Təqsirləndirilən şəxs: “Hədə-qorxu gələrək, narkotik vasitələrin mənə məxsus olmasını etiraf etməyi tələb ediblər”

Narkotik və silah gəzdirməkdə təqsirli bilinən Ceyhun Cəbrayılov, Seyfəddin Əliyev və Sərdar Şirinovun cinayət işi üzrə keçirilən məhkəmə iclasında işgəncə faktları açıqlanıb. Xaçmaz rayon Məhkəməsində aparılan araşdırmalar zamanı təqsirləndirilən şəxslər polis tərəfindən şərləbndiklərini, içgəncə altında etiraf edici ifadələr aldıqlarını deyiblər.

İstintaqın gəldiyi nəticəyə görə, 22 mart 2014-cü il tarixdə Xaçmaz şəhər sakinləri Ceyhun Cəbrayılov, Seyfəddin Əliyev və Sərdar Şirinov Xaçmaz rayon polis şöbəsinə gətiriliblər. Onların üstündə axtarış aparılarkən Ceyhun Cəbrayılovun əynində olan gödəkçənin cibindən bir ədəd siqaretin gümüşü kağızına bükülmüş, cəmi, 21,13 qram çəkidə narkotik vasitə hesab olunan tiryək, Sərdar Şirinovdan 0,16 qram çəkidə narkotik vasitə qurudulmuş marixuana, Seyfəddin Əliyevdən isə 0,539 qram çəkidə narkotik vasitə heroin aşkar edilib.

Bundan başqa, həmin tarixdə Ceyhun Cəbrayılovun idarə etdiyi VAZ-2110 markalı avtomobildə “F-1” əl qumbarasının gövdəsi və gövdənin partladılması üçün istifadə edilən “UZRQM” alışdırıcısı da aşkarlanıb. Ceyhun Cəbrayılov həmin silah-sursatı üzərində gəzdirməsi müəyyən edilib.

Təqsirləndirilən şəxslər Cinayət Məcəlləsinin 228.1-ci (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) və 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddələri ilə ittiham ediliblər. Onların barəsində olan cinayət işi baxılması üçün Xaçmaz Rayon Məhkəməsinə göndərilib.

“Heç bir yerdə işləməmişəm”

Hakim Füzuli Mirzəquliyevin sədrliyi ilə keçirilən prosesdə ifadə verən Ceyhun Cəbrayılov elan olunmuş ittiham üzrə özünü təqsirli bilməyib. O, bildirib ki, ailəsi ilə birlikdə Xaçmaz şəhərində yaşayıb: “Rəsmi olaraq heç bir yerdə işləməmişəm. 2009-cu ildə Xaçmaz Rayon Məhkəməsinin hökmünə əsasən Cinayət Məcəlləsinin 182.1-ci (hədə-qorxu yolu ilə tələb etmə) maddəsi ilə 4 il 6 ay azadlıqdan məhrum edilmişəm.

5 dekabr 2013-cu ildə cəzamın çəkərək azadlığa buraxılmışam. Azadlığa çıxdıqdan sonra heç bir yerdə işləməmişəm. Xaçmaz şəhər sakinləri Sərdar Şirinovu, Seyfəddin Əliyevi və Cavid İsmayılovu uzun müddətdir tanımışam. Seyfəddin Əliyevlə 4 il bir yerdə Xaçmaz dəmiryol vağzalındakı qatarlarda fəhlə işləmişəm, Sərdar Şirinovu isə uzun müddətdir ki, tanımışam. Cavid İsmayılov isə qonşuluğumda yaşayıb”.

“Etiraf etdim ki, tiryək mənə məxsusdur”

Təqsirləndirilən şəxsin sözlərinə görə, 22 mart 2014-cü il tarixdə qardaşı Rüstəmə məxsus VAZ-21010 markalı avtomobillə Xaçmaz şəhərində olarkən qonşusu Cavid, tanışları Sərdar və Seyfəddinlə görüşüb: “Təxminən 16 radələrində bir yerdə çay içməyə getmək üçün Cavid, Sərdar və Seyfəddin idarə etdiyim avtomobilinə əyləşdilər. Əvvəl avtomobilə yanacaq vurmaq üçün Qımıl kəndinə dönən yerdə yolun üstündəki yanacaqdoldurma məntəqəsinə sürdüm. Orada olarkən mülki geyimdə olan üzdən tanıdığım polis əməkdaşları bizə yaxınlaşdı. Polis əməkdaşları zor tətbiq edərək, bizi polis şöbəsinə gətirdilər. