Deputat ABŞ-a və İsrailə reyslərin rentabelli ola biləcəyini iddia edir...


Parlamentdəki büdcə müzakirələrində çıxış edən Qubadan seçilmiş yəhudi əsilli deputat Yevda Abramov əslində sensasiya sayıla biləcək bir məlumat səsləndirdi ki, onda olan informasiyaya görə Rusiya tərəfi Qubada tikiləcək aeroportun inşasına etiraz etdiyindən bu iş yarımçıq dayandırılıb.

Moderator.az deputatdan bu barədə daha müfəssəl məlumat almaq üçün ona müraciət edib və aşağıdakı cavabı alıb:

"Mən kiməsə bu barədə rəsmi müraciət etməmişəm. Əgər hökumət üzvləri özləri büdcə müzakirələrində oturublarsa sorğu kimi demişəm ki, bu şayiə də ola bilər, xalqın arasında deyilən versiya da. Amma mən bunu sorğu kimi səsləndirdim ki, bu fikirlər nə dərəcədə düz ola bilər. Əgər biz işə başlamışıqsa, bir sıra insanlardan fərdi torpaq sahələrini almışıqsa, artıq planlaşdırma işlərinin bir hissəsi aparılıbsa, birdən-birə o iş niyə dayandırıldı? Hələ əlavə torpaqlar alınmalıdır. Çünki aeroport elə bir obyektdir ki, onun sahəsi hektarlarla olur. Plana düşən xeyli sayda ərazi var ki, onun sahibləri həmin torpaqlarla bağlı qərar verməkdə çətinlik çəkir ki, onu dövlət alacaq, ya yox. Təbii ki, mən millət vəkili olaraq bu məsələnin bütün nüanslarını bilmirəm. Amma bilmək istəyirəm."

Qubanın icra başçısının məsələdən nə dərəcədə hali olması barədə sualımıza da deputat birmənalı cavab vermədi:

"Onun da sadəcə mülahizələri var. İcra başçısı belə mülahizə yürüdür ki, aeroportun tikintisi investisiya planına salınıb, amma 2015-ci ilin Birinci Yay Avropa Oyunlarına görə bəzi obyektlərin hələlik tikintisi dayandırılıb.
Bildirim ki, Qubada aeroportun olması regionun əhalisinin və dövlətimizin marağındadır. Təbii ki, mən onun iqtisadi səmərəsinin bütün detallarını tam hesablamamışam, ancaq dəqiq bilirəm ki, həmin aeroport Zaqatala, Qəbələ və digər yerlərdə olan aeroportlardan daha rentabelli olacaq. Bİlirsiniz niyə? Ümumiyyətlə, biz bu gün təhlil aparsaq, AZAL-ın Bakı reyslərində uçan sərnişinlərin ölkənin hansı regionlarından olmasını ayırd etsək görərik ki, onların əksəriyyəti Quba və Şimal regionunun əhalisidir. Əsasən də Qırmızı qəsəbənin əhalisidir. Taleyin işidir. Bir hüzr düşəndə birdən-birə 150-200 nəfər təyyarə ilə uçub gəlirlər. Hətta bəzən elə olur ki, Moskvadan əlavə olaraq Bakıya reys verirlər. Bundan başqa həftədə və ya 15 gündən bir bir İsrail reysi olsa bu reys də özünü tam doğruldacaq. Hətta ABŞ-dan da həddindən çox adamlar gəlir. Bundan əlavə Quba regionunda həddindən çox yay-qış turizm komleksi var. Başqa bir misal. Hesablayın ki, Dərbənd-Mahaçqala yolu 130 kilometrdir. Amma Dərbənddən Qubada aeroport tikiləcək əraziyə cəmisi 52 kilometrdir. Yəni Rusiyanın həmin bölgəsinin bütün əhalisi gəlib ordan uçacaq. Məhərrəmkənd, Qasımkənd, o cümlədən Dərbəndətrafı bütün rayonların əhalisi Moskva-Quba reysi ilə uşacaq."

Deputatdan ondakı bu informasiyanın hardan qaynaqlandığıyla maraqlandıq və belə bir fikri dilə gətirməklə məlumatlı adam olmasına işarə etdik. Bildirdi ki, bu haqda danışmaq istəmir və bu barədə əlində rəsmi məlumat olmadığından nəsə deməsi doğru olmazdı:

"Sadəcə belə bir məlumat dolaşır. Ona görə də beynəlxalq konvensiyalara baxmaq lazımdır. Deyilir ki, guya hər hansı bir ölkənin sərhəddinə yaxın ərazidə belə obyektlər tikildikdə qonşu dövlətin razılığı olmalıdır. Bunun nə dərəcədə düzgün olduğunu deyə bilmərəm. Bunun üçün gərək aviasiya barədə aktları, konvensiyaları qurdalayasan. Amma mən sadəcə seçicilərimin narahatlığını parlamentdə hökumət üzvlərinin qarşısında ifadə etdim ki, aydınlıq gətirilsin."