Dələduzluqda ittiham olunan qadın məhkəmədə dəhşət saçan açıqlamalar verdi

Bakı Ağır Cinayətlər Məhkəməsində dələduzluqda ittiham olunan Mülayim Mahmudovanın cinayət işi üzrə məhkəmə prosesi başlayıb. Hakim Mahmud Ağalarovun sədrliyi ilə keçirilən prosesdə prokuror ittihamnaməni oxuyub.

İttihama görə, Mülayim Mahmudova Qaradağ rayonunda yerləşən “Binə” Ticarət Mərkəzində Bakı şəhər sakini Hürü Dadaşovaya mağaza alacağını vəd verib və ondan ümumilikdə 26 min manat alaraq mənimsəyib.

Məhkəmədə ifadə verən Mülayim Mahmudova elan olunmuş ittiham üzrə özünü təqsirli bilməyib. O, ifadəsində barəsində olan cinayət işinin istintaqı 3 ilə yaxın getdiyini, amma bir dəfə də olsun dindirilmədiyini qeyd edib: “Məhkəmədə mənə söz verilib, buna görə də hakimlərə minnətdarlığımı bildirirəm. Amma istintaqda danışmaq üçün mənə bir dəfə də olsun söz verilməyib”.

Mülayim Mahmudova bildirib ki, 20 ilə yaxındır “Binə” və “Sədərək” ticarət mərkəzlərində bizneslə məşğul olub. Onun sözlərinə görə, zərərçəkən Hürü Dadaşova həmyerlisi olsa da, onunla əlaqəsi olmayıb: “Hürünü uzun müddətdir ki, tanıyıram. Amma bizim münasibətimiz, yaxınlığımız olmayıb. Hürü mənim bacılarımla əlaqəsi olub. Hürü ilə ev almaq istəyəndə yaxından tanış olmuşam. Mən təkbaşına azyaşlı övladım ilə birlikdə Suraxanı qəsəbəsində evlərdən birində kirayə yaşayırdım. Ev almaq barədə Hürü ilə danışanda, o da məni “GEN” MMC-nin yerləşdiyi ofisə gətirdi. Ofisdə Həbib Bayramov ilə müqavilə bağladım. Həmin vaxt Həbib Bayramov dedi ki, Hürü Dadaşova çoxsaylı insanları “GEN” MMC-yə cəlb edir,satılan hər evin bir kvadratına görə, şirkətdən 30 ABŞ dolları alır. Bu minvalla Hürü Dadaşova ilə tanışlığım yarandı. Onun vasitəsi ilə “GEN” MMC-dən ev almaq üçün ümumilikdə 13200 ABŞ dolları ödədim. “GEN” MMC-nin vətəndaşlara qarşı etdiyi dələduzluq ilə bağlı cinayət işi başlayandan sonra ödədiyim pul da batdı. Həmin cinayət işi üzrə keçirilən prosesdə məni bura Hürü Dadaşovanın cəlb etməsini bildirsəm də, prosesə sədrlik edən hakim Eynulla Vəliyev bu məsələni araşdırmadı. Eynulla müəllim

dedi ki, onlar yalnız cinayət işi çərçivəsində məhkəməyə verilən ittiham olunan şəxslərin işinə baxırlar”.

Mülayim Mahmudova daha sonra əlavə edib ki, Hürü Dadaşova “Sədərək” Ticarət Mərkəzi köhnə yerində olanda yanına gəlib: “Həmin vaxt Hürü Dadaşova bildirib ki, dəmir yolu vağzalında bilet satmaqla məşğul olur, amma son vaxtlar biletlərin satılması kompüter vasitəsi ilə həyata keçirildiyi üçün əlavə gəlir olmur. Buna görə də “Sədərək” ticarət mərkəzində mağaza almaq istəyir. Ona bizneslə məşğul olmaq barədə razılaşdıq. Ona bildirdim ki, İrana gedərək, parça gətirmək lazımdı. Bu məqsədilə Hürü ilə birlikdə İrana getdik. İranda qaldığımız iki gün ərzində mal almaq üçün mağazaları gəzdik”.

Təqsirləndirilən şəxsin sözlərinə görə, 2007-ci ilin dekabr ayında İrandan mal gətirmək üçün 15 min manat verib: “Hürü həmin verdiyi pulun müqabilində 25 min ABŞ dolları qazanc əldə edib. Onunla birlikdə İrandan parça gətirmişik və parçaları “Binə” və “Sədərək” ticarət mərkəzlərində mağazalara paylamışıq. Hürü mən olmayanda da mağazalardan pulları yığıb, özünə götürüb. O, malların pullarını götürməsi ilə bağlı mağaza sahiblərinin dəftərlərində qeydiyyatlar var. İstintaq zamanı tələb etdim ki, həmin mağaza sahibləri şahid qismində dindirilsin, qeydiyyat dəftərləri araşdırılsın. Amma istintaq orqanı buna əhəmiyyət vermədi”.

Mülayim Mahmudova bildirib ki, “Binə” və “Sədərək” ticarət mərkəzlərinin hər birində bir dənə mağazası olub: “Həmin mağazanı işlətmirdim. Sonradan mağazalara sosial vergi tətbiq edildiyi üçün mənim də hər ay mağazama 167 manat vergi borcu yaranıb. Bu səbəbdən Hürü Dadaşovaya təklif etdim ki, mağazanı etibarnamə ilə işlətsin, sosial vergini də ödəsin. Bu səbəbdən mağazanı işlətmək üçün Hürü Dadaşovaya etibarnamə verdim. Hürü Dadaşova mağazanı işlətsə də, sosial vergini mənim adımla ödəyib. Yəni sosial vergi ödəyicisi mən olmuşam. Sonra Hürü yanıma gələrək, iş görmək üçün verdiyi 15 min manatı istədi. Bildirdi ki, mağaza almaq istəyir və mağaza almaq üçün ona köməklik etməyimi də xahiş etdi. Məndə onu ticarət mərkəzinin sahibinin yanına apardım. Ticarət mərkəzinin sahibi bizə üç mağazanın açarlarını verdi və həmin mağazaları bəyənməyimiz üçün görməyimizi dedi. Biz də hər üç mağazanı gəzsək də, Hürü heç bir mağazanı almadı. Həmin vaxt iş alınmasa da, Hürüyə 15 min manatı verdim. Sonra Hürü məndən əlavə olaraq 15 min manat tələb etməyə başladı. Ona dedim ki,

şərikli mal gətirmişik, pulunu də yığmısan, daha sənə verəsi pulum yoxdur. Hürü gedəndən bir qədər sonra polis əməkdaşları gəldi. “Binə” Ticarət Mərkəzinin icraçı direktoru Vahid Qəmbərovun iş otağında görüşdük. Həmin vaxt Vahid Qəmbərov bildirdi ki, Hürü Dadaşova ilə bağlı böyük adam zəng edib, bu səbəbdən onun istəyi yerinə yetirilməlidir. Məcbur qalaraq “Binə”də olan mağazamı Hürü Dadaşovanın adına keçirdim. Bundan sonra həmin mağazada olan istifadə hüququm ləğv edilib. Bununla bağlı Vahid Qəmbərovun otağında Hürü Dadaşovadan pulun ödənilməsi, bundan sonra mənimlə işi olmaması ilə bağlı yazılı iltizam aldım. Amma Hürü Dadaşova yenə də məndən əl çəkmədi.

Vahid Qəmbərov iki gün sonra bildirdi ki, Hürü Dadaşova əl çəkmir, yenə də 30 min manat istəyir. Ona pulum olmadığını bildirdim. Bundan sonra Hürü Dadaşova bazarın sahə müvəkkilinə məndən şikayət etdi. Sahə müvəkkili gələrək məni sorğu-sual etdi. Amma cinayət tərkibi olmadığı üçün getdi. İşin belə olduğunu görən Hürü 10-cu polis bölməsinə şikayət etdi. 10-cu bölmədə də ifadə verəndən sonra cinayət tərkibi olmadığı üçün şikayət qəbul edilmədi. Hürü Dadaşova məcbur qalaraq Qaradağ Rayon Polis İdarəsinə şikayət etdi. Oradan da iş Bakı şəhər Baş Polis İdarəsinə göndərilib. İşimə təhqiqatçı Tərlan İbrahimli baxdı. Amma cinayət tərkibi olmadığı üçün Tərlan İbrahimli cinayət işinə xitam verdi. Belə şikayətlərlə bağlı barəmdə başlanmış cinayət işinə 4 dəfə xitam verilib”.

Təqsirləndirilən şəxsin sözlərinə görə, bir neçə gündən sonra bazarın sahə müvəkkili ona 10-cu polis bölməsinə çağırılmasını bildirib: “Mən də xalam oğlu ilə birlikdə 10-cu polis bölməsinə getdik. Mən polis bölməsinə girsəm də, xalam oğlunu içəri buraxmadılar. Orada polis bölməsinin rəisinin otağında bir kişi var idi. Həmin kişi mənə ərizə yamamı və Hürü Dadaşovaya pul borcu ödəməyimi tələb etdi. Mən onunla razı olmadım. Həmin şəxs üstümə hücum çəkərək qolumu burdu və Bakı şəhər Baş Polis İdarəsinə aparacağını bildirdi. Məni qolu bağlı çölə çıxaranda xalam oğlu ilə həmin mülki geyimli kişi arasında mübahisə yarandı. Xalam oğlu onunla əlbəyaxa olaraq məni onun əlindən aldı və öz maşınına otuzdurdu. Xalam oğlu həmin şəxsə bildirdi ki, səni tanımırıq, xalam qızını hara aparmaq lazımdır, özüm apararam. Bundan sonra həmin kişi maşını Bakı polis idarəsinə sürməyi tələb etdi. Biz də Bakı polis idarəsinə getdik. Sonradan bildim ki, həmin mülki geyimli şəxs Şövqü adlı müstəntiq olub. İdarədə mənim şəxsiyyət

vəsiqəmi aldı və özümü idarənin yeməkxanasına apardı. saatlarla yeməkxanada qaldım. İdarədən çölə çıxmaq istəyirdim, şəxsiyyət vəsiqəm olmadığı üçün çıxa bildmədim. Sonra Şövqü məndən tələb etdi ki, Hürü Dadaşovaya 30 min manat borclu olmağım barədə ərizəyə imza edim. Amma onun istəyini yerinə yetirmədim. Sonra idarədən çıxmaq istəyəndə məni buraxmadılar və bildirdilər ki, içəri keçmək barədə qeydiyyatım yoxdur, belə olan halda həbs olunmaq ehtimalımın yaranmasını dedilər. Onlara dedim ki, məni içəri Şövqü Əhmədov keçirib. Bundan sonra polislər Şövqü Əhmədova zəng etdilər. Şövqü Əhmədov onlara nə deməsindən xəbərim olmasa da, sonra qapıda dayanan polis qeydiyyat dəftərinə yox, başqa bir dəftərə mənimlə bağlı qeydiyyat apardı. Onlardan tələb etdim ki, qeydiyyat dəftərinə qeydlər etsinlər, amma bunu etmədilər”.

Mülayim Mahmudova qeyd edib ki, sonradan cinayət işi Nərimanov Rayon Polis İdarəsində araşdırılıb: “Polis idarəsində işə baxan müstəntiq şikayətin mülki iddia olması nəticəsinə gəlib və cinayət işinə xitam verilməsi barədə qərar qəbul edib. Sonradan işim Qaradağ Rayon Polis İdarəsində müstəntiq Pərvin Zeynalova araşdırıb. Pərvin Zeynalova mənə dedi ki, Hürü Dadaşovaya olan 30 min manatı ödəyim. Ona belə borcum olmadığını bildirsəm də, Pərvin Zeynalova pulu ödəmək üçün mənə 4 ay vaxt verdi. Hər həftə Pərvin Zeynalova ilə telefon vasitəsi ilə danışırdım. 4 ayın tamamında Pərvin Zeynalova məni idarəyə çağırdı və 30 min manatı ödməyimi istədi. Pulum olmadığını deyəndə isə 15 min manat ödəməyi təklif etdi”.

Təqsirləndirilən şəxsin sözlərinə görə, sonradan vəkili ilə birlikdə Zərifə adına parkın yanında Hürü Dadaşova ilə görüşüb. Onun ifadəsinə görə, həmin vaxt Hürü Dadaşova 20 min manat verməyimi tələb edib. O, qeyd edib ki, istənilən pulu vermədiyi üçün barəsində qanunsuz olaraq cinayət işi başlanıb.

Mülayim Mahmudova qeyd edib ki, barəsində balanmış qanunsuz cinayət işi ilə bağlı baş prokuror Zakir Qaeralov və Bakı şəhər prokuroru Əziz Seyidovla görüşüb. Onun sözlərinə görə, həm baş prokuror, həm də şəhər prokuroru işə ədalətli baxacağına söz veriblər. Mülayim Mahmudova polisdə həm fiziki, həm də mənəvi işgəncələrə məruz qaldığını qeyd edib.

Məhkəmə iclası mayın 8-də davam etdiriləcək.