Baş məsləhətçi Pərvin Cabbarlının razılığı olmadan heç bir hakim işi icraata götürə bilməz

Azərbaycan Respublikasının sürətlə inkişaf etməsi haqqında bütün yüksək kürsülərdən ağızdolusu bəhs edilir. Dövlətin əsas sütunlarından sayılan sahələrdə bir ucdan islahatlar aparılır. Yüksək nəticələrin hasil olunub-olunmamasını söyləmək mümkün olmasa da həmin sahələrdə yarıtmaz halların, cəzalandırılan və işdən çıxarılan məmurlar haqqında da vaxtaşırı məlumat alırıq.

Belə yarıtmaz sahələrdən biri də MƏHKƏMƏ sistemidir. Aparılan islahatlara baxmayaraq məhkəmələrdə cüzi dəyişikliklər belə nəzərə çarpmır. Süründürməçilik, vətəndaşları boş-boşuna incitmək və s. hallar demək olar ki, bütövlükdə məhkəmə sisteminə xas olan haldır. Düzdür, vətəndaşların şikayətləri əsasında yoxlamalar aparılır və haqlı olaraq ciddi qanun pozuntularına yol vermiş hakimlər cəzalandırılır. Ancaq heç kim “gözü çıxan qardaşından” öyüd götürüb işində düzəliş etmək fikrində deyil.

Vətəndaşların özbaşınalıqlarla, süni süründürməçiliklərlə üzləşdiyi məhkəmələrdən biri də Abşeron Rayon Məhkəməsidir. Burada çox qəribə bir dolanbac oyunu yaradılıb. İnanmaq çətindir ki, sədrin bu dolanbac oyunundan xəbəri yoxdur.

İddia Ərizəsi burada dəftərxanaya yox, baş məsləhətçi Pərvin Cabbarlının kontoruna göndərilir. İddia Ərizəsinin qaydasını doğru-dürüst bilməyən Pərvin bəy kiçik əmmalarla ərizəni geri qaytartdırır və vətəndaşı get-gələ salır. Səbri olmayan və əsəbləri dözməyən insanlar ya dönüb gedir, ya da vəkil tutub kənara çəkilirlər.

İradəli insanlar isə ərizələrində dönə-dönə düzəlişlər etdikdən sonra Pərvin bəyin ala qapısından keçib məhkəmənin dəftərxanasına daxil olurlar. Dəftərxanada qəbul olunan sənəd sədrə üstü yazdırılandan sonra hər hansı bir hakimə ötürülür və bundan sonra oyunun ikinci raundu başlayır.

Vətəndaşın yaxınını qəbul edən hakim (deyək ki, İlkin Rəcəbov) onu qəbul etməməli olduğunu və yalnız hörmət edərək qəbul etdiyini, sonra üstünə qışqıraraq: “mən səni buradan qova da bilərəm” deməsi ilə görəsən, hansı eyhamlara işarə edir? Sonra ərizəni və sənədləri geri qaytaran hakim düzəlişlər edib gətirməyi tövsiyyə edir. Ərizə düzəlişdirilərək gətirildikdən sonra yenidən Pərvin bəyin hüzuruna göndərilir və dolanbac oyunu aylarla davam edir.

Maraqlı məqam həm də ondan ibarətdir ki, Abşeron Rayon Məhkəməsində Pərvin bəydən başqa məsləhətçilər dəstəsi də fəaliyyət göstərir. Onların Pərvin bəylə nə qədər əlaqəli işləyib-işləməməsini deyə bilməyən vətəndaşlar oranı sadəcə “Şaraşkinin kontoru” adlandırırlar.

Dəqiq bir məsələ ilə bağlı araşdırma apararkən özünü məsləhətçi adlandıran Aynur xanımın dediyinə görə İddia Ərizəsində yazılanlar hakim (yəni İlkin Rəcəbov – Ə.A) üçün maraqlı deyil. O, bunu bəlkə də oxumur, heç oxumağa marağı da yoxdur. Əsas məsələ iddiaçının ərizənin sonunda nə istədiyini aydın göstərməsidir.

Belə çıxır ki, hakim(lər) nəyi isə aydınlaşdırıb araşdırmaq marağında deyillər. Necə ki, Abşeron Rayon Məhkəməsinin hakimi İlkin Rəcəbov konkret fakt üzrə bunu eləmək istəmir. Çünki Pərvin bəyin razılığını almayıb.

Aynur xanımın dediklərindən o da bəlli oldu ki, hakim (özünə əziyyət verməmək üçün) ərizənin sonunda sırf olaraq qanunda göstərilən cümlələrin eynisini görmək istəyir. Belə olan halda ədaləti bərpa etmək üçün kim araşdırma aparmalıdır? Hər şey qanunlarda yazılan kimi olsaydı hakim – məhkəmə sisteminə nə ehtiyac qalırdı?

Başqa məsləhətçilərin bildirdiyinə görə Abşeron rayon məhkəməsinə üz tutan vətəndaşların əlli faizi (yəni tən yarısı – Ə.A) sonradan məhkəmənin özündən şikayətçi olur və onlar (yəni hakimlər və məhkəmədə məsləhətçi işləyənlər – Ə.A) artıq buna öyrəncəlidirlər. Bu münasibət özü məhkəmədə anarxiyanın hökm sürməsindən xəbər vermirmi? Haqqı, ədaləti bərpa etmək üçün məhkəməyə üz tutan vətəndaş, nədən məhkəmənin özündən şikayətçi düşsün?

Əli bəy Azəri