Gömrükçülərin həbs etdiyi Gürcüstan vətəndaşı təyin edilmiş cəzadan narazı qaldığını bildirdi

Şirvan Apellyasiya Məhkəməsində İrandan Azərbaycana külli miqdarda narkotik vasitə keçirməkdə ittiham olunan Gürcüstan vətəndaşı Bafalı Hüseynovun cinayət işi üzrə məhkəmə prosesi başa çatıb.

İttihama görə, Astara Gömrük İdarəsinin sərnişin şöbəsində İran İslam Respublikasından piyada yolla Azərbaycana gələn Gürcüstan vətəndaşı Bafalı Hüseynov gömrük nəzarətindən üzərinə baxış keçirilib. Baxış

zamanı ona məxsus sellofan paketdə, cəmi 6 ədəd bükümdə, ümumi xalis çəkisi 47,763 qram olan narkotik vasitə - heroin, 1 ədəd bükümdə xalis çəkisi 36,094 qram olan narkotik vasitə - tiryək və 1 ədəd bükümdə isə xalis çəkisi 14,980 qram olan psixotrop maddə - metamfetamin aşkar olunub.

Müəyyən olunub ki, Bafalı Hüseynov İran İslam Respublikası ərazisində şəxsiyyəti müəyyən edilməmiş şəxslərlə narkotik vasitələrin satışını təşkil etmək üçün cinayət əlaqəsinə girib. O, İran vətəndaşlarından əldə etdiyi narkotik vasitəni Azərbaycana gətirib.

Bafalı Hüseynov Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən narkotik vasitələrin qaçaqmalçılığı, təkrar törətmə), 234.4.1 və 234.4.3-cü (qabaqcadan əlbir olan bir qrup şəxs tərəfindən külli miqdarda narkotik vasitələri əldə etmə, daşıma, saxlama və ya satma, təkrar törətmə) maddələri ilə ittiham edilib və Lənkəran Ağır Cinayətlər Məhkəməsinin hökmü ilə 8 il müddətinə azadlıqdan məhrum edilib. Hökmdən narazı qalan Bafalı Hüseynov apelyasiya şikayəti verərək cəzasının yüngülləşdirilməsini istəyib.

Hakim İsmayıl Əhmədovun sədrliyi ilə keçirilən prosesdə ifadə verən Bafalı Hüseynov bildirib ki, 27 fevral 2014-cü ildə İranın Astara şəhərində alver məqsədi ilə olarkən Nadir adlı iranlı ilə tanış olub: “Bir neçə gün Nadirin evində qonaq qalmışam. Həmin günlərdə Nadir mənə narkotik vasitələr alveri ilə məşğul olduğunu bildirdi və Bakı şəhərində yaşayan tanışına narkotik vasitələr aparmağımı təklif etdi. Nadirin təklifi ilə razılaşdım və martın 7-də Nadir yanımda özündəki narkotik vasitələri 3 ədəd biskvit məmulatının içərisinə, ketçup məmulatı olan şüşə qablara və sellofan paketə yerləşdirdi. Həmin narkotik vasitə yerləşdirilmiş qabları əl yüklərimin içərisində gizlətdim. Elə həmin gün, saat 17 radələrində İran sərhədindən keçərək Azərbaycanın Astara Gömrük İdarəsinin sərnişin şöbəsinə daxil oldum. Gömrük əməkdaşı soruşduqda, üzərimdə qanunla qadağan edilmiş, gömrük nəzarətindən gizlədilmiş malların, həmçinin narkotik vasitələrin, psixotrop maddələrin olmadığını bildirdim. Bundan sonra gömrük əməkdaşları hal şahidlərini dəvət edərək yüklərimə baxış keçirdilər. Bu zaman onlar arasında gizlətdiyim 3 ədəd biskvit məmulatının, ketçup qabının içərisində və sellofan paketə yerləşdirilmiş narkotik vasitələri aşkar etdilər”.

Bafalı Hüseynovun sözlərinə görə, həm ibtidai istintaq zamanı, həm də birinci instansiya məhkəməsində işinə baxılarkən hüquqları kobud şəkildə pozulub. O, bildirib ki, vəkili tərəfindən dəfələrlə verilmiş vəsatətlərdə istintaq zamanı hüquqlarının pozulmasını sübut edən əsaslar göstərilməsinə baxmayaraq məhkəmə prosessual hüquq normalarını pozaraq bu əsasları araşdırmayıb: “Bu isə beynəlxalq hüquq normalarına tam şəkildə ziddir. Avropa İnsan Hüquqları Konvensiyasının 6-cı maddəsində ədalətli məhkəmə araşdırması hüququ hakimlər tərəfindən nəzərə alınmayıb. Birinci məhkumluğum, ailə vəziyyətim, cinayəti bilmədən törətməyim kimi yüngülləşdirici hallar cəza təyin edilərkən nəzərə alınmayıb. Bu isə hüquqlarımın kobud şəkildə pozulması deməkdir”.

Bafalı Hüseynov qeyd edib ki, Lənkəran Ağır Cinayətlər Məhkəməsinin hökmü ləğv edilməlidir. O, barəsində Cinayət Məcəlləsinin 62-ci maddəsi tətbiq edilməklə daha yüngül cəza təyin edilməsini xahiş edib.

Daha sonra dövlət ittihаmçısı Səyavuş Sadıqov deyib ki, Bafalı Hüseynovun nаrkоtik vаsitəni İrаndаn sаtmаq üçün gətirib. Onun sözlərinə görə, məhkumdan götürülmüş nаrkоtik vаsitə hеrоin və tiryək şəхsi istеhlаk miqdarından dəfələrlə аrtıq оlub. Dövlət ittihаmçısı аpеlyаsiyа şikаyətində sаdаlаnаn yüngülləşdirici hаllаrın cəza təyin edilərkən birinci instаnsiyа məhkəməsi tərəfindən kifаyət qədər nəzərə аlındığını, həmin hаllаrın оnun bаrəsində Cinayət Məcəlləsinin 62-ci mаddəsinin tətbiq еdilməsi və Bafalı Hüseynovun bаrəsində çıхаrılmış hökmün dəyişdirilməsi üçün əsаs оlmаdığını deyib.

Bafalı Hüseynovun vəkili Pənah Məmmədov bildirib ki, müdafiə etdiyi şəxsin barəsində Cinayət Məcəlləsinin 206.3.2-ci maddəsinin tərkibinin olmayıb. Vəkilin sözlərinə görə, Bafalı Hüseynovun qaçaqmalçılıq cinayətini iştirakçılıqla törətməsi barədə heç bir sübut yoxdur. O, müdafiə etdiyi şəxsin apelyasiya şikayətinin təmin edilməsini xahiş edib. Tərəflərin fikirlərini öyrənən hakim heyəti sonda Bafalı Hüseynovun apelyasiya şikayətinin qismən təmin edilməsi barədə qərar açıqlayıb. Qərara görə, onun cəzası 7 ilə endirilib.