Vidadi İsayev və müavini, mətbuatın tənqidlərindən qorumağın yeni yolunu tapıblar
Bərdənin icra başçısı Vidadi İsayev hazırda rəhbərlik etdiyi rayonda təkcə sahibkarları deyil, həm də idarə müdirlərini intihar həddinə çatdırıb.

Bu barədə “Gündəm Xəbər”ə daxil olan məlumata görə, icra başçısı elə bir vəziyyət yaradıb ki, heç bir idarə müdiri Vidadi İsayevin qanunsuz «aylıq hesab» tələbindən kənara çıxa bilmir. Əks halda, icra başçısının məmurları döyməklə ad çıxaran müavini Vidadi İmanquliyevin zərbələrinə tuş gələ biləcəklərindən ehtiyat edirlər:

«Yəqin ki, bu Vidadi İmanquliyevi yaxşı xatırlayırsınız. Bu o adamdır ki, onun qanunsuzluğuna görə 19 aprel 2011-ci ildə rayonun Qasımbəyli kənd sakini Cəmaləddin Paşayev uşaqlarının gözü önündə özünə od vurub, intihar etdi. Həmin vaxtı raayonun Əmək və Əhalinin Sosial Müdafiə mərkəzində direktor işləyən Vidadi İmanquliyevlə dalaşan Cəmaləddin Paşayaev, öz həyətində körpə uşaqlarının gözü önündə üstünə benzin tökərək həyatına son qoydu. O zaman ölkə mətbuatının da gündəmində olan bu hadisə ilə bağlı Cinayət Məcəlləsinin 125-ci maddəsi ilə (özünü öldürmə həddinə çatdırma» ilə cinayət işi açılsa da, Vidadi İmanquliyevə nəinki söz deyən oldu, hətta icra başçısı onu özünə müavin təyin elədi. Hazırda da o, başçının müavini və İcra Haakimiyyətində sosial-iqtisadi inkişafın təhlili və proqnozlaşdırılması şöbəsinin müdiri vəzifəsində işləyir. İcra başçısının bu müavinə xüsusi qayğısının da özəl səbəbləri var. Bunun mövzumuza dəxli olmadığından təfərrüatlara toxunmuram. Amma bilməyiniz vacibdir ki, Vidadi İmanquliyev də, icra başçısı Vidadi İsayevin «Boss» deyə xitab etdiyi şəxsin himayəsindədir. Həmin «Boss» deyilən şəxsin ən kiçik tapşırığı isə, bu iki adam üçün hətta Prezident Administrasiyasından gələn tapşırıqdan da önəmli sayılır».

Müsahibimiz deyir ki, Vidadi İsayev və adıçəkilən müavini son üç il ərzində, əslən Bərdəli olan məmurların günlərini qara gətiriblər: «Vəziyyət o həddə çatıb ki, icra başçısının 1-cvi müavini Vahid Qarayevin kurasiyasında olan bir çox müşkil məsələlərin “həlli” də, Vidadi İmanquliyevə həvalə olunub. O isə Vidadi İsayevin «Qara kassa»sı rolunu ustalıqla oynayır. Hazırda Bərdədə idarə və müəssisələr, büdcədən ayırmalar və gəlirlərinə uyğun olaraq hamısı «hesab»a oturdulub. Bu barədə bəzi xəbər portallarında da məlumat yayılıb. Ancaq görünən odur ki, Vidadi İsayev bunlardan nəticə çıxarmayıb. Tam əksinə, aydan-aya qanunsuzluqlarını daha da genişləndirir».

Vidadi İsayevin rayonun vəzifəli məmurlarını «yükləməsi»nə dair hələ iki il əvvəl, daha dəqiqi, Novruz bayramı ərəfəsində icra hakimiyyətində dava düşdüyünü xatırladan müsahibimiz yaşananları belə izah edib:
«Həmin vaxtı Vidadi Isayev rayon rəhbərliyi ilə keçirilən müşavirədə, 4 kəndin alaqapısını təmir etməyi rayonun mədəniyyət və turizm idarəsinin müdiri Soltan Həsənova tapşırıb. Soltan Həsənov icra başçısının bu tapşırığına etiraz edib. Mübahisə o hədə çatıb ki, icra başçısı idarə müdirindən ərizəsini yazıb işdən çıxmağı tələb edir. Ancaq Soltan Həsənovun sərt cavab verərək, hətta ondan abadlıq işləri üçün 200 min manat pul aldıqlarını uca səslə bəyan edib. O, bunu həmin ərəfədə mətbuata müsahibəsində də təsdiqləmişdi. Və bu mübahisə zamanı Vidadi İsayevin ona kəllə atdığını da etiraf etmişdi.

Bu hadisədən sonra isə Soltan Həsənovu vəzifəsi ilə vidalaşmağa məcbur etdilər. Yəni sözüm bundadır ki, həmin vaxtdan idarə müdirlərinin müqaviməti qırıldı. Və onların hamısı Vidadi İsayevin «aylıq hesab» siyahısına əməl etməyə başlayıblar. Bu gün Bərdədə elə idarə müdiri var ki, bu haqsız tələb qarşısında nə zamansa həbsxanaya düşəcəyini də dilə gətirməkdən çəkinmir. Amma təbii ki, Vidadi İsayev üçün kimin türməyə, kimlərin ailələrinin ağlar günə düşməsinin heç bir əhəmiyyəti yoxdur. Əksinə, Vidadi İsayev və müavini Vidadi İmanquliyev yeni planlar üzərində xəyallar qururlar. Hətta rayonda belə söhbətlər gəzir ki, Vidadi İmanquliyev tezliklə ya Oğuz, ya da Samux rayonlarından birinə icra başçısı göndəriləcək».

Məlumatlı şəxs deyir ki, icra başçısı son vaxtlar özünü qorumaq üçün yeni metodlara əl atıb: «İcra başçısı və onun adaşı əsasən mətbuatın diqqətindən yayınmaq üçün maraqlı üsula əl atıblar. Onlar mətbuatda olan bir neçə şəbəkə ilə anlaşaraq, barələrində gedən tənqidi materialların qarşısını almağa başlayıblar. İcra başçısı bununla kifayətlənməyib. O və müavini həmin şəbəkəyə rayonda keçirilən tədbirləri «bəzəyərək» əksər media qurumlarının ünvanlarına göndərilməsini tapşırıblar. Onlar bununla özləri haqqında müsbət görüntü yaratmaq istəiyrlər. Çünki Vidadi İsayevin əməlləri artıq Prezident Administrasiyası tərəfindən də nəzarətə götürülüb. O isə vəziyyəti daha da gərginləşdirməmək üçün «gözdən yayınmaq» istəyir. Bunun üçün də məttbuatın hədəfindən gizlənmək ən əlverişli fürsət hesab olunur».

Cəfər Mərdanoğlu