"Sizi əmin edirik ki, dövlətçilik yolunda atdığınız bu addım hər zaman rayon ictimaiyyəti tərəfindən minnətdarlıqla xatırlanacaq"



Kəlbəcər rayon ictimaiyyəti adından Moderator.az-a müraciət daxil olub.

Müraciətdə deyilir:

"Kəlbəcər rayonu təkcə bənzərsiz iqlimi və şəfalı suları ilə deyil, hər zaman yüksək mənəvi dəyərli insanları, görkəmli ziyalıları, elm-incəsənət xadimləri ilə tanınıb və rayon əhalisinin qonaqpərvərliyi, vətənpərvərliyi bir nümunə kimi göstərilib. Bu rayonun insanları öz saflığı, mərdliyi, kişiliyi, ar- həyanı, namus-isməti gözləmələri, ağsaqqal-ağbirçək yeri bilmələri ilə seçiliblər.
Amma nə yazıq ki, kəlbəcərlilərin bu yüksək adına xələl gətirənlər də tapılır. Buna misal olaraq Kəlbəcər rayon təhsil şöbəsinin keçmiş müdiri Məhəmməd Bağırovu göstərmək olar. Bu adamın Kəlbəcər camaatının adına, rayon təhsil ictimaiyyətinin nüfuzuna vurduğu zərbələrin ağır nəticələrini aradan qaldırmaq üçün bəlkə də bir neçə il kifayət etməyəcək. Onun təhsil şöbəsinə rəhbərlik etdiyi dönəmdə törətdiyi saxtakarlıqlar, vəzifə səlahiyyətlərindən sui-istifadə halları və dövlət vəsaitlərini talaması azmış kimi azyaşlı rayon sakininə qarşı əxlaqsızlıq etməsi, törətdiyi yaramaz hərəkət ifşa olunduqdan sonra bunun ictimailəşməsinə qarşı müxtəlif şantaj vasitələrindən istifadə edərək Kəlbəcər əhalisi arasında gərginlik yaratması insanların səbrinin daşmasına səbəb olmuşdu.
Nə yaxşı ki, gec də olsa belə bir mənfi reputasiyalı adam, Kəlbəcərin uca dağ vüqarına xələl gətirən bu yaramaz ünsür haqq etdiyi cinayət məsuliyyətinə cəlb edilərək həbsxanaya salındı.
Elə buna görə də Kəlbəcər ictimaiyyəti hörmətli baş prokuror Zakir Qaralova öz minnətdarlığını bildirmək üçün belə bir müraciətdə bulunmağı özünə borc bilib. Biz kəlbəcərlilərin təmiz adının Məhəmməd Bağırov sindromundan xilas etdiyinə görə baş prokurora təşəkkürümüzü bildiririk və onu əmin edirik ki, belə bir adamla bağlı ən sərt cəza tədbiri görülməsi rayon camaatı arasında dövlətimizə, onun hüquq-mühafizə orqanlarına inamı, rəğbəti birə beş artırıb. Biz bir daha dövlətçiliyimizin əmin əllərdə olmasını gördük və cənab prezident İlham Əliyevin rəhbərliyi altında aparılan siyasətin bəhrəsini hiss etdik. Heç təsadüfi deyil ki, Kəlbəcər ictimaiyyəti arasında belə bir qənaət hakim kəsilməyə başlamışdı ki, rayon birinci dəfə 1993-cü ilin 2 aprelində ermənilər trəfindən, ikinci dəfə isə Məhəmməd Bağırov tərəfindən işğal olunub. Elə buna görə də ötən müddət ərzində rayonda Məhəmməd Bağırova çoxsaylı satirik şeirlər, lətifələr qoşulub.

Cənab baş prokuror!

Bir daha kəlbəcərlilərin canını bu adamdan qurtardığınıza görə Sizə dərin minnətdarlığımızı bildiririk və sizi əmin edirik ki, dövlətçilik yolunda atdığınız bu addım hər zaman rayon ictimaiyyəti tərəfindən minnətdarlıqla xatırlanacaq!