“DES” MMC-nin dələduzluqda ittiham olunan üzvləri barəsində sensasion faktlar ortaya çıxıb

Bakıda “Sovetski” sakinlərinə bina tikmək istəyən şirkətin məhkəməsi başlayıb. “”Gündəm xəbər”in əldə etdiyi məlumata görə, “DES” MMC-nin təqsirləndirilən üzvlərinin işinə Bakı Ağır Cinayətlər Məhkəməsində baxılır.

Şirkət rəhbərliyi “köhnə bakılılara yeni ev” şüarı altında sayt yaradıb. Rəsmi məlumatda deyilir ki, sonra vətəndaşların etibarından sui-istifadə edərək dələduzluq yolu ilə onlara məxsus külli miqdarda əmlakı ələ keçirməyə çalışıblar.

Guya paytaxtın mərkəzi prospektlərindən birində çoxmərtəbəli bina tikəcəkləri barədə həmin saytda və digər kütləvi informasiya vasitələrində reklam xarakterli informasiyalar yerləşdirib. MMC-nin vəzifəli şəxsləri - Asəf Hacı-İsmayılov, Nazim Səmədov və Orxan Fərhadov şübhəli şəxs qismində tutulublar.

Nazim Səmədovun hüquqlarını vəkil İradə Cavadova müdafiə edir.

Vəkil müdafiə çıxışını yazılı şəkildə hakimə təqdim edib. Mətndə qeyd olunur ki, cinayətin işi üzrə aparılmış məhkəmə baxışının nəticələrinə dair məhkəmə bəraət hökmü çıxarmalıdır. Belə ki, cinayət işi üzrə tərtib edilmiş ittiham aktından açıq aşkar görünür ki, təqsirləndirilən şəxslərin əməlində Cinayət Məcəlləsinin 178-ci maddəsini əks etdirən cinayət tərkibi mövcud deyil. Onların məqsədi əhali üçün münasib ev tikmək, “Sovetski” adlanan ərazinin sakinlərini sərfəli qiymətlərlə mənzillə təmin etmək olub.

Bu məqsədlə təqsirləndirilən şəxslər hüquqi şəxs kimi “DES” MMC şirkətini təsis ediblər. Hüquqi şəxslərin dövlət qeydiyyatından keçmiş və ən əsası isə nizamnamə əsasında fəaliyyət göstəriblər. Təqsirləndirilən şəxslərin “Sovetski” sakinləri üçün “DES” MMC şirkəti olaraq (“Həyat İnşaat” tikinti şirkətinin çıxardığı smeta üzrə hər kvadrat metr üçün 380 manat olmaqla) 16 mərtəbəli, 9 bloklu, 1, 2 və 3 otaqdan ibarət 810 mənzillik bina tikdirmək niyyəti var idi.

Bu məqsədlə mənzil əldə etmək istəyən şəxslər tikintinin tikilməsi üçün hər kvadrat metri 380 manat məbləği kooperativin hesabına yatırılacaq idi. Ki, həmin ümumi puldan binanın tikintisini həyata keçirəcək “Həyat” tikinti şirkətinə tikinti üçün sərf edilən xərclər ödənilsin.

Eyni zamanda gələcəkdə yığılacaq puldan 3 milyon manat torpaq sahəsinin alınmasına və yerdə qalan hər kvadrat metrdən təxminən 5 manat pul isə “DES” MMC-nin hesabına köçürüləcəkdi. Həmin puldan vergi və digər xərclər ödənilməklə yerdə qalan məbləğin onların göstərəcəyi xidmətə yönəldilməsi planlaşdırılıb.

İttiham aktında göstərilir ki, təqsirləndirilən şəxslər Şəhərsalma və Tikinti Məcəlləsinin 47.2 və 75-ci maddələrinin tələblərini pozub. Ümumiyyətcə cinayət işinin materiallarında şikayət ərizəsinin olmadığı görünür.

Onlar 29 milyon, 685 min, 486 manatı mənimsəməkdə ittiham olunur. İstər ibtidai araşdırma zamanı, istərsə də məhkəmə baxışı zamanı aydın olur ki, istintaq orqanı məhz şübhələr və fərziyyələr əsasında cinayət işi ilə bağlı ittiham aktı tərtib edib.