“Qürbətdə deyirdin ki, Zülali vətənim var,

Ensin gözünə qara su, Ağsu talan oldu” !

Hər bir dövlət məmurunun ilk vəzifəsi sahib olduğu postda ona göstərilən etimadı doğrultmaq, dövlətə və xalqa layiqincə xidmət etməkdir. Özünü xalqın birinci xidmətçisi sayan prezidentin komandasında təmsil olunan bir çox məmurların fəliyyətinə nəzər yetirdikdə görərik ki, əslində onların iş prinsipi yalnız şəxsi maraqlarının təmin olunmasına istiqamətlənib. Təsadüfi deyil ki, dövlət qanunları ilə qadağan olunmasına baxmayaraq, əksər məmurlar biznes fəaliyyəti ilə məşğul olurlar. Rayonlarda icra başçılarının fəaliyyəti isə xüsusilə dözülməz şərait yaradıb. Korrupsiyalaşmış məmurlar ordusunun “şıltaqlıqları” xalqda ikrah və qəzəb hissi doğurur.

Haqqında bəlkə də ən çox narazılıq formalaşan icra başçıları içərisində Ağsu rayonuna rəhbərlik edən Ənvər Seyidəliyev ilk pillələrdə qərarlaşıb. Onun fəaliyyəti dövründə Ağsu rayonunun ağ günləri bir xatirəyə çevrilib, ağlıq yalnız rayonun adında qorunub saxlanılıb. 2007-ci ildən öz doğma rayonuna rəhbərlik edən Ə. Seyidəliyevin əməllərinin ağırlığını ağsulular gündəlik həyat tərzlərində hiss edirlər. Rayonda baş alıb gedən sosial problemlər, işsizlik, korrupsiya pik həddə çatıb. Demək olar ki, əksər idarə, müəssisə və təşkilat rəhbərləri icra başçısının yaxın qohumları olduğu üçün onlar istədikləri kimi hərəkət edə bilir, əhalini istismar etməklə məşğul olurlar. Ancaq onların bu özbaşınalığına göz yumulur. Bundan başqa, rayon idarələrinin hamısı rüşvət və korrupsiya içində çabalanır ki, bunlardan da rayon Mərkəzi Xəstəxansını, Sosial Müdafiə Mərkəzini və maliyyə idarəsini xüsusi qeyd etmək lazımdır.

Ağsu rayonunda bütün sahələrdə geriləmələr davam edir. Bir müddət öncə rayon mərkəzinin əsas bir neçə küçəsində aparılan kosmetik işlər də kölgədə qalıb. Çünki rayon İH-nin başçısı Ənvər Seyidəliyevin göstərişi ilə istinad divarlarına vurulan üzlük daşlar da iş başa çatmamış sökülməyə başlayıb. Məlumatlara görə, səbəb də budur ki, başçının bacısı oğlu, ƏƏSM naziri Səlim Müslümov görülən bəzək-düzək işlərini bəyənməyib və işlərin yenidən başlanmasına əmr verib. Əslində isə məsələnin mahiyyətində büdcədən asan yolla pul silinməsinin dayandığı bildirilir.

Rayon əhalisi adi məişət problemlərinin girdabında boğulur. Hər gün istər rayon mərkəzində, istərsə də kəndlərdə elektrik enerjisi fasilələrlə verilir. Gün ərzində işıqlar 4-5 dəfə söndürülür. Bunun bir səbəbi avadanlıqların, yağ açarlarının, dirəklərin və naqillərin çoxdan istifadə müddətini keçməsi ilə əlaqədardırsa, bir səbəbi də xətlərin həddən artıq yüklənməsi ilə bağlıdır. Ağsunun özündə “şəhər-2” adlanan xətt var ki, gücündən 2-3 dəfə artıq obonentlərə xidmət göstərmək məcburiyyətindədir. Bu barədə həmin ərazidə yaşayan sakinlər və sahibkarlar dəfələrlə “Azərenerji” ASC-nin rəhbərliyinə və digər yuxarı qurumlara yazılı və şifahi şikayətlər ediblər, lakin məsələ ilə maraqlanan olmayıb. Camaat öz vəsaiti

hesabına yeni transformator da alıb ki, normal işıqla təmin olunsun, lakin transformator bir ildən yuxarıdır ki, quraşdırılmır. Ağsu EŞ-dən bildirirlər ki, Qəbələ REŞ-in rəhbərliyi buna icazə vermir. Nəticədə əhali tez-tez “yoxa çıxan” 80-100 volt enerjinin ümidinə qalıb.

Kəndlərə işıq dirəkləri ötən əsrin 60-70-ci illərində çəkilib. Həmin dirəklər istifadə müddətini çoxdan keçib. Buna görə də ağsulular tez-tez işıqların “göz vurmasına” bir növ adətkar da olublar.

Rayon daxili yolların vəziyyəti də işıq dirəklərinin taleyindən yaxşı deyil. Məlumatlara görə, Ağsu şəhərinin daxili yollarının əsaslı təmiri üçün ayrılan 800 min manatın yarım milyonundan artğı mənimsənildiyi üçün görülən işlərin keyfiyyətindən ümumiyyətlə danışmağa dəyməz. Bu azmış kimi Ənvər Seyidəliyev kəndlərarası daxili yolların təmir edilməsi adı altında rayonun daxili büdcəsindən 12 saylı Yol İstismar İdarəsinə 600 min manat vəsait ayırıb və həmin vəsaitin taleyi bəlli deyil. Odur ki, rayon daxili yollar dağılır, gündən-günə keçilməz olur.

Sənədlərdə tamamilə “yenidən istifadəyə verilən” rayon yollarının nəsibi isə ayrılan milyonlara rəğmən vurulan yamaqlar olub.

Rayonda hökm sürən sülalə hakimiyyəti artıq tam narazılıq yaradıb. Rayonun problemlərinə tamamilə yabançı olan, şəxsi maraqlarını təmin edən Ə. Seyidəliyev rəhbərliyi Ağsunu dibsiz bir uçuruma sürükləyir. Səlim Müslümov tərəfindən himayə olunan rayon rəhbərliyi isə ölkə qanunlarına məhəl qoymur. Çünki, Ağsuda yalnız sülalə qanunları hökmrandır.

Mustafa