“Məhkəmələr müstəqil olsaydı,
İlham Əmiraslanov çoxdan azad edilmişdi”

Dünən Şirvan Şəhər Apellyasiya Məhkəməsində “Kür” Vətəndaş Cəmiyyəti Qərargahının fəalı İlham Əmiraslanovun məhkəməsi keçirilib. Qərargahın koordinatoru Oqtay Gülalıyev deyib ki, Əhməd Nurməmmədovun sədrliyi ilə keçirilən məhkəmə prosesində müdafiə tərəfinin şahidləri ifadə verib: “Şahidlərin ifadəsi bir daha sübut etdi ki, İlham Əmiraslanovun üzərinə kənardan silah qoyulub. Onlar ifadələrində bildirdilər ki, İlham Əmiraslanovun evində baxış keçirilən zaman orada olublar. Şahidlər dedilər ki, polis əməkdaşlarının patronu sellofanda İlham Əmiraslanovun evinin zirzəmisinə qoyub, elə oradan da götürdüklərini görüblər”.
İlham Əmiraslanovun həbsində iştirak etmiş Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları yanvarın 16-da keçirilən məhkəmə prosesində iştirak etməyiblər. Oqtay Gülalıyevin sözlərinə görə, bu səbəbdən proses yanvarın 23-nə təyin olunub.
Xatırladaq ki, 2010-cu ilin yazında baş vermiş çay daşqınlarının yaratdığı problemlərin həll olunması, daşqınlardan ziyan çəkmiş vətəndaşlara hüquqi yardım göstərilməsi istiqamətində fəaliyyət göstərən hüquq müdafiəçisi İlham Əmiraslanov 2012-ci ilin iyunun 8-də həbs olunub. Bakı İstintaq Təcridxanasında saxlanan fəal Cinayət Məcəlləsinin 228.1-ci maddəsi ilə ittham olunur.
Azərbaycan məhkəmələrinin siyasi sifarişlə işlədiyini deyən Oqtay Gülalıyev sabahkı prosesdə hansı qərarların veriləcəyini təxmin edə bilmədiyini vurğulayıb: “Məhkəmələr müstəqil olsaydı, İlham Əmiraslanov çoxdan azad edilmişdi. Onun işinə dərhal xitam verilməlidir, çünki müdafiə tərəfinin təqdim etdiyi dəlillər və şahid ifadələri İlham Əmiraslanovun üzərinə kənardan silah qoyulduğunu sübut edib. Amma həm Sabirabad, həm də Şirvan məhkəməsi onun haqqında ədalətsiz qərar çıxarıb. Bu ədalətsizlik artıq 5 aydır davam edir”.
“Xəbər xidməti”