Əskipara kəndindən olan köçkünlərin şikayətinə baxan yoxdur

Qazax rayonu Əskipara kəndindən olan məcburi köçkünlər Nazim Həsənov və İnqilab Vəliyevin problemləri həll olunmadığından, təkrar “Gündəm Xəbər”in elektron poçtuna şikayət məktubu göndəriblər. Əskipara həsrətli soydaşlarımız bildirirlər ki, torpaqları işğala məruz qaldıqdan sonra, Qazax rayonunun mərkəzində yerləşən idarə və müəssisələrinin yardımçı binalarında məskunlaşdılar.
Aidiyyəti qurumlara ünvanlanan şikayətlərdən sonra, Qaçqın və Məcburi Köçkünlərlə iş Üzrə Dövlət Komitəsinin vəsaiti hesabına, Qazax rayon “Su -15”də Nərimanov adlı qəsəbə salındı və 60 ailə üçün nəzərdə tutulan 2 otaqlı mənzillər də tikilərək istifadəyə verildi.
Məcburi köçkünlərin sevinci çox çəkmir. Buna səbəb o olur ki, müəyyən vaxt keçdikdən sonra evlərin divarlarında dərin çatlar əmələ gəlir. Mütəxəssislərin rəyinə görə, həmin çatlar, mənzillərin keyfiyyətsiz tikintisinin göstəricisidir. Görünür tikintiyə ayrılmış inşaat materialları məsul şəxslər tərəfindən mənimsənilib. Nəticədə tikilmiş evlər qəzalı vəziyyətə düşür. Yay vaxtlarında ərazidəki ilanlar (gürzə, yatağan) evlərin divarında əmələ gəlmiş çatlarda məskən salır. Zəhərli ilanların özü də təhlükə mənbəyidir. Sakinlər yayda rayon Sanitar Epidemioloji Stansiyasından ilanlara qarşı dərmanlar alıb çatlara səpsələr də, elə bir əhəmiyyəti olmayıb.
Sakinlər tərəfindən dəfələrlə təmir işləri aparılsa da, çatların qarşısını almaq mümkün olmamışdır. İnşaatçı-mütəxəsislərin dediyinə görə, binaların özülü (himi) dəmir-almatur konsturuksiyalarla qurulmadığından, belə bir təhlükəli vəziyyət yaranmışdır. Bundan əlavə inşaatçılar ərazini ağır texnikanın köməyi ilə hamarlayaraq, tikintini özülsüz davam etdiriblər.
Şikayətçilər bildirir ki, evlərdə yaşamaq olduqca təhlükəlidir. Bundan başqa mənzillərin tavanı ağır beton pilitələrlə örtüldüyündən, çat divarlar yükgötürmə qabiliyyətini itirdiyindən evlərin uçma təhlükəsi hər an gözləniləndir.
Bu səbəbdən də, ailələr gecələr səksəkə içərisində yatırlar. Evləri uçma təhlükəsində olanlar dəfələrlə Qazax rayon İH başçısına, Qaçqın və Məcburı Köçkünlərlə iş üzrə Dövlət Komitəsinə və ölkə prezidentinə şikayət etmişlər.
Qazax rayon İH başçısı Ayaz Əsgərov problemin onlara aid olmadığını bildirir.Başçının dediyində bir həqiqət də var ki, qəsəbə onun təyinatından əvvəl salınıb.
Şikayətçilərin dədediyinə görə, qəzalı evlərin təmiri ilə “Qaçqınkom” məşğul olmalıdır. Qaçqın və Məcburı Köçkünlərlə iş Üzrə Dövlət Komitəsi isə məsuliyyətdən yayınır. Onların “Qaçqınkoma” yazdıqları şikayət ərizələrinə cavab verilmir.
“Qaçqınkomun” laqeyidliyini özümüzə qarşı qəsd hesab edirik. Qəzalı evlərdə kütləvi insan tələfatı baş verərsə, xəbərdar edilmiş aidiyyatı qurumlar məsuliyyət daşıyacaqlar. Soydaşlarımızın bildirdiyinə görə, ötən ilin əvvəlində Fövqəladə Hallar Naziri cənab Kəmaləddin Heydərov Gəncədə, qərb bölgəsindən olan şikayətçiləri qəbul edərkən, evləri qəzalı olan Mirvari Əmiraslanova və Yunis adlı qəsəbə sakinin şikayətini də dinləmişdir. Şikayət məktubunda bildirilir ki, K.Heydərovun göstərişinə əsasən hər iki şəxsin evi sökülüb və yenidən tikilib. Ancaq bu problemin həlli demək deyil. Qazax rayon Nərimanov qəsəbəsində 2 yox, 60 ailə yaşayır.
20 ildir ki, bizi aldadaraq ilan mələyən səhralarda yaşamağa məcbur edirlər. Torpaqılarımızı azad edib özümüzə qaytarsalar onların heç nəyi bizə lazım deyil, başlarına dəysin. Özümüz gedib ata-baba yurdumuzu bərpa edərik”. Sonda soydaşlarımız bildirirlər ki, “əgər tezliklə qəzalı evlərimiz sökülüb yenidən tikilməzsə, Qazaxdan Bakıya gedib, Prezident Aparatı qarşısında sözümüzü deyəcəyik”.

“Gündəm Xəbər” olaraq problemin varlığını diqqətdə saxlayacağıq.

Şakir Həsənsu