Binəqədidə məmurlar 2-ci qrup əlilə zülm edib!

«Vətənini, torpağını, xalqını sevən hər bir Azərbaycan vətəndaşından, vicdanlı insanlardan mənə yaxından kömək etməyi xahiş edirəm».

Bu sözlər 2- ci qrup Qarabağ Müharibəsi əlili Həşimov Eldəniz Yaşar oğlunun «Gündəm Xəbər»ə göndərilən şikayət məktubunda yer alıb.

Qarabağ əlili bildirir ki, torpaqlarımızın azadlığı uğrunda gedən döyüşlərdə vuruşub, əlil olub. Ancaq məmurlar ona zülm verirlər: «Qarabağ uğurunda döyüşməyimlə fəxr edirəm, qürur duyuram. Vətənimə, elimə-obama canım qurban. Ancaq vətənin torpaqlarının azadlığını yox, başqasının qanunu torpağını satıb mənimsəməyi düşünən bəzi saxtakar vəzifəli şəxslər var ki, 1 ildir mənə zülm verirlər. Belə ki, Bakı şəhəri Binəqədi bələdiyyəsindən 20 sentyabr 2007-ci il tarixdə 561 saylı qərarlaa 600 kvadrat metr ölçüdə fərdi yaşayış evinin tikintisi üçün torpaq sahəsi aldım. Həmin torpaq sahəmin təxminən 50 metrliyində möhtəşəm villalar var ki, onların 3 metrliyindən yüksək gərginlikli elektrik xətti keçir. Həmin villaların sahbləri küllü miqdarda pul verib elektrik xəttinin yerini dəyişdirtdirərək, 50 metr qarşı tərəfə, yəni mənim torpaq sahəmin üzərinə yerləşdirdilər. Sizə təqdim etdiyim fotolarda tam aydın görünür ki, yüksək gərginlikli elektirik xəttinin əvvəlki yeri, yerdəyişmə vaxtı göstərilib. Bütün bu proseslərin fotosunu çəkmişik. Bunu əsas gətirən Binəqədi bələdiyyəsi mənə verilmiş torpaq sahəsinin qanunsuz olduğunu bildirir. Buna görə də mən torpağıma reyestr çıxarışı ala bilmirəm, üzərində tikinti apara bilmirəm. Bundan əlavə, mənə bunun əvəzində başqa yaxın ərazidən torpaq sahəsi verilmir. Düz bir ildir ki, süründürməçiliyə məruz qalmışam. Qəbullara getmişəm, ancaq tədbir görülməyib. Deməli kimin pulu, imkanı varsa, başqasının haqqına girib, istədiyini edə bilər?

Mən bu rüşvətxor, saxtakar vəzifəli şəxslərin qanunsuz əməlləri barədə Prezident cənab İlham Əliyevə, Mehriban xanım Əliyevaya, cənab Ramiz Mehdiyevə, Baş Prokuror cənab Zakir Qaralova, Milli Təhlükəsizlik Naziri cənab Eldar Mahmudova, bələdiyyələrlə iş şöbəsinin rəisi cənab Mehdi Səlimzadəyə, Ombudsman xanım Elmira Süleymanovaya, Binəqədi rayon İcra Hakimiyyəti başçısı cənab Xaləddin İsgəndərova, Binəqədi rayon Prokuroruna və sairə aidiyyatı orqanlara ərizə ilə müraciət göndərib, mənə kömək etmələrini xahiş etmişəm. Əgər mənim qanunu torpağım özümə qaytarılmasa və yaxud eyni ölçüdə mənə başqa ərazidən torpaq sahəsi verilməzsə, mən özümü yandırıb intihar edəcəyəm».

Cəfər