəhbərliyinə müraciət etmisiniz. Ümidiniz varmı belə bir görüşə?

- Avqustun 1-i Pərvizin doğum günüdür. Vəkillər vasitəsi ilə Penitensiar Xidmətin, Kürdəxanı İstintaq Təcridxanasının rəhbərliyindən xahiş etmişik ki, ən azı həmin günü onunla görüşməyə bizə icazə versinlər. Heç olmasa həmin günü qızım atasını qucaqlaya bilsin. Penitensiar xidmətin rəisi, Mədət Quliyevdən də xahiş edirik ki, ən azından ayda bir dəfə Pərvizlə açıq görüşə şərait yaratsın.

İlahə xanım həmçinin ailə vəziyyətini və azyaşlı uşağının olmasını nəzərə alaraq, Pərviz Həşimlinin Kürdəxanıdan Bakıda yerləşən cəzaçəkmə müəssisələrindən birnə köçürülməsi üçün də müraciət etdiklərini xatırlatdı.

Onun sözlərinə görə, P.Həşimlinin səhhətində bəzi problemlər yaranıb: "Özü bizə heç nə demir, yalnız vəkillərindən səhhət ilə bağlı məlumatlar ala bilirik. Vəkillərin dediyinə görə, hazırda gözlərində zəiflik, ürəyində ağrılar və dişlərində problemlər var. Bu da əsəbdən, stressdən yaranıb. Vəkillər deyib ki, gözündən şikayətləndikdən sonra Pərviz hələ ki, tibbi müayinədən keçirilməyib.

Xatırladaq ki, Pərviz Həşimli Təvəkkül Qurbanov adlı şəxslə 2013-cü il sentyabrın 17-də Milli Təhlükəsizlik Nazirliyinin keçirdiyi əməliyyatla saxlanılıb. Onlara qarşı odlu silahın və döyüş sursatının qaçaqmalçılığı və odlu silah saxlama maddələri ilə ittiham irəli sürülüb. Pərviz Həşimli ittihamları qəbul etmir, T.Qurbanovun MTN-in adamı olduğunu deyərək, onun vasitəsilə şərləndiyini və siyasi sifarişlə, saxta ittihamla həbs edildiyini bəyan edib. Bakı Ağır Cinayətlər Məhkəməsinin 15 may 2014-cü il tarixli hökmü ilə Pərviz Həşimli 8 il müddətinə azadlıqdan məhrum edilib. Beynəlxalq Amnistiya Təşkilatı onu "vicdan məhbusu" elan edib

Gülnar Səlimova
Rəşad Vaqifoğlu
Fotolar müəlliflərə aiddir