Etibar Əmiraslanov: “”Bizim ordumuz güclüdür.; ən son texnikalar bizdədir, ancaq...”
Əfsanəvi batalyon komandiri, Birinci Qarabağ müharibəsi veteranı Etibar Əmiraslanov musavat.com-a son günlərdə baş verən intensiv atışmalar, əsasən də Tovuzun Əlibəyli kəndindəki son durumla bağlı öz fikirlərini bölüşüb.

Etibar Əmiraslanovun sözlərinə görə, orduya köhnə döyüşçülər lazımdır: “Cəbhə xəttində olanlar cavan uşaqlardır. Onlar lap iki il qulluq etsinlər. Axı döyüş görməyiblər?! Mütləq köhnə döyüşçüləri onların yanına qoymaq lazımdır. Hər 10-15 əsgərə bir təcrübəli döyüşçü ayırmaq lazımdır. Bizim təcrübəmizin sayəsində yeni gəlmiş əsgərlər qısa müddət ərzində əsl döyüşçüyə çevrilə bilər. Bundan əlavə komandirlərin böyük hissəsi başqa rayonlardan olanlardır. Ərazini yaxşı tanımırlar. Bilmirlər ki, təpənin o biri tərəfində onları nə gözləyir. Amma yerli sakinlər, əsasən də 21-22 yaşlı cavan uşaqlar bunları yaxşı bilirlər. Uşaqlıqları oralarda keçib. Güllədən qorxan deyillər. Çünki balaca vaxtlarında məktəbə gedəndə onların yaxınlığından güllələr keçib. Hamısı atışma səsləri ilə böyüyən uşaqlardır”.

“Atışma vaxtı camaat saatlarla evin bir küncündə qısılıb qalır”

Keçmiş döyüşçü deyir ki, atışma zamanı camaat evlərin bir küncündə gizlənməli olur: “Evlərin divarları güllə atəşinə tuş gəlməkdən darmadağın olub. İstənilən evdə güllə izi var. Atışma vaxtı camaat saatlarla evin bir küncündə qısılıb qalır. Bu nə qədər davam edə bilər? Yalandan çəkilişlər aparırlar ki, kənddə hər şey əladır. Siz sakitcə, rayon rəhbərliyinin xəbəri olmadan o kəndə getsəniz hər şeyi daha yaxşı öyrənə bilərsiniz. Camaat arasında sorğu keçirin görün onların nə qədər problemləri var. Amma bunlar xəbər tutsalar ki, siz kəndə çəkiliş üçün gəlirsiniz, o dəqiqə öz adamlarını yığacaqlar oraya. Hamısı da sizə deyəcək ki, hər şey əladır. Bu yolla camaatı aldadırlar”.

“Mənə imkan yaratsalar 3 günə erməninin dizini qoyaram yerə”

“Bizim ordumuz güclüdür. Ən son texnikalar bizdədir. Amma ermənilərə yaxşı cavab vermirlər. Ermənilərin kəndə atəş açmasına gərək imkan verməsinlər. Onlar 10 dəfə güllə atanda bunlar 20 dəfə atıb düşməni susdurmalıdırlar. Kəndi qorumalıdırlar. Kənd boşalmamalıdır. Mənə imkan yaratsalar 3 günə erməninin dizini qoyaram yerə” - deyərək sözlərinə əlavə etdi.

“Bəziləri Bakıda oturub sərhəd zonasındakı insanlar haqqında boş-boş danışırlar”
Əmiraslanov bildirdi ki, Əlibəyli camaatı hər an döyüşməyə hazırdır: “Bəziləri Bakıda oturub sərhəd zonasındakı insanlar haqqında boş-boş danışırlar. Əlibəyli camaatı qeyrətli camaatdır. Hər an da döyüşməyə hazırdılar. Həmin insanlar gəlib 2 saat güllə atəşinin altında yatmağa çalışsınlar, sonra danışarlar. Kənddə güllə atılmayan yer qalmayıb. Üstəlik atışma başlayan kimi rayon mərkəzindən kəndin işıqları söndürülür. Səbəb olaraq da, ermənilərin işığa daha çox güllə atdığını göstərirlər. Amma fikirləşmirlər ki, camaat qaranlıqda çarəsiz qalır. Bütün bunlara baxmayaraq kənd camaatı öz həyatlarına davam edirlər. Heç kəsdən qorxmurlar”.

“Döyüşə nə vaxt gedirik?”

Əmiraslanov onu da qeyd etdi ki, ona keçmiş döyüşçülər tez-tez zəng edirlər: “Mən və mənim kimi könüllü olaraq döyüşməyə hazır olan insanlar var. Bizdən istifadə etmirlər. Bizə imkan yaratsalar ermənilərin başına oyun açarıq. Mənə hər gün keçmiş könüllülərdən yüzlərlə zəng gəlir. Çoxlarını heç tanımıram. Hamısı da bir sözü deyir, ”Döyüşə nə vaxt gedirik ?". Amma bəzi məmurlar məni yuxarılara pis qələmə veriblər. Bilirlər ki, ermənilərin yüksəkliklərinə bayrağımızı sanca-sanca gedəcəyəm, prezident də bu məsələdə diqqətlidir. O halda məmurlar pis vəziyyətdə qalacaqlar. Ona görə məni yuxarılara pis təqdim edirlər; məni dəli, başdan xarab, savadsız kimi qələmə verirlər, istəmirlər döyüşlərə gedim. Təki Qarabağdakılar da başdan xarab olaydı, amma torpaqlarımız alınmayaydı. Mənə imkan yaratsalar 1 aya erməniləri elə yerlərə qovaram ki, Əlibəyliyə ancaq kilometrlərlə uzaq məsafədən baxa bilərlər".

“Hazırda elə bir texnikamız var ki, biz o silahlarla Yerevana qədər gedib çıxa bilərik”

“İndi deyillər ki, ermənilərdən filan qədər könüllü orduya qoşulanlar var və ya qoşulmaq istəyənlər var. Amma bizim üçün bunun heç bir fərqi yoxdur. Onların hamısını qısa müddətdə məhv edərik. Hazırda elə bir texnikamız var ki, biz o silahlarla Yerevana qədər gedib çıxa bilərik. 95-ci illərdə mən Əlibəylidə batalyon komandiri olanda ermənilərə hərəkət eləməyə imkan vermirdim. O zamanlarda ermənilər səngər qazmağa çalışanda onları gülləyə tuturdum. Bir nəfərə belə imkan vermirdim ki, səngər qazsın. Səfər Əbiyev mənə deyirdi ki ”Sən atəşkəsi pozursan". Deyirdim ki, bunlara bu məsafədə səngər qazmağa imkan vermək olmaz. Bu günün sabahı da var. Onlar başımızı ağrıdacaqlar. Elə də oldu. İndi həmin səngərlərdən bizim kəndləri atəşə tuturlar. O vaxtlarda erməni bizə 1 kilometr məsafədən atırdılar. İndi 100 metrdən atırlar" - deyərək sözlərinə davam etdi.

“Bu, oğurluq kimi çıxır”

“Bir həftədən sonra erməni bir dənə də güllə ata bilməz. Onları yarandıqlarına peşman edərəm. Əgər Əlibəyli camaatı görsə ki, məndə bu səlahiyyət var, onlardan biri də kənddən çıxmaz. Mən o qədər döyüşmüşəm, indi də dediyim kimi döyüşməyə hazıram. Hərənin əlindən bir iş gəlir. Mənim də əlimdən ancaq döyüşmək gəlir. Amma hazırda sürücülüklə məşğulam. Avtovağzalın yaxınlığında dayanıb rayonlara sərnişin daşıyıram. Bu oğurluq kimi çıxır. Bunu özümə yaraşdıra bilmirəm”.

Məhəmməd TÜRKMƏN