Müdafiə Nazirliyi Səfər Əbiyevin dövründə balansdan çıxarılıb satılan torpaq sahələrini istəyir

Keçmiş nazir Səfər Əbiyevin Azərbaycanın Müdafiə Nazirliyinin balansında olan daşınmaz əmlakların bir hissəsinin tərəfindən balansdan çıxarılaraq, mənimsənilməsinə şərait yaratmasına qarşı yeni rəhbərliyin mübarizəsi davam edir.

Bu barədə «Gündəm Xəbər»ə verilən məlumata görə, Zakir Həsənov nazir təyin edildikdən sonra təcə ordunun döyüş qabiliyyətini artırmaq istiqamətində deyil, həm də ordunun maddi-texniki bazasının möhkəmləndirilməsi, əsgər və zabitlərin sosial problemlərinə diqqəti artırıb: «Nazir Zakir Həsənov bu məqsədlə keçmiş rəhbərliyin dövründə Müdafiə Nazirliyinin balansında olan daşınar və daşınmaz əmlaklarla bağlı daxili təftiş aparmaq əmri verilib. Bu zaman aydın olub ki, təkcə Bakı şəhərinin hüdudlarında nazirliyin balansında olan xeyli obyektlər və torpaq sahələri çıxarılaraq, ayrı-ayrı fiziki şəxslərə satılıb. Maraqlı burasıdır ki, Səfər Əbiyev və onun yaxın ətrafı bu prosesi Kərəm Həsənovun rəhbəri olduğu Əmlak Məsələləri Dövlət Komitəsinin yaxından iştirakı ilə həyata keçiriblər. Yəni Müdafiə Nazirliyinin keçmiş rəhbərliyi həmin əmlakların balansdan çıxarılmasına etiraz etmədiyini göstərən rəsmi sənəd veriblər. Komitə isə bunun əsasında həmin əmlakların ayrı-ayrı adamlara satılmasını həyata keçiriblər. Deyə bilərəm ki, söhbət ümumilikdə hektarlardan gedir».

Məlumata görə, Müdafiə Nazirliyinin yeni rəhbərliyi aparılan təftişin sonu olaraq balansdan çıxarılaraq talan edilən əmlakların geriyə qaytarılmasına start verib: «Bu məqsədlə nazirlik ayrı-ayrı əmlaklarla bağlı Əmlak Məsələləri Dövlət Komitəsini də məhkəməyə verib. Hazırda Azərbaycan məhkəmələrində bununla bağlı bir neçə iş var».

Məhkəmədə olan işlərdən biri haqda məlumatı bizimlə bölüşən mənbənin sözlərinə görə, Müdafiə Nazirliyi Əmlak Məsələləri Dövlət Komitəsinə qarşı torpaq sahəsinin balansa yenidən qaytarılması məqsədiylə iddia qaldırıb.

Mənbə məhkəmələrin çıxardığı qətnamələrə istinadən deyir ki, Səfər Əbiyevin dövründə satılan torpaq sahəsinin geri qaytarılmasını mümkünsüz hala gəlib: «Çünki Zakir Həsənovun geri qaytarmaq istədiyi ərazilərin böyük hissəsi ayrı-ayrı fiziki şəxslərə satılıb. Onlar da həmin əraziləri özəlləşdirib, yerlərin də iri obyektlər və ya yaşayış evləri tikiblər. Məhkəmə də qanunun vətəndaşın əleyhinə geri olmadığı əsasını gətirərək, iddiaları təmin etmir. Bu isə Zakir Həsənovun planlarını əngəlləyir».

Cəfər