"Aprelin 5-də özünü "Demokratik Qüvvələrin Milli Şurası" adlandıran qurumun Yasamal rayonundakı "Məhsul" stadionunda Bakı Şəhər İcra Hakimiyyəti ilə razılaşdırılmış mitinqi keçirilib".

Bu barədə Bakı Şəhər Baş Polis İdarəsindən (BŞBPİ) verilən məlumatda deyilir.

Məlumata görə, saat 15:00-dan 17:00-dək davam edən toplantıda həmin quruma daxil olan ayrı-ayrı partiyaların, bir sıra müxalifətyönümlü qeyri-hökumət təşkilatlarının və bəzi radikal dini qrupların 500 nəfərədək olan üzvü və təəssübkeşi iştirak edib.

BŞBPİ-dən o da bildirilib ki, aksiyada ictimai asayişin və hüquq qaydasının kobud şəkildə pozulması hallarına yol verilməyib.

* * *17:04

Aksiya bitəndən sonra polis radikallıq edən mitinq iştirakçısını həbs edib.

Virtualaz.org saytının reportyor qrupu xəbər verir ki, həbs olunan aksiya iştirakçısı polisin çoxsaylı xəbərdarlıqlarına baxmayaraq ölkə rəhbərliyinin ünvanına təhqiramiz şüarlar səsləndirməkdə davam etdiyi üçün saxlanılıb. Qeyd edək ki, mitinqin təşkilatçıları da bundan əvvəl aksiya iştirakçılarına müraciət edərək onları təxribatçı şüarlar səsləndirməməyə çağırmışdı.

* * *16:55

Milli Şuranın sədri Cəmil Həsənli çıxışında bir çox sosial-iqtisadi problemlərə toxundu, hökuməti tənqid etdi, onu islahatlara çağırdı.

C.Həsənli bildirdi ki, bu gün ölkədə kredit böhranı var: "Ölkədə kredit borcu olmayan vətəndaşların sayı çoxdur. Onlar krediti biznes qurmaq üçün yox, ailələrini dolandırmaq üçün götürüblər. Devalvasiyadan sonra isə krediti qaytarmağa vəsait tapmırlar".

C.Həsənli çıxışında hökuməti siyasi məhbusları azad etməyə də çağırdı.

Daha sonra o, növbəti aksiyaların olacağını da bəyan edib müxalifəti həmin mitinqlərdə iştirak etməyə çağırdı. Bununla da aksiya başa çatdı.

* * *16:30

Müxbirlərimiz xəbər verir ki, aksiya zamanı mitinq iştirakçıları razılaşmanı pozaraq fərqli şüarlar səsləndiriblər. Onlar iqtisadi tələblərlə çıxış etmək əvəzinə radikal siyasi xarakterli şüarlar və ölkə rəhbərliyinin ünvanına təhqirlər səsləndiriblər.

Buna görə də Bakı Şəhər Baş Polis İdarəsinin məsul şəxsləri mitinq təşkilatçılarına xəbərdarlıq edib.

Daha sonra söz Milli Şuranın sədri Cəmil Həsənliyə verilib. Hazırda C.Həsənli çıxış edir.

* * *16:10

Gültəkin Hacıbəylidən sonra çıxış edən Milli Şura üzvü Nurəddin Məmmədli ona ayrılmış vaxtı ümumi sözlərlə yola verməyə çalışdı.

Halbuki professor kimi təqdim edilən N.Məmmədlinin iqtisadi siyasətdən, ölkədəki iqtisadi vəziyyətdən danışacağı, konkret faktlar, çıxış yolları göstərəcəyi, təkliflər verəcəyi gözlənilirdi.

Daha sonra isə çıxış üçün söz Milli Şura üzvü Oqtay Güləliyevə verildi. O, çıxışında hökuməti siyasi məhbusları azad etməyə çağırdı.

* * *15:50

Mitinqin aparıcısı aksiya iştirakçılarına məlumat verərək dedi ki, ona verilən məlumata görə, aksiyanın keçirildiyi məkanın yaxınlığındakı çoxmərtəbəli binanın sakinləri etiraz əlaməti olaraq meydana guya kartof-soğan atıblar.

Daha sonra söz keçmiş deputat, bir vaxtlar iqtidarın alovlu tərəfdarlarından olmuş Gültəkin Hacıbəyliyə verildi. O, iddia etdi ki, verilən məlumatlara görə, aksiyaya gəlmək istəyənlər çox olub, amma onlar... gəlməyib.

G.Hacıbəyli də çıxışında neftin qiymətinin düşməyindən, sosial problemlərdən danışdı. Hökuməti təcili iqtisadi islahatlara başlamağa çağırdı.

G.Hacıbəyli dedi ki, hələ də gec deyil: "Azərbaycan hökuməti sosial-iqtisadi, hüquqi, siyasi islahatlara başlamalıdır. Müxalifət də meydanda olmalı və hökuməti bu islahatların həyata keçirilməsinə məcbur etməlidir. Hökumətdən ilk tələbimiz siyasi tələbdir. Siyasi məhbusları azad etmək lazımdır".

* * *15:36

Mitinqin aparıcısı olan AXCP fəalı Əbülfəz Qurbanlı çıxış üçün ilk sözü AXCP sədri Əli Kərimliyə verdi.

Ə.Kərimli hökumətin iqtisadi siyasətinni tənqid edərək bildirdi ki, manatın ucuzlaşması fonunda bir sıra sosial problemlərin daha çox qabardığını söylədi, hökuməti israfçılıq etməməyə çağırdı.

Ə.Kərimli sosial müdafiəyə ehtiyacı olan vətəndaşları düşünməyə çağırdı.

Mitinq iştirakçılarının bir neçə dəfə “İstefa” qışqırmasından vəcdə gələn AXCP sədri daha sonra açıq-aşkar populizmə yuvarlandı və ciddi səhv buraxdı: “Ölkədə sosial problemləri olan insanlar olduğu halda Madridin “Atletiko” klubuna sərmayə qoymaq lazım idimi?”

Amma Ə.Kərimli bir məqamı vurğulamağı unutdu (yaxud da bu, ona sərf etmədi) ki, “Atletiko”ya sərmayəni Azərbaycan hökuməti yox, azərbaycanlı iş adamı Hafiz Məmmədov qoyub. Digər tərəfdən, Çempionlar Liqasında oynayan “Atletiko”ya qoyulmuş sərmayə Azərbaycanın azı 2 milyardlıq auditoriyada effektiv reklamı deməkdir. Halbuki müxalifət özü də hökuməti bir vaxtlar Azərbaycanı xaricdə yetərincə təbliğ etməməkdə ittiham edirdi.

* * *15:21

Virtualaz.org saytının hazırda aksiya məkanında olan müxbirləri xəbər verir ki, saat 15:00-da başlaması nəzərdə tutulan mitinqi hələ başlamayıb.

Təyin olunan vaxtdan 15-20 dəqiqə keçsə də meydana çox az adam toplaşıb. Bununla belə adamlar aksiyaya gəlməkdə davam edir. Polis onların stadiona girişinə heç bir maneə törətmir. Aksiyaya gələnlər meydana xüsusi turniketlərdən keçməklə daxil olur. Onların üstü metalaxtaran cihazla yoxlanır. Heç bir insident qeydə alınmayıb.

Mitinqin təşkilatçıları iştirakçılara müraciət edərək onları qapının ağzında dayanmamağa və meydana toplaşmağa dəvət edir. Mitinq hələ də açıq elan edilməyib.

* * *14:49

Aprelin 5-də müxalifət təşkilatları və ictimai fəalların birləşdikləri Milli Şura Bakıda - "Məhsul" stadionunda mitinq təyin edib.

Bakı Şəhər İcra Hakimiyyəti Milli Şuranın bu aksiyanı keçirməsinə razılıq verib. Müxalifət fəalları bu aksiya zamanı da ölkədə bahalaşmaya etirazlarını bildirirməyə hazırlaşırlar.

Milli Şura manatın ucuzlaşmasına etiraz olaraq martın 15-də də Bakıda etiraz aksiyası keçirmişdi. O zaman təşkilatçılar aksiyaya 10 min nəfərin qatıldığını iddia etsələr də müstəqil ekspertlər və BŞBPİ mitinqdə 1000 nəfərin iştirak etdiyini bildirmişdi.

Virtualaz.org saytının müxbirləri hazırda "Məhsul" stadionundadır. Aksiyadan reportajı təqdim edəcəyik.

Virtualaz.org-un reportyor qrupu