Şirkət 1000 nəfər işçisini çıxarmalı olub, işsizlər ordusu etiraz aksiyalarına başlayır; Azərbaycan sosial partlayış ərəfəsində…

Ölkədə manatın devalvasiyası və neftin hasilatının azalması işsizlər ordusu yaradıb. Bütün sahələr üzrə ixtisarlar aparılır. Ölkənin ən çox bu böhrandan əziyyət çəkən təbəqəsi neftçilər olub.

“Gündəm xəbər”ə verilən son xəbərə görə, “Şirvan-oil” kütləvi ixtisarlara getməli olub. Şirkətin mindən çox əməkdaşı işsiz qalıb. Bu isə sosial gərginliyi artıran mühüm səbəbdir. Bu şirkətdən çıxarılanlar başqa yerdə işlə təmin olunmayıb. Əldə etdiyimiz məlumata görə, onların taleyinin necə olacağı da bilinmir. İxtisar olunanlar aksiyalara hazırlaşır.

Ümumiyyətlə, Dövlət Neft Şirkətinin balansında olan idarələrdən bir çox hallarda işçilərin qanunsuz olaraq işdən çıxarılmaları ilə bağlı dəfələrlə mətbuatda məqalələr dərc olunub. Hətta ekspertlər də bu məsələdən narahat olduqlarını bildiriblər.

Çünki bir çox hallarda ekspertlər hətta neft şirkətinə işə götürənlə işə götürülən şəxs arasında əmək müqavilələrinin bağlanmamasına da diqqəti yönəldiblər. Hətta bəzən neft şirkətinə aid idarələrdən işçilərin kütləvi şəkildə ixtisarı baş verir ki, bu da haqlı narazılıqlara səbəb olur və neftçilərin hüquqlarını pozmuş olur.

Qeyd edək ki, neftçilərin hüquqlarının pozulması hallarına ARDNŞ də daxil olmaqla, bütün şirkətlərdə rast gəlmək olur. Bu, qeyd etdiyimiz kimi, əsasən işdən azad olunma ilə əlaqədardır. Xarici şirkətlərdə işçilər layihələr əsasında işləyir və layihə bitdikdən sonra işdən məcburi azad edilirlər.

Köhnə yataqlarda yaradılmış əməliyyat şirkətləri və müştərək müəssisələrdə isə təqaüd yaşına çatmış işçilər təqaüdə göndərilir. "Qarasu OİL", "Şirvan OİL", "Abşeron OİL", "Binəqədi OİL" - bu adları çəkilən neft şirkətlərində işçilərin çoxu məcburi şəkildə, müxtəlif bəhanələrlə işdən azad edilirlər.

Əldə etdiyimiz məlumatlara görə, "Şirvan Oil"da vəziyyət daha acınacaqlıdır. Çünki əldə etdiyimiz məlumatlara görə, "Şirvan OİL"in təhlükəsizlik xidmətində çalışan işçilərin kütləvi şəkildə ixtisarı baş alıb gedir.

Hətta bildirilir ki, kütləvi ixtisarlar aparılmaqla bərabər işçilərin əmək haqlarının aşağı salınması da gündəmdədir. Buna səbəb isə, "Tornado" adlı mühafizə xidmətinin yaradılmasıdır. Bildirilir ki, "Tornado" mühafizə adlı mühafizə idarəsinin rəisi İntizam Yusifov "Şirvan OİL" Birgə Müəssisəsinin Ətraf mühitin mühafizəsi şöbəsinin rəisi Azad Məcidovla yaxın qohumdur.

Buna görə də, "Şirvan OİL"in mühafizə xidmətini ləğv etməklə və işçilərini kütləvi şəkildə ixtisar etməklə "Tornado" mühafizə xidmətinin əməkdaşlarını bura gətirməyə hazırlıq gedir.

Onu da deyək ki, Şirvan şəhərində fəaliyyət göstərən "Qarasu" Əməliyyat Şirkətində də aparılan ixtisarlar, işçilərin öz hesablarına məzuniyyətə göndərilməsi narazılığa səbəb olub. Ümumilikdə "Qarasu"nun 1297 nəfər işçisi var.

2015-ci ilin yanvar ayının 15-dən başlayaraq Şirvandakı neft mədənlərində işləyən işçilərin 15 faizini öz hesabına məzuniyyətə göndəriblər. Şirvan sakinlərinin çoxunun dolanışıq yeri "Qarasu" və "Şirvan oil" Neft Şirkətidir. Azərbaycanın quru neft yataqlarında fəaliyyət göstərən ən böyük xarici şirkət "Qarasu"dur. Onun sahibi "Global Energy" şirkətinin sahibi Qutseriyevdir.

Şirkətin balansında olan nəqliyyat vasitələrinin 90 faizi icarədədir. Nəqliyyat xərclərini azaltmaqla, heç bir ixtisar aparmadan iqtisadi böhrandan çıxa bilərlər. Amma şirkət rəhbərliyi şəxsi maraqlarını vətəndaşların marağından üstün tutur, yalnız azərbaycanlıları kütləvi şəkildə ixtisar edirlər.