1 saylı ofisdə görünməmiş təhlükəsizlik tədbirlərinin bu səbəbdən həyata keçirildiyi deyilir; xidmətdən isə xəbərin doğru olmadığı deyilir

1 saylı “Asan xidmət” mərkəzində (Həsən Əliyev 36 ünvanında yerləşən) görünməmiş təhlükəsizlik tədbirləri görülür. Bu haqda “Yeni Müsavat” qəzetinə oxuculardan biri məlumat verib. Onun sözlərinə görə, sözügedən “Asan xidmət” mərkəzinə daxil olmaq istəyən vətəndaşların üst-başı ciddi şəkildə yoxlanır, yalnız bundan sonra içəri buraxılırlar. Bu, “Asan xidmət” mərkəzi yaranandan ilk belə haldır. Vətəndaşlar yoxlamaların səbəbini soruşduqda isə bildirilib ki, burada hər zaman belə yoxlamalar həyata keçirilir.

Ancaq indiyədək “Asan xidmət”ə yolu düşmüş hər bir kəsə məlumdur ki, bu xidmətə giriş-çıxış sərbəst olub, xüsusi təhlükəsizlik tədbiri görülməyib. Məlumatı redaksiyaya verən oxucunun məlumatına görə, təhlükəsizlik tədbirlərinin hansı məqsədlə həyata keçirildiyini araşdırdıqda belə məlum olub ki, təxminən bir həftə öncə ofisdə bıçaqlanma hadisəsi baş verib. Bir vətəndaşın “Asan” əməkdaşı ilə mübahisəsi bıçaqlaşma ilə yekunlaşıb. Zərərçəkən isə “Asan xidmət” əməkdaşının olduğu deyilir. Hadisə mətbuatdan gizlədilsə də, mərkəzdə təhlükəsizlik tədbirləri gücləndirilib.

Redaksiyaya verilən məlumatı dəqiqləşdirmək üçün Daxili İşlər Nazirliyinin mətbuat xidməti ilə əlaqə saxladıq. Ordan bildirildi ki, qurumda bu haqda informasiya yoxdur.

1 saylı “Asan xidmət” mərkəzinin yerləşdiyi Nərimanov rayonunun Polis İdarəsindən də zənglərimizə cavab verən olmadı.

“Asan xidmət” mərkəzinin informasiya təminatı şöbəsinin rəhbəri Anar Hüseynov bildirdi ki, mərkəzdə yoxlama tədbirləri artıq bir neçə aydır ki, davam edir və bıçaqlanma hadisəsi ilə bağlı xəbər həqiqəti əks etdirmir: “Bu tədbir sadəcə təhlükəsizlik məqsədilə həyata keçirilir. Çünki gün ərzində 2000-dən artıq vətəndaş “Asan xidmət”ə müraciət edir. Bu yoxlama tədbirləri bizdə bir neçə aydır tətbiq olunur və “Asan xidmət”in bütün mərkəzlərində eyni qaydada aparılır. Bizim mərkəzlərdə insanların üzərində metal əşya olub-olmamasını yoxlayan cihaz quraşdırılıb və bu işi mərkəz əməkdaşları deyil, Daxili İşlər Nazirliyinin Baş Mühafizə İdarəsinin əməkdaşları həyata keçirir. Ancaq hansısa vətəndaşın “Asan xidmət” işçisini bıçaqlaması ilə bağlı xəbər həqiqəti əks etdirmir və belə bir hadisə baş verməyib”.

Nərgiz Liftiyeva