Pakistanda döyüşlərdə iştirak edənlər məhkəmədə ifadə verdilər

Məhkəmə qarşısında Pakistan və Suriyada döyüşlərdə iştirak edən iki qrup cavab verir

Dünən Bakı Ağır Cinayətlər Məhkəməsində qanunsuz silahlı birləşmələrdə iştirak etməkdə təqsirli bilinən Firdovsi Yusifov və Taleh Soltanovun cinayət işi üzrə məhkəmə prosesi davam edib.

Hakim Rasim Sadıqovun sədrliyi ilə keçirilən prosesdə ifadə verən Taleh Soltanov bildirib ki, məqsədi şəriət dövlətində yaşamaq olub: “2010-cu ildən namaz qılmağa başlamışam. Bir müddət sonra özüm kimi dini inanclı bir qızla ailə həyatı qurmuşam. Burada tikinti sektorunda çalışırdım. Bir gün eşitdim ki, Pakistanda şəriət dövləti qurulub. Ona görə, ailəmlə birlikdə ora getmək fikrinə düşdüm. 6 min manat pul yığdım. Mən, yoldaşım, iki baldızım və qayınanamla birlikdə yola düşdük. İlk öncə İran İslam Respublikasına getdik. Mənə nömrə verdilər. Həmin nömrəyə zəng elədim. Laçın Babayev adlı şəxslə görüşdüm. O, mənə Pakistana getmək üçün özbəklərlə əlaqə girməyi tapşırdı. Tehrandan Salavatu adlı şəhərə getdik. Özbəklər məni və ailəmi qaçaq yolla Pakistana keçirdi. Orada ailəmdən ayrılmalı oldum. Bir aya yaxın özbəklərlə yaşadım. Gördüm ki, onlarla yola getmirəm. Getdim, azərbaycanlıların qəbiləsinə. Ailəmi də yanıma gətirdim. Bazardan silah aldım. Orada hər kəsin evində silah var. Bazarda göy-göyərti satanda dəzgahının yanında silahla durur. Həm də silah ticarətində yaxşı pul var. Günü-gündən qiyməti qalxır. Mən də gələcəkdə satmaq məqsədilə aldım ki, ailəmlə harasa gedərəm. Orada çox acınacaqlı günlər yaşamışıq. Bir müddətdən sonra ailəmi Türkiyəyə yola saldım. Özüm bir müddət Miranşahda yaşadım”.

O, Pakistanda təlimlərdə iştirak etmədiyini deyib: “İttiham aktında deyirlər ki, guya mən orda təlimlərdə iştirak etmişəm. Halbuki, orada silah atmaq, dağlara çıxaraq güllə atmaq cinayət məsuliyyəti daşımır. Mən də orda tanışlarımla hərdən güllə atmağa gedirdik. Mənim Azərbaycana qayıtmaq fikrim yox idi. Türkiyəyə ailəmin yanına getmək istəyirdim. Ailəm orada yoldaşımın əmisinin himayəsində yaşayır. Ona görə də, Pakistandan İrana gəldim. Burada bizi qaçaq yolla Türkiyə keçirəcək şəxsi tapdım. Maşında oturanda Firdovsini gördüm. Firdovsi ilə əvvəlcədən bir yaxınlığım olmayıb. Bircə dəfə Pakistanda bazarda məni tanış elədilər ki, azərbaycanlıdır. O, da mənim kimi Türkiyəyə gedirdi. Maşında Firdovsi, mən, bir də türk var idi. Bizi gətirən adam Türkiyə sərhədinə az qalmış İranın xüsusi xidmət orqanlarına satdı. Orada ifadəmizi aldılar. Məhkəmə qarşısına çıxartdılar və sərhədi qanunsuz keçdiyimiz üçün 1 il cəza aldım. Cəkdiyim cəzanın 9 ayın tamamında isə, bizi həbsxanadan buraxdılar. Elə ora da Azərbaycan səfirliyi bizi götürdü və bura gətirdi. Mən yenə də deyirəm, mən dindaram. Əhli sünnəyəm. Mənim məqsədim yalnız və yalnız şəriət ölkəsində yaşamaq olub. Mən terrorçu deyiləm. Amma dinim uğrunda, əqidəm uğrunda kafirlərə qarşı hər zaman vuruşmağa hazıram. 17 ay Pakistanda qaldım. Heç zaman Azərbaycana qayıtmaq istəməmişəm”.

