Gənclər arasında yaranan mübahisədə 1 nəfər bıçaqlandı, 1 nəfər həbs edildi

Bakı Apelyasiya Məhkəməsində 1986-cı il təvəllüdlü Samir Qədirovun apelyasiya şikayəti üzrə məhkəmə baxışı başa çatıb. İttihama görə, Samir Qədirov 2014-cü il, iyul ayının 9-da Bakı şəhəri, Nəsimi rayonu, N.Məlikov küçəsi dalan- 6, 11 saylı evin qarşısında ucadan danışıb səs saldığına görə, qonşusu Ceyhun Əhmədovla mübahisə edib.

Mübahisə zamanı Ceyhun Əhmədovun onu əli ilə vurmasından hiddətlənən Samir Qədirov bıçaqla ona zərbə endirib. Ağır dərəcəli bədən xəsarəti almış yaralı, qonşuların köməkliyi ilə xəstəxanaya çatdırılıb. Tibbi yardım göstərildiyindən həyatını xilas etmək mümkün olub.

Törətdiyi cinayət əməlinə görə Samir Qədirova Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham irəli sürülüb və barəsində həbs-qətimkan tədbiri seçilib.Təqsirləndirilən şəxs qismində dindirilən Samir Qədirov, ona elan olunmuş ittihamla özünü təqsirli bilib. Və o, ifadəsində hadisə baş verən gün yaşadığı məhəllədə qardaşı Qədirlə danışıb-güldüyünü göstərib:“Qonşuluqda yaşayan Ceyhun bizə yaxınlaşdı və ucadan danışıb-gülməyimizə iradını bildirdi, eyni zamanda mübahisə də etməyə başladı. Ceyhuna “sən kimsən ki, bizə danışıb-gülmək qadağası qoyursan” dedim. Mənim bu sözlərim onun xoşuna gəlmədi və gözlənilmədən əli ilə başıma şillə vurdu. Ceyhunun bu hərəkəti məni o qədər əsəbləşdirdi ki, evə keçdim və masanın üstündən bıçaq götürərək yenidən həyətə çıxdım. Əlimdəki bıçaqla Ceyhuna bir dəfə zərbə endirdim. Zərbədən sonra Ceyhunun yerə yıxıldığını görüb geri çəkildim”.

Təqsirləndirilən şəxs tutduğu əməldən peşman olduğunu, qonşusunu öldürmək niyyətində olmadığını deyib.Zərərçəkmiş şəxs qismində dindirilən Ceyhun Əhmədov ifadəsində axşam saatlarında bir neçə nəfər şəxsin evin qarşısında ucadan danışıb-güldüklərini eşitdikdə onlara iradını bildirdiyini göstərib:“Qonşuluqda yaşayan Qədir və Samir qardaşlarına iradımı bildirdim. Qardaşlardan biri - Samir mənə kobud cavab qaytardı deyə, aramızda xırda mübahisə yarandı. Əlimlə sifətinə yüngül zərbə vurdum. Samir tələsik həyətə keçib geri qayıtdı. Gözlənilmədən əlində gətirdiyi bıçaqla qarın nahiyəmə zərbə endirdi. Zərbənin təsirindən müvazinətimi saxlaya bilməyib yerə yıxıldım, huşumu itirdim”.

Bakı Ağır Cinayətlər Məhkəməsinin hökmü ilə Samir Qədirov 4 il 6 ay müddətinə azadlıqdan məhrum edilib. Hökmdən narazı qalan Samir Qədirov apelyasiya şikayəti verərək cəzasının yüngülləşdirilməsini istəyib.

Hakim Mirpaşa Hüseynovun sədrliyi ilə keçirilən prosesdə, təqsirləndirilən şəxsin şikayəti üzrə qərar açıqlanıb. Qərara görə, Samir Qədirovun apelyasiya şikayəti qismən təmin edilib və onun cəzası 3 il 6 aya endirilib.