“Baş prokurorun birinci müavini Rüstəm Usubovla söhbətdə İnsan Haqları üzrə Monitorinq Qrupu olaraq Xədicə İsmayıl haqqında həbs-qətimkan tədbirinin ev dustaqlığına dəyişdirilməsini təklif etdik. Bildirdik ki, biz Xədicə İsmayılovaya zamin durmağa hazırıq”.

gundemxeber.az xəbər verir ki, bu sözləri “Yeni Müsavat”a açıqlamasında Monitorinq Qrupunun üzvü Səidə Qocamanlı deyib.
Onun sözlərinə görə, dekabrın 8-də Novella Cəfəroğlu, Mirvari Qəhrəmanlı və Səadət Bənənyarlı ilə bərabər baş prokurorun müavini Rüstəm Usubovla ölkədə insan haqlarının durumu və 31 dekabrda gözlənilən əfv fərmanı ilə bağlı müzakirələr aparıblar: “Leyla Yunusun səhhətində problemlər var. Biz bu məsələsini də geniş müzakirə etdik. Biz onun da səhhəti nəzərə alınaraq haqqındakı həbs hökmünün ev dustaqlığına dəyişdirilməsini təklif etmişik. Bundan qabaq Ədliyyə Nazirliyində keçirdiyimiz görüşdə Leyla Yunusun müstəqil həkim baxışından keçirilməsi məsələsini qaldırmışdıq. Bu təklifimiz müsbət qarşılanıb. Çox güman, ən qısa zamanda Leyla Yunus müstəqil həkim baxışından keçəcək və prosesə “Sülh və Demokratiya” İnstitutunun eksperti Azad İsazadə də müşahidəçi olaraq qatılacaq”.
Səidə Qocamanlı 31 dekabr da dövlət başçısının əfv fərmanı imzalayacağı haqqında xəbərləri bir daha təsdiq edib:“Çox böyük ümidlər, gözləntilər var. Rüstəm Usubovla əfv ərizəsi yazan NiDA-çıların məsələsini ayrıca müzakirə etdik. Daha sonra İntiqam Əliyevin, Rəsul Cəfərovun məsələsini qaldırdıq, xahiş elədik ki, onlar haqqında da həbs qərarı dəyişdirilsin. Siyasi məhbus siyahımızda olan Tofiq Yaqublunun, İlqar Məmmədovun, eləcə də Akif Muradverdiyevin, Elnur Seyidovun məsələsini də gündəmə gətirdik. Rüstəm Usubov bildirdi ki, bizim təkliflərimizi baş prokuror Zakir Qaralova çatdıracaq. Elə bilirəm ki, bu təkliflərin ciddi nəticəsi olacaq”.
“Xədicə İsmayılovanın həbsi yanlış qərardır və dəyişdirilməlidir. Onun bizə münasibətində asılı olmayaraq biz onun azadlığa çıxması üçün bacardığımızı edəcəyik, bütün təşəbbüsləri qaldıracağıq”. Bu sözləri isə “Yeni Müsavat”a açıqlamasında İnsan Haqları üzrə Monitorinq Qrupunu üzvü Novella Cəfəroğlu verib. İnsan haqları müdafiəçisi düşünür ki, sözügedən həbsi ev dustaqlığı ilə əvəz etmək üçün yetərincə tutarqa var: “Xədicədən şikayət verən şəxs ölməyib. Özünün iddia elədiyi kimi intihara cəhd edib. Hələ bilinmir ki, bu iddia nə qədər əsaslıdır, biz o adama inana bilərik, yoxsa yox. Rüstəm Usubovla söhbətdə bu məsələni geniş müzakirə elədik, düşündüklərimiz ona bildirdik, xahiş elədik ki, bizim zaminliyimiz altında onun azadlıqda qalmasına imkan yaradılsın. Biz onu zaminə götürüb istintaqda iştirakına şərait yaratmağa hazırıq”.