Bundan sonra ifadə verən Firdovsi Yusifov qeyd edib ki, Pakistana şəriət dövlətində yaşamaq məqsədi ilə gedib: “İlk öncə Türkiyəyə getdim. Məqsədim oradan Pakistana getmək idi. Bilirsiniz, mən, dini də elmlə mənimsəyən adamam. Mən də Taleh kimi Miranşah şəhərinə getdim. Orada azərbaycanlılardan ibarət qəbiləyə qoşuldum. O zaman orada qəbilə başçısı Elçin Misirxanov idi. Bir müddətdən sonra Elçin öldü. Yaşım çox olduğundan məni orda əmir seçdilər. Çünki oradakıların çoxu gənc idi. Uzun vaxt orada çox çətinliklə yaşadım. Bir gün anladım ki, burada şəriət dövləti yoxdur. Gözlədiklərimi görə bilmədim. Ailəmi oradan çıxarmaq fikrinə gəldim. Həmin günü

komendant saatı olduğunu bilmədim. Postu keçən zaman döyüş başladı. Ayağımdan yaralandım. Dağları, təpələri yaralı-yaralı keçdim. Yerdə qalanını Taleh danışdı. İrana gəldim. Məqsədim Türkiyəyə getmək idi. Azərbaycana qayıtmaq istəmirdim. Bilirdim ki, qayıdan zaman bu qara zindanı görəcəm”.

Qeyd edək ki, hər iki şəxs Milli Təhlükəsizlik Nazirliyi tərəfindən həbs edilib. İttiham aktına görə, Firdovsi Yusifov və Taleh Soltanov Pakistan İslam Respublikasının ərazisində həmin dövlətin və Azərbaycan Respublikasının qanunvericiliyi ilə nəzərdə tutulmayan silahlı birləşmələrin fəaliyyətində iştirak ediblər.

Bakı Ağır Cinayətlər Məhkəməsində Suriyada döyüşlərdə iştirak edən daha 6 nəfərin cinayət işi üzrə məhkəmənin hazırlıq iclası hakim Ənvər Seyidovun sədrliyi ilə keçirilən prosesdə araşdırılıb. Məhkəmə qarşısında Tariyel Mustafayev, Ruslan Mustafayev, Namiq Məmmədov, Elvin Əliyev, Tural Həsənov və Fərid Muradov cavab verirlər.

Təqsirləndirilən şəxslərdən Tural Həsənovun vəkili Elmar Süleymanov vəsatətlə çıxış edib. O, hüquqlarını müdafiə etdikləri şəxslərin dəmir barmaqlıqlardan çıxarılaraq vəkillərinin yanında oturmasını, işin baxılmasına xitam verilərək, ibtidai istintaqa qaytarılmasını xahiş edib.

Vəkil çıxışını davam etdirərək, maddi sübutların olmadığlna məhkəmə baxışına təyin edilməsini qeyri-qanuni olduğunu vurğulayıb. Digər vəkil Müzəffər Baxışov da vəkil yoldaşı Elmar Süleymanovun verdiyi vəsatətlərin qəbul edilməsini istəyib. Vəkil Osman Kazımov da kollegiyalarının verdikləri vəsatətlərin qəbul olunmasını məhkəmədən istəyib. Dövlət ittihamçısı çıxış edərək Elmar Süleymanovun verdiyi vəsatətlərin əsassız olduğu bildirərək, təmin olunmamasını məhkəmədən istəyib.

Bundan sonra hakimlər qərar qəbul etmək üçün müşavirə otağına yollanıblar. Müşavirədən qayıdan hakimlər kollegiyası qərarı elan edib. Onlar vəkillərin verdikləri vəsatətlərin heç birini təmin etməyib. Məhkəmə baxışı aprelin 6-a təyin edilib.

Ötən il sentyabrın 23-də Milli Təhlükəsizlik Nazirliyinin (MTN) İctimaiyyətlə Əlaqələr Mərkəzi keçirilən əməliyyat tədbiri barəsində məlumat yayıb. Həmin məlumata görə, (MTN) tərəfindən həyata keçirilmiş əməliyyat-axtarış tədbirləri nəticəsində 26 Azərbaycan vətəndaşı tutulub.

Azərbaycan Respublikasının qanunvericiliyi ilə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silahla, döyüş sursatı ilə, partlayıcı maddələrlə, hərbi texnika ilə, yaxud əsgəri ləvazimatla təchiz etmə, habelə, tərbiyə etmək vəzifəsini daşıyan şəxs kimi yetkinlik yaşına çatmayan şəxsi ağır cinayətin törədilməsinə cəlb etmə və başqa hüquqazidd əməllərinin törədilməsinə görə ümumilikdə 26 nəfər Azərbaycan Respublikasının vətəndaşı-Yusifov Firdovsi Soltan oğlu, Soltanov Taleh Əzizağa oğlu, Həsənli Vilayət Ələsdan oğlu, Musayev Malik Elçin oğlu, Hacıyev Vasif Orduxan oğlu, Babazadə İlkin Aydın oğlu, Balakişiyev Mehman Pirbala oğlu, Mustafayev Ruslan Azər oğlu, Məmmədov Namiq Firdovsi oğlu, Muradov Fərid Arif oğlu, Həsənov Tural Namiq oğlu, Əliyev Elvin Vilayət oğlu, Mustafayev Tariyel Tapdıq oğlu, Qəmbərov Azər Asim oğlu, Bayramov Vüsal Qabil oğlu, Həşimov Samir Samid oğlu, Abbasov Nicat Faiq oğlu, Məmmədov Hüseyn Xəqani oğlu, Cəfərov Ruslan İlham oğlu, Baxışov Sənan İlqar oğlu, Quliyev Eldost Firudin oğlu, Məmmədəliyev Məmmədşah Ağaşah oğlu, Həsənov Əhməd Elxan oğlu, Mərdanov Maarif İrşad oğlu, Dursunəliyev Vüqar Əhəd oğlu və Qurbanlı Elşən Əbülfət oğlu şübhəli şəxs qismində saxlanılıblar.

Vilayət Həsənli, Malik Musayev, Vasif Hacıyev, İlkin Babazadə, Mehman Balakişiyev, Ruslan Mustafayev, Namiq Məmmədov, Fərid Muradov, Tural Həsənov, Elvin Əliyev, Tariyel Mustafayev, Azər Qəmbərov, Vüsal Bayramov, Samir Həşimov, Nicat Abbasov, Hüseyn Məmmədov, Ruslan Cəfərov, Sənan Baxışov, Eldost Quliyev, Məmmədşah Məmmədəliyev, Əhməd Həsənov və Maarif Mərdanov 2013-cü ildən 2014-cü ilin müxtəlif aylarınadək Suriya Ərəb Respublikasının ərazisində həmin dövlətin və Azərbaycan Respublikasının qanunvericiliyi ilə nəzərdə tutulmayan silahlı birləşmələrin fəaliyyətində iştirak ediblər.

Xatırladaq ki, cinayət işi üzrə daha bir neçə qrupun işi üzrə Milli Təhlükəsizlik Nazirliyinin istintaq şöbəsində istintaq hərəkətləri davam etdirilir. Yaxın günlərdə həmin qrupların cinayət işi də baxılması üçün məhkəməyə təqdim olunacaq.