Təhsil Nazirliyi TQDK-ya “xox” gəlir?

“Fikrimcə, TQDK monitorinqi dərsliklərdən səhvlərin yığışdırılması, dərsliklərimizin cilalanmasına xidmət edən bir tədbir kimi həyata kecirməlidir. Bir-birimizdə məqsədli şəkildə eyib axtarmağa qalası olsa, nə qədər desən eyib tapmaq olar”. Bu fikri bir həftə öncə qəzetinin müxbirinə Təhsil Nazirliyinin dərslik və nəşriyyat şöbəsinin müdiri Faiq Şahbazlı deyib. Mənə görə, Şahbazlının TQDK-ya qarşı işlətdiyi bu ultimativ sözlər təsadüfi deyil. Fikrimə aydınlıq gətirmək üçün bir az keçmişə ekskurs etmək istərdim…
Diqqətli oxucuların yadındadırsa, TQDK sədri Məleykə Abbaszadə 2010-cu ilin sonlarında keçirdiyi mətbuat konfranslarının birində orta məktəb dərsliklərində ciddi səhvlərin olduğunu söyləmiş və bildirmişdi ki, “Abituriyent” jurnalında onların düzəlişi veriləcək. Göründüyü kimi, burada kiminsə xətrinə dəyə biləcək bir şey yox idi. Amma, nədənsə, Şahbazlı sədrin xoşniyyətli sözlərini top-tüfənglə qarşıladı: “Dərslikdəki səhvlər və onların düzəlişi. Belə də başlıq olar?! Bu nə başlıqdır? Bu, etik cəhətdən doğru deyil … Bəyəm, TQDK-nın özündə problemlər yoxdur? Hamıda problem var”… Düşünmək olardı ki, bu bir təsadüfdür, Şahbazlı TQDK sədrini yaxşı anlamayıb və isterikaya düşərəkdən bu sözləri deyib…
Aradan bir il keçdi. TQDK sədri başqa bir tədbirdə vurğuladı ki, dərsliklərimizdəki nöqsanlar qəbul imtahanları zamanı abituriyentlərin çalışmaları səhv yerinə yetirmələrinə gətirib çıxarır. Komissiya sədrinin bu haqlı iradını eşidər-eşitməz, Şahbazlı yenə mindi cin atına: “Səhvləri demək olar. Amma bunu niyə belə şişirtmək lazımdır, başa düşmürəm. Bunlar xırda səhvlərdir. TQDK tələbə qəbulu ilə məşğul olmalıdır. Onlar bizim dərsliklərdən istifadə edib “şparqalka” hazırlayırlar. Uşaqları ətraflı (?! – N.İ.) elmdən uzaqlaşdırırlar”. Faiq müəllimin bu “qəhrəmanlığı” ildırım sürətilə cəmiyyət arasında yayılmağa başladı. Hamı düşündü ki, bugünlük, sabahlıqdır, yəqin tezliklə onu bayıra atacaqlar ki, niyə başından yekə hərəkətlər edirsən. Atalar demişkən, “sən saydığını say, gör fələk nə sayır”. Əksinə, onun bu hərəkətləri Mərdanova o qədər xoş gəldi ki, mətbuatın yazdığına görə, az qaldı onu özünə müavin təyin edə…
Xeyli vaxt da ötdü. Keçən il aprel ayının 19-da ölkə başçısının fərmanı ilə dərsliklərin monitorinqi Təhsil Nazirliyindən alınıb TQDK-ya verildi. Bu, bəzi işbazları narahat etməyə başladı. Dərhal Şahbazlıdan təskinlik xəbəri gəldi ki, narahat olmayın “biz yenə də əvvəlki qaydada işlərimizi davam etdirəcəyik… TQDK əvvəllər dərsliklərlə bağlı rəyini bildirirdi, indi, sadəcə, rəsmi olaraq bildirəcək”…
Nəhayət, ötən ilin oktyabrı gəldi. TQDK-da dərsliklərin monitorinqinə start verildi. Seminar seminarın ardınca keçirilməyə başladı. Dərslik dəllallarının kürkünə birə düşdü ki, ay aman, “sevimli” dərsliklərimiz sıradan çıxacaq. Alver predmetinə çevrilmiş bu “dərsliklərin” paxırı üzə çıxdıqca Şahbazlının kefinə soğan doğranırdı. Buna dözməyərək o, mətbuat vasitəsilə TQDK-ya mesaj göndərdi ki, fikrinizdən daşının: “dərs ilinin başa çatmasına 5 ay qalıb, sınaqdan keçmədən dərsliklərin monitorinqini aparmaq düzgün deyil”. Bundan da bir şey çıxmadığını görən Şahbazlı başladı TQDK-nın qiymətləndirmə modeli üzərinə hücuma keçməyə ki, “TQDK Təhsil Nazirliyinin qiymətləndirməsini hörmətdən salmaq üçün yeni qiymətləndirmə modeli yaradır”. Bu da onun karına gəlmədikdə yeni uydurma ilə çıxış etdi ki, “TQDK dərsliklərin monitorinqi zamanı Təhsil Nazirliyindən narazı adamlardan daha çox istifadə edir”. Nə isə…
İndi qayıdaq sözümüzün əvvəlinə – Şahbazlının dediklərinə. Şəxsən mən onun dediklərini belə başa düşürəm: Əgər TQDK dərslik məsələsində dərinə getsə, biz də onun eyiblərini açıb tökəcəyik. Bildiyimiz kimi, dərsliklərin monitorinqini aparmaq, loru dildə desək, onlardakı eyibləri axtarmaq, TQDK-nın bilavasitə işidir. Bəs Şahbazlının dediklərinin adı nədir? Hesab edirəm ki, bunun bircə adı var: boyundan hündür tullanmaq. Yaxşı olardı ki, o, bu cür sözləri deməmişdən öncə öz nazirinin müşgü-ənbər qoxuyan “hərə öz işi ilə məşğul olsa, yaxşıdır” kəlamını yadına salaydı.

P.S. Yuxarıda deyilənlərdən bir nəticə də hasil olur: Ya Şahbazlıya bu sözləri Mərdanov dedizdirir, ya da Şahbazlı Mərdanovu saymır!..

Nadir İSRAFİLOV,
təhsil ekspert