Dövlətin əmlakını mənimsəməklə, külli miqdarda var-dövlətə malik olan Oruc Əhmədova, görəsən rəhbərlik nə vaxt “dur” deyəcək

Şəki rayonunun problemlərindən zaman-zaman bəhs etmişik. Yazıb bildirmişik ki, ölkəmizin Şimal zonasında yerləşən bu rayonun özünəməxsus problemləri, bir qədər də “yumşaq” desək sağalmaz dərdləri var. Amma redaksiyamıza rayonun Oxud kənd sakinlərinin ünvanladıqları şikayət ərizəsini oxuduqca, o halda bilib başa düşdük ki, bu kəndin dərdi tamam uzun, problemləri isə həddən-ziyadə çoxdur.

Mətləbə keçməklə onu vurğulamaq istəyirik ki, Oxud kəndinin çoxsaylı sakinləri kənd icra nümayəndəsi vəzifəsini daşıyan Oruc Əhmədovun əməllərindən şikayətçidirlər. Məsələn, onlar redaksiyamıza ünvanladıqları şikayət ərizəsində bildirirlər ki, “o, 10 il bundan əvvəl rayonun sabiq icra başçısı Nazim İbrahimovun qardaşının (adı Rüfət olub və verilən məlumatlara görə o, bu gün həbsdədir) dəstəyi ilə bu vəzifəyə sahib ola bilib. İşlədiyi müddət ərzində o, saysız-hesabsız qanunsuzluqlara qol qoymuş və haqqını tələb edən sakinlər isə, daim onun hərbə-zorbaları ilə üz-üzə qalmışdır” deyirlər.

17 nəfər kənd sakinin ünvanladıqları şikayət ərizəsində o da bildirilir ki, “Oruc Əhmədov daim vəzifə səlahiyyətlərini aşır, özü üçün var-dövlət qazanmaqla məşğul olur. Kəndin sosial problemləri isə, gündəlik aşıb-daşır”. Onun qol qoyduğu əməllər haqda danışan sakinlər onu da vurğulayırlar ki, “Oruc Əhmədov kənddə məktəb binasının tikintisi üçün ayrılmış sahənin bir hissəsini zəbt etmiş və həmin yerdə mağaza, qumarxana və əyyaşxana da tikmişdir. Bu gün kəndin cavanları həmin ünvana

üz tuturlar və minbir hoqqalara da qol qoyurlar. Düzdür, belə bir ünvanların fəaliyyət göstərmələri icra nümayəndəsinə külli miqdarda gəlir gətirsə də, gənclərin təlim-tərbiyəsinə, sağlam ruhda böyümələrinə olduqca mənfi təsir göstərir” deyirlər. Əslində o, kənddə rəhbərliyi həyata keçirən şəxs olduğundan, gəncləri əxlaqlı yola dəvət etməli, onların təlim-tərbiyəsində iştirak edənlərdən də biri olmalıdır. Amma, şox təəssüflər olsun ki, bu gün Oxud kəndində belə bir addımlar əksinə baş verir.

Sakinlər onu da bildirirlər ki, “kənd icra nümayəndəsi kənddə məişət pozğunlu ilə də məşğul olmaqdan çəkinmir. Bundan əlavə, kənd məktəbinə, uşaq bağçasına, sosial problemlərin həllinə dövlətdən ayrılan vəsaitləri də mənimsəyir. Elə ki, bir kimsə ondan belə bir haqq-hesabların səbəbini soruşur, bu zaman həmin şəxs Oruc Əhmədovun sillə-yumruq zərbələri ilə üz-üzə qalır”. Sakinlərin bildirdiyinə görə “o, bu on il müddətində 150 nəfərə qədər kənd sakinini döymüş, söymüş, təhqir etmiş, hətta həbs də etdirmişdir”. Hələ, bu azmış kimi sakinlər onu da qeyd edirlər ki, “bir neçə il bundan əvvəl 17 yaşlı kənd sakini yoxa çıxıb və gəncin yoxa çıxmasında, kənd icra nümayəndəsinin əli var ki, bu gün də qatilin müəyyən olunmasında, problemin araşdırılmasında o, bilərəkdən maneçilik törədir. Və gəncin valideyinləri kasıb olduqları üçün, bir kimsə də onların haqq səsini eşitmir” deyə vurğulayırlar.

İcra nümayəndəsinin iş fəaliyyəti haqda şikayət ərizəsi ünvanlayan sakinlər bildirirlər ki, “Oruc Əhmədov 10 il müddətində kənd sakinləri üçün əhəmiyyət kəsb edən problemlərin heç birini həll etməyib. Əksinə, problemlərin üstünə yeni problemlər gətirib və özü üçün var-dövlət toplayıb. Məsələn, bu gün onun üç bahalı avtomobili, bir mağazası, bir qumarxanası, bir kombaynı, traktoru, mal-qarası, 100 hektarlarla sahəsi, Bakı şəhərində evləri və.s daha nələri, nələri var deyirlər. İxtisasca baytar olduğunu bildirən sakinlər qeyd edirlər ki, əslində onun baytarlıqdan da anlayışı yoxdur. Yalnız onun anlayışı dövlət əmlakını mənimsəmək,

gözəgəlimli qadınlara sataşmaq, kimlərisə sillə təpik zərbələrinə məruz qoymaqdır” deyə bildirirlər.

Təəccüb doğuran hal odur ki, ölkə rəhbəri keçirdiyi məlum müşavirələrdə həmişə tapşırır ki, hər bir vəzifəli şəxs xalqa xidmət etməli, onun xidmətçisi olmalıdır. Bəs görəsən böyük bir kənddə icra nümayəndəsi vəzifəsini daşıyan Oruc Əhmədovun, yerli sakinlərə göstərdiyi xidmət budurmu? Əgər yerli sakinlər onun əməllərindən zinhara gəliblərsə, kəndin sosial problemləri aşıb-daşırsa, o halda cənab Elxan Usubovu vadar edən səbəb nədir ki, belə bir vəzifə sahibini hələ də vəzifə başında saxlayır? Yəqin ki, belə bir sualın cavabını icra hakimiyyəti səlahiyyətliləri dolğun şəkildə cavablandıra bilərlər. Problemin varlığını diqqətdə saxlayacağıq.

Qarşı tərəfi də dinləməyə hazırıq.

Şakir