“Sevil Massivi” Mənzil Tikinti Kooperativinin (MTK) üzvləri aksiya keçirməyə hazırlaşır. Bu haqda redaksiyamıza zərərçəkənlərdən biri məlumat verib. O deyib ki, Abşeron İcra Hakimiyyəti onlara MTK-ya ödədikləri pulları Abşeron bələdiyyəsi vasitəsilə qaytarılacağını vəd edib. Lakin bu günə qədər pulları ödənməyib.

“Prezident Administrasiyasının, Bakı Şəhər İcra Hakimiyyətinin qarşısına gedib pullarımızın qaytarılmasını tələb edəcəyik” deyə, zərərçəkən bildirib. Onun sözlərinə görə, MTK rəhbərliyinə cinayət işi başlandıqdan sonra həmin ərazidə ev, torpaq sahəsi alan vətəndaşların çoxu çıxılmaz duruma düşüb. Onlar nə mülklərinə sahib ola bilirlər, nə də ödədikləri vəsaiti geri ala. Ötən ayın ortalarında aldadılan vətəndaşlar Abşeron Rayon İcra Hakimiyyətinin və Hökməli bələdiyyəsinin qarşısında etiraz aksiyası keçiriblər. Zərərçəkmişlər hüquqlarının pozulmasına rəğmən müraciətlərinə baxılmamasına etiraz ediblər. Aksiyada zərərçəkmiş vətəndaşlar “Torpağımızı qaytarın!”, “Evimizi verin!”, “Pullarımızı yeməyin!” şüarları səsləndiriblər. Aksiya zamanı zərərçəkənlərə rayon icra hakimiyyətinin başçısı Zakir Fərəcovun adından vədlər verilib. Bildirib ki, icra başçısı problemin qısa müddətdə həll ediləcəyinə zərərçəkənləri əmin edir.

Zərərçəkənlər deyir ki, “Sevil Massivi” MTK-da külli miqdarda vergidən yayınma faktına görə cinayət işi başlanıb və rəsmilər bununla da işlərini bitmiş hesab edirlər: “Qanunsuzluq aşkar ediblərsə və bunu araşdırırlarsa, lap yaxşı. Amma bu qanunsuzluğu aradan qaldırmaq üçün bizə qarşı da qanunsuzluq edirlər. Məsələni elə araşdırmaq olardı ki, biz küçələrdə qalmayaq. Bizi düşünən yoxdur. Banka borca girərək torpaq, ev almışıq. Əgər ”Sevil" MTK dələduz idisə, bir belə idarə, təşkilat hara baxırdı? Niyə bu MTK-nın qanuni və ya qanunsuz olduğunu əvvəl gündən araşdırmırdılar? Vacib idi ki, 3 min nəfər zərər çəksin, dövlətdən narazı düşsün? Həmin ərazini “Sevil” MTK kosmosda tikməyib ki, bunu görməsinlər? Deməli, xəbərləri olub. Biz sənədlərə baxmışıq, müqavilə bağlamışıq. Həmin sənədləri verən də dövlət qurumlarıdır. Qanunsuz idisə niyə o sənədləri verirdilər? Döymədiyimiz qapı, müraciət etmədiyimiz qurum qalmayıb. Hamısı da boş vədlər verir. Baş Prokuror yanında Korrupsiyaya qarşı Mübarizə Baş İdarəsinə gedib-gəlməkdən yorulmuşuq. Hər dəfə “gedin, 15 gün sonra gələrsiniz, sizə məlumat veriləcək” deyirlər".
Bu günə qədər MTK üzvü olan 3 min zərərçəkmişdən 300-nün verdiyi pul özünə qaytarılıb. Sentyabrda Abşeron Rayon İcra Hakimiyyəti və Hökməli Bələdiyyəsi vasitəsilə 300 nəfərin pulunu qaytarıblar.

Qeyd edək ki, bir müddət əvvəl “Sevil Massivi” MTK-nın təsisçisi Aynur Zeynalov və həmin kooperativin direktoru həbs olunublar. Hər iki şəxs “qanunsuz sahibkarlıq” və “vergi ödəməkdən yayınma”da ittiham olunur. Onlarla bərabər Hökməli bələdiyyəsinin sədri Mirnemət Mirəziz oğlu Miradıyev də tutulub. Həbsindən bir qədər əvvəl “Tərəqqi” medalı ilə təltif olunmuş M.Miradıyev sonradan naməlum səbəbdən azad olunub. M.Miradıyevin bu məsələyə aidiyyəti isə MTK-ya Hökməli bələdiyyəsinin balansında olan hektarlarla torpaq sahəsini ayırması olub. Belə məlumatlar da var ki, M.Miradıyev istintaqda dindirildiyi zaman Abşeron Rayon İcra Hakimiyyətinin başçısı Zakir Fərəcov dövlət orqanlarına bələdiyyə sədrinin azad edilməsi üçün müraciətlər edib.

Baş Prokurorluğun məlumatına görə, Vergilər Nazirliyi “Sevil Massivi” MTK-da külli miqdarda vergilərin dövlət büdcəsinə ödəməkdən yayınma faktı aşkar edib. Bununla bağlı Baş Prokuror yanında Korrupsiyaya qarşı Mübarizə Baş İdarəsində cinayət işi başlanıb. Məlumata görə, şirkət rəhbərləri 2013-2014-cü illərdə 172 min 507 manat məbləğində sadələşdirilmiş vergini dövlət büdcəsinə ödəməyiblər. O cümlədən, onlar xüsusi razılıq (lisenziya) almadan qanunsuz sahibkarlıq fəaliyyəti ilə məşğul olub 100 min manata yaxın gəlir əldə etməkdə ittiham edilirlər. İstintaq hesab edir ki, “Sevil Massivi” MTK-nın məsul şəxsləri həm bələdiyyənin mülkiyyətində olan 30 hektar perspektiv inkişaf torpaqlarını, həm də ayrı-ayrı şəxslərin mülkiyyətində olan “At yalı” və “Sonalı sahəsi” adlandırılan 110 hektar örüş torpaqlarını qanunsuz olaraq zəbt edib və vətəndaşlara faizsiz kreditlə satıblar