Sabiq milli təhlükəsizlik nazirin adı daha bir qalmaqallı cinayət işində hallandı

Xəbər verdiyimiz kimi Bakı Ağır Cinayətlər Məhkəməsində “Sevil Massivi” MTK-nın vəzifəli şəxsləri barəsində olan cinayət işi üzrə məhkəmə prosesi davam edir.

Qeyd edək ki, “Sevil Massivi” MTK-da külli miqdarda vergilərin dövlət büdcəsindən yayındırılması faktına əsasən Vergilər Nazirliyində başlanmış cinayət işi üzrə istintaq aidiyyəti üzrə Baş prokuror yanında Korrupsiyaya qarşı Mübarizə Baş İdarəsində davam etdirilib.

Kooperativin təsisçisi Aynur Zeynalovun kooperativin direktoru Elçin İsmayılov və digərləri ilə qabaqcadan əlbir olaraq 2013-2014-cü illərdə 172 min 507 manat məbləğində sadələşdirilmiş vergini dövlət büdcəsinə ödəməkdən yayınıblar.

Onlar habelə xüsusi razılıq (lisenziya) tələb olunduğu halda, belə razılıq alınmadan qanunsuz sahibkarlıq fəaliyyəti ilə məşğul olaraq 99 min 597 manat məbləğində gəlir əldə ediblər.

Buna görə də Vergilər Nazirliyi yanında Vergi Cinayətlərinin İbtidai Araşdırılması Departamenti tərəfindən Aynur Zeynalova və Elçin İsmayılova Cinayət Məcəlləsinin 192.2.2 (qanunsuz sahibkarlıq) və 213.2.2-ci (vergi ödəməkdən yayınma) maddələri ilə ittiham elan edilməklə barələrində məhkəmənin qərarı ilə həbs-qətimkan tədbiri seçilib.

Nədə ittiham olunurlar

Qeyd edilənlərlə yanaşı, Abşeron rayon Hökməli bələdiyyəsinin sədri Mirnamat Miradiyevin bələdiyyə ərazisində yerləşən torpaq sahələrini Aynar Zeynalov və Elçin İsmayılovun bilavasitə şərait yaratmaları ilə müxtəlif şəxslərə sataraq ümumilikdə sonunculardan 170 min manat məbləğində rüşvət almasında şübhələr üçün əsaslar olduğundan Vergilər Nazirliyi yanında Vergi Cinayətlərinin İbtidai Araşdırılması

Departamenti tərəfindən ona Cinayət Məcəlləsinin 311.3.3-cü (rüşvət alma) maddəsi ilə ittiham elan edilməklə ağır xəstəliyi ilə əlaqədar barəsində həbslə bağlı olmayan qətimkan tədbiri seçilib.

İstintaqla həmçinin müəyyən edilib ki, “Sevil Massivi” MTK-nın məsul şəxsləri Abşeron rayon Hökməli bələdiyyəsinin sədri M. Miradiyevlə əldə etdikləri şifahi razılaşmaya əsasən, bələdiyyənin mülkiyyətində olan 30 hektar perspektiv inkişaf torpaqlarını, eləcə də ayrı-ayrı şəxslərin mülkiyyətində olan “At yalı” və “Sonalı sahəsi” adlandırılan 110 hektar örüş torpaqlarını qanunsuz olaraq zəbt edərək həmin torpaqların vətəndaşlara faizsiz kreditlə satışını həyata keçiriblər. Vətəndaşlar tərəfindən isə həmin torpaq sahələrində layihə-smeta sənədləri olmadan, dövlət qeydiyyatına alınmadan 200 fərdi yaşayış evinin tikintisi həyata keçirilib. Kredit ödənişləri başa çatdıqdan sonra bələdiyyəyə məxsus olmayan sahələr bələdiyyə tərəfindən hərraca çıxarılmaqla satılaraq vətəndaşların adlarına rəsmiləşdirilib. Bundan başqa, “Sevil Massivi” MTK tərəfindən qeyd olunan ərazinin təyinatına uyğun olmadan orada 100-dən artıq çoxmənzilli yaşayış binalarının tikintisi nəzərdə tutulub, həmçinin müvafiq dövlət qurumları ilə razılaşdırılmadan, o cümlədən qanunsuz olaraq aparılan tikinti işlərinin dayandırılması barədə Fövqəladə Hallar Nazirliyinin rəsmi xəbərdarlıqlarına məhəl qoymayaraq, binaların 14-nün özülü qazılmaqla, onlardan 4-də ilkin tikinti işləri həyata keçirilib. Bununla belə, təyinatına görə örüş torpaqları olan həmin sahələrdə qanunsuz tikiləcək çoxmənzilli yaşayış binalarından vətəndaşlara mənzillər satılıb.

İllərlə sürünəcək məhkəmə: 2 min zərərçəkən, 5 min şahid

Bu cinayət işi hakim Əfqan Hacıyevin sədrlik etdiyi kollegiyada araşdırılır. Məhkəmənin əvvəlində təqsirləndirilən şəxslər ifadə verməkdən imtina ediblər. Bu səbəbdən hakim kollegiyası cinayət işi üzrə adı keçən zərərçəkmişləri və şahidləri dinidrməyə başlayıb.

Onu da qeyd edək ki, cinayət işi üzrə 2 min zərərçəkmiş, 5 minə yaxın şahidlər var. Siyahının belə böyük olmasından demək olar ki, bu

məhkəmə prosesi hələ uzun çəkcək. Çünki hakimlər hələ zərərçəkmişlərin üçdəbir hissəsini dinləməyiblər.

Məhkəmə iclasında ifadə verən zərərçəkmiş Lalə Zaurqızı bildirib ki, 2014-cü ilin iyunun 14-də “Sevil” MMC-nin tikməsi üçün nəzərdə tutulan binadan 77 kvadrat metr ərazisi olan ev alıb. Onun sözlərinə görə, bununla bağlı MMC-yə ilkin olaraq 12 min manat ödəyib. O, pulunu qaytarılmadığını, dəymiş ziyanın ödənilməsini istəyib.

Daha sonra zərərçəkmiş Elxan Məmmədov bildirib ki, MMC-dən 2 sot torpaq alıb və buna görə də 6600 manat ödəyib: “Buna görə qədər də pulum qaytarılmayıb. Əməliyyat olunacam, pulum yoxdur. Pulumun ödənilməsi vacibdir. Çünki əməliyyat olunacam”.

Zərərçəkmişlər hakimdən nə xahiş edir?

Elxan Məmmədov həmçinin bildirib ki, torpaq sahəsi onun həyat yoldaşı Bəsti Məmmədovanın adına rəsmiləşdirilib. Digər zərərçəkən Mirzəmməd Əhmədzadə qeyd edib ki, 4 sot toqpaq sahəsi alması barədə MMC-nin rəhbər şəxsləri ilə müqavilə bağlayıb: “Buna görə də MMC-yə 13 min manat ödəmişəm. Torpağın pulunu ödəyəndən sonra ev tikməyə başlamışam. Torpağın alınması və yarımçıq tikiliyə ümumilikdə 34 min manat xərcim çıxıb. Amma torpağın alınması və yarımçıq tikili ilə birlikdə 19 min manat qiymətləndirilib. Bu da düzgün deyil”.

Şahin Əzizov sot torpaq sahəsi almaq üçün 5185 manat ödədiyini, amma pulunun geri qaytarılmadığını qeyd edib. Elçin Mollayev qeyd edib ki, 3 sot torpaq sahəsinin alınması üçün MMC-nin rəhbər şəxsləri ilə 18 min manata razılaşıblar. O, qeyd edib ki, bunun 9500 manatını ödəyib. Zərərçəkmiş pulunun qaytarılmasını istəyib.

Rövşən Abıyev 2 sot torpaq sahəsi almaq üçün 7 min manata razılığa gəldiklərini qeyd edib: “Şirkətə 6450 manat ödəmişəm. Torpağı şirkətdən müqavilə yolu ilə almışam. Başqa hər hansı bir sənədim olmayıb. Torpağda tikinti işləri aparmamışam”.

Etibar Həsənov bildirib ki, MMC-dən iki yer olaraq ayrı-ayrılıqda 2 sot torpaq sahəsi alıb. Onun sözlərinə görə, MMC-yə 21 min manat ödəyib:

“Aldığım torpaqların üzərində tikinti işləri aparmışam. Tikintiyə də 37 min 645 manat xərcləmişəm. Torpaq sahəmin geri qaytarılmasını istəyirəm”.

İsa Manafovun sözlərinə görə, oğlu Təbrikin adına MMC-nin tikiməsi üçün nəzərdə tutulan binadan mənzil alıb. O, qeyd edib ki, bununla bağlı olaraq MMC-yə ilkin olaraq 13 min 173 manat ödəyib: “Mənə dəymiş ziyan ödənilməyib. Mənim üçün fərqi yoxdur ki, ev, ya torpaq verilsin. Mənə dəymiş ziyanın ödənilməsini istəyirəm”.

Rabil Həbilov bildirib ki, MMC-dən 6 sot torpaq alıb və 19 min 200 manat ödəyib: “Torpağı Daşınmaz Əmlakın Dövlət Reyestri Xidmətinin çıxarışı əsasında almışam. Həmin ərazidə tikinti işləri aparmışam, buna görə də tikiliyə xeyli pul xərcləmişəm. Sonradan məni Hökməli bələdiyyəsinə çağırdılar. Orada çıxarışı əlimdən aldılar və mənə torpağa verdiyim pulu qaytardılar. Amma tikiliyə xərclədiyim pul bu günə kimi də qaytarılmayıb”.

Digər zərərçəkənlər – Nəzakət Aydınova torpaq alması üçün 29000 ABŞ dolları, Mübariz Kərimov 8400 manat, Heyzəgül Cabbarova 6000 manat ödədiklərini qeyd ediblər.

Eldar Mahmudov və Akif Covdarov planı

Onu da qeyd edək ki, daha sonra keçirilən proseslərdə ümumlikdə 100-dən çox zərərçəkmiş ifadə verib. Hələ məhkəmə araşdırması zamanı zərərçəkənlərin yarısı belə dindirilməyib. 6 aydır ki, davam edən bu proses belə getsə, hələ çox uzun çəkcək.

Bundan başqa, “Sevil Massivi”ndə baş verənlərlə bağlı maraqlı məqam ortaya çıxıb. Redaksiyamıza daxil olan məlumata görə, bu cinayət işinin başlanmasına səbəbkar sabiq milli təhlükəsizlik naziri Eldar Mahmudov və onun “kassir”i kimi cəmiyyətə tanınan Akif Covdarov olub. İddia olunur ki, Eldar Mahmudov Akif Covdarovun vasitəsi ilə “Sevil Massivi”nin ərazilərini ələ keçirmək istəyib.

“Sevil Massivi” ilə bağlı cinayət işinin başlanması barədə sifarişin də Eldar Mahmudov tərəfindən gəlməsi iddia edilir. O da qeyd olunur ki,

Eldar Mahmudov həmin ərazilərdə öz tikinti şirkəti vasitəsi ilə evlər tikmək istəyirmiş. “Sevil Massivi”nin vəzifəli şəxslərinin məhkəmədə susması, ifadə verməməsi onlara qarşı yüksək çinli məmurlar tərəfindən təzyiqlərin olmasını işarə etmişdilər. Hər halda bütün bu məsələlər məhkəmə araşdırması zamanı öz həllini tapmış olacaq.