gundemxeber.az xəbər verir ki, Vətəndaş və İnkişaf Partiyasının sədri Əli Əliyev keçmiş müdafiə naziri Səfər Əbiyevin Çexiya Respublikası vətəndaşlığı almasıyla bağlı mətbuatda yayılmış xəbərə sərt reaksiya bildirib:

"Mətbuatda keçmiş Müdafiə nazirimiz Səfər Əbiyevin Çex Respublikasının vətəndaşı statusu alması xəbəri yer alıb. Təəssüf olsun ki, məlumat sıradan olan hadisə kimi yayılır. Belə ciddi xəbər daha yaxşı olardı ki, geniş təhlil edilərdi. Məsələnin hərbi təhlükəsizlik, maddi, mənəvi və s. tərəfləri dövlətçilik baxımından mühümdür.
Normal dövlətlərdə nəinki müdafiə naziri kimi strateji vəzifə daşımış şəxslərin, hətta dövlət sirrlərinə çıxışı olan yüksək və orta zabit heyəti belə qulluqdan uzaqlaşdıqdan sonra, azı 5 il müddətinə ölkədən kənara buraxılmır. Müharibə aparan dövlətin müstəqillik ömrünün 23 ilindən 18 ilini Müdafiə qurumunun başında olmuş bir şəxs, nəinki ölkə hüdudlarını tərk etmək, eyni zamanda başqa ölkə vətəndaşı olmaq arzusunu reallaşdırır. Dövlətə və xalqa azca da sayğısı olan bir şəxs belə etməməli idi. Bunu onun vicdanına buraxaq. Onsuz da vəzifəsinin icrası zamanı onun adı çəkilən dəyərlərə münasibəti bəlli idi. YAP-ın 18 ilə təyin etdiyi 1 saylı əsgərin Çexiyaya sığınmasına fərarilikdən başqa ad vermək olmaz.
Əbiyevin sakit liman axtarışını başa düşdük, bəs iqtidar sahibləri hara baxır? Dövlətin strateji sirrlərinə malik, xüsusən belə qeyri-sabit birisinin kənara qaçmasına şərait yaradılmasını başa düşə bilmirəm. Sovet tərbiyəsi almış belələrinin partizanlığına sadəcə inanmıram. Müntəzir olan Əbiyevlər belə qərarları təkbaşına qəbul etməyə cürət etməzlər. Belə isə, onda belə vacib personanın ölkədən çıxmasını kim sanksiyalaşdırılıb?
Məsələnin digər maraqlı tərəfi seçilən ölkədir. Nəyə görə məhz Çexiya? Bir qədər əvvəl həbsdən çıxan Fərhad Əliyev də Çex respublikasını sığınacaq seçmişdi. Səbəb sadədir. Çexiya keçmiş sosialist düşərgəsi məkanında maliyyə məsələlərində Böyük Britaniya və İsveçrənin təcrübəsini əxz edib. Beləki, orada tətbiq edilən maliyyə nəzarəti, bank və digər sferaların iqtisadi fəaliyyətini tənzimləyən qanunvericilik çirkli pulların təmizlənməsi üçün ideal şərait yaradır. Yəqin eks nazirlərin "təmizlik işlərinə" ehtiyacı var imiş. Praqa keçmiş sosialist ölkələrinin siyasi-iqtisadi miqrasiya paytaxtına çevrilib və bu ölkə pullarına tətbiq tapan eks-lərin sayına görə tədricən qos-qoca Londonu üstələməkdədir.


Məsələnin mənəvi tərəfi də diqqətəlayiqdir. Yəqin ki, keçmiş YAP nazirlərinin Praqaya daşıdıqları vəsait maaşdan yığılan pul deyil, bizdən oğurlanmış vəsaitdir. Heç şübhəsiz ki, Nazirlərin maaşla yaşamamasını, oğurluq etmələrini ölkədə 7-dən 77-yə hamı bilir. Bu oğurluğun qarşısının alınmasının, Əbiyev fəsadına bənzər sindromların ortaya çıxmaması üçün ölkədə maliyyə amnistiyası tətbiq etmək lazımdır. Hamının vəsaiti aşkarlanmalı, toxunulmazlıq almalı və vəsaitin kənara axınının qarşısı alınmalıdır. Keçmiş SSRİ coğrafiyasında daha çox oğurluq baş verən neft ölkələrindən Rusiya və Qazaxstan bu maliyyə əməliyyatını bir neçə dəfə tətbiq ediblər.
Digər mənəvi məqam nazirlərin ideoloji dayanıqsızlığıdır. YAP hələ "at belində"olduğu dövrdə belə nəinki S.Əbiyev və F.Əliyevin, digər səlahiyyət sahiblərinin də müxtəlif ölkələrdəki kapital yatırımı haqda məlumatlar dolaşır. Başqa sözlə yüksək eşelona məxsus məmurların da ayaqları qaçaraqdır. Biz müxalifət olaraq, hakimiyyət komandasını həm də belə dayanıqsızlığa və Dövlətə bağlı olmadıqlarına görə tənqid edirik.
Əbiyev bir nümunədir. Hakimiyyətdən gedən kimi bir çox məmurlar ölkədən qaçacaqlar. Onların əksəriyyəti bu ölkəyə obyekt, varlanmaq məkanı kimi baxır. Onları bizim doğma saydığımız siyasi coğrafiya ilə, yəni Vətənlə biznes münasibətləri bağlayır. Bu münasibətlər bitdikdə Çexiya da onlar üçün vətən mənası kəsb edə bilər, lap ora sığınan nazirlər kimi.
Sonda Milli təhlükəsizlik və Xarici işlər nazirliklərindən məsələyə aydınlıq gətirilməsini və Əbiyevin ölkəyə qaytarılaraq, kənara çıxmasının qarşısını almağı xahiş edirəm."