Çünki, adı çəkilən rayonun səhiyyə ocaqlarında xəstələrin cibinə girmək, müalicə və müayinə üçün pul tələb etmək, həkimlərdən aylıq haqq almaq, büdcə pullarını mənimsəmək və s. sanki adi hala da çevrilib
Son vaxtlar yerli sakinlərin “Gündəm Xəbər”ə ünvanladıqları müraciətlər içərisində, şəhər və rayonlara rəhbərlik edən şəxslərlə bərabər, digər vəzifə sahiblərinin də əməlləri qabardılır. Yəni, çatdırılan məlumatlarda ayrı-ayrı vəzifə sahiblərinin həyata keçirdikləri idarəçiliyin mahiyyətindən, qol qoyduqları qanunsuzluq əməllərindən və digər problemlərdən bəhs olunur. Məsələn, bir neçə gün bundan əvvəl redaksiyamızı məlumatlandıran mənbə bildirdi ki, “ölkəmizin qərb zonasındakı rayonlardan biri olan Ağstafada, bu gün həyata keçirilən idarəçiliyin xüsusi özəllikləri var.
Ağstafada idarəçiliyin xüsusi özəllikləri var
Çünki, RİH-nin başçısı cənab Məhərrəm Quliyev, hər həftənin birinci, ikinci günləri rayonda, digər günləri isə Bakıda olur və şəhərdəki biznesinin idarəçiliyini həyata keçirir. Baxmayaraq ki, icra strukturunda çalışan vəzifə sahiblərinin bizneslə məşğul olmaları qanunla qadağan olunur, amma o, qanunun belə bir tələbinə heç bir halda məhəl qoymur. İcra başçısının Bakıda olduğu günlər ərzində isə, İH-də idarəetməni onun 1-ci müavini Ramiz Tatarov həyata keçirir. Onu da vurğulamaq yerinə düşər ki, uzun illər ərzində 1-ci müavinlikdən bərk-bərk “yapışan” Ramiz Tatarov, artıq kifayət qədər formalaşmış və lazımi iş təcrübəsi toplayan vəzifə sahiblərindən birinə də çevrilmişdir.
1-ci müavinin imkanları aşıb-daşır

Belə bir səbəblər üzündəndir ki, bu gün onun nəinki rayonun mərkəzi ərazilərində, hətta kənd və qəsəbələrində mağazaları, müxtəlif yönümlü müəssisələri, fermaları, sayı-hesabı bilinməyən var-dövləti və digər daşınmaz əmlakları var”.
Sakinlər Ağstafada yaşanan belə bir xoşagəlməz durumun varlığını, məhz icra başçısının həyata keçirdiyi idarəçiliklə bağlayırlar. Odur ki, onların tam əksəriyyəti real durumla barışmırlar və gündəlik üz-üzə qaldıqları problemlərlə bağlı, yuxarı instansiyalara davamlı şikayətlərini də ünvanlayırlar. Düzdür, Məhərrəm Quliyev icra başçısı təyin olunduğu ilk aylar ərzində özünü olduqca işgüzar, sakinlərin problemlərini həll etməyə çalışan icra başçısı obrazında tanıtmışdı. Amma, vaxt keçdikcə ona bəslənilən ümidlər heçə endi və tam əksəriyyət də dərk etdi ki, rayonun mərkəzi ərazilərini idarə, müəssisə, təşkilat rəhbərlərinin və digər vəzifə sahiblərinin hesabına təmir etdirməklə, heç də uzağa getmək mümkün olmayacaq.
“İşgüzar” icra başçısı ittiham olunur
Əldə etdiyimiz məlumatlara görə o, yerli sakinlərdən biri ilə görüşərkən “mən yüzmin manatlıq avtomobilimin olması ilə fəxr edirəm” kəlməsini də dilinə gətirir. Bu da çox şeyləri söyləməyə əsaslar verir.
Rayon sakinləri onu da bildirirlər ki, icra başçısının belə bir addımlar atmasına səbəb, deyəsən onun daha çox yuxarı dairələrdə vəzifə sahibi olan “daydayı”larına güvənməsi olur. Amma, onu da unutmaq olmaz ki, Məhərrəm Quliyevi Ağstafa RİH-nə başçı vəzifəsinə cənab İlham Əliyev təyin edib. Odur ki, o, ölkə rəhbəri qarşısında cavabdehlik daşımaqla bərabər, eyni zamanda rayonda yaşanan hər cür neqativ amillərin varlığına da, birbaşa cavabdehlik daşıyır.

Rayonda yaşanan acınacaqlı durumla bağlı “Gündəm Xəbər”i məlumatlandıran mənbə onu da bildirir ki, “Məhərrəm Quliyevin qol qoyduğu qanunsuzluq əməlləri, daha çox özünü rayonun səhiyyə sahəsində göstərir. Çünki, xəstəxana daxili mənbənin bildirdiyinə görə, rayonun səhiyyə ocaqlarında mənimsənilən büdcə pullarını baş həkim icra başçısı ilə birlikdə mənimsəyir. Bu yöndə tərəfimizdən apardığımız araşdırmalar zamanı o da bəlli oldu ki, Ağstafanın Mərkəzi Xəstəxanasında büdcə vəsaitləri talan edilir, korrupsiyaya, mənimsəmələrə yol açılır və belə bir addımların başında da, daha çox İlham Mustafayev durur.
Baş həkim qısa zaman kəsiyində hansı imkanlara malik oldu?
“Gündəm Xəbər”in əldə etdiyi məlumatlara görə, İlham həkimin lazımi idarəçilik qabiliyyəti olmadığından, bu gün rayon sakinləri olduqca əziyyət çəkirlər. O, əvvəllər Bakı şəhərində çalışmış və Ağstafa MRX-na baş həkim təyin olunduqdan az sonra, onun təbliğ etdiyi təbliğat o oldu ki, “cənab Nazir mənə etimad göstərdi və Ağstafa səhiyyəsini qaydaya salmaq tapşırığını verdi” deməklə, təbliğatını belə bir yöndə apardı. Belə olan sual oluna bilər ki, əgər rəhbərlik belə bir tapşırıq veribsə, bəs bu gün yaşanan olaylara nə ad vermək olar? Çünki, adı çəkilən rayonun səhiyyə ocaqlarında xəstələrin cibinə girmək, müalicə və müayinə üçün pul tələb etmək, həkimlərdən aylıq haqq almaq, büdcə pullarını mənimsəmək və s. sanki adi hala çevrilib. Ən böyük maxinasiyalar isə, keçirilən tender oyunlarında baş tutur.
İlham Mustafayev büdcə pullarını necə mənimsəyir?
Məsələn, xəstəxanadan verilən məlumatlara görə, İlham Mustafayev xəstəxanaya müxtəlif avadanlıqların alınması adı altında, təkcə ötən il 73 min manatdan çox vəsaiti mənimsəmiş və həmin vəsaitləri də, şəxsi məqsədlərinin həllinə yönəltmişdir. Xəstəxanaya inventarlar almaq məqsədilə mənimsədiyi külli miqdarda pulları isə, həkimlərin ayağına yazaraq onlardan toplamışdır. Rayonun səhiyyə ocaqlarına ərzaq, ləvazimat, dərman preparatları və digər əhəmiyyət kəsb edən avadanlıqlar almaq məqsədilə ayrılan pullar da, müxtəlif yollarla mənimsənilir. Belə bir halların varlığı da, baş həkimin hansı işlərlə məşğul olduğunu, çoxsaylı qanunsuzluqlara qol qoyduğunu göstərir. Adicə bir faktı qeyd edək ki, hələ bir neçə ay bundan əvvəl işıq üzü görən saylarımızda, Ağstafanın səhiyyəsində yaşananlardan bəhs etmişdik. Yazıb onu da qeyd etmişdik ki, İlham Mustafayev baş həkim təyinatından çox keçməmiş Ağstafada ən imkanlı şəxslərindən birinə çevrildi. Məsələn, Qazax rayonunun Ağköynək kəndində cəmi üç ay ərzində inşa olunan və ona məxsus olduğu bildirilən villanın varlığı da, baş həkimin qısa zaman kəsiyində hansı imkanlara malik olduğunu göstərir.
P.S. Hörmətli oxucular! Ölkəmizin qərb zonasında yerləşən Ağstafa rayonunda yaşananlar hər zaman diqqətimizi cəlb etmiş, bu gün də cəlb etməkdədir. Odur ki, növbəti saylarımızda bu rayonun əksər sahələrindən, ələlxüsus səhiyyə, təhsil və digər sahələrində yaşanan acınacaqlı durumun varlığından bəhs edəcəyik. Odur ki, bizi izləyin.
Açıqlamada adı çəkilən hər kəsin mövqeyini dinləyə bilərik.

İlham

gundemxeber.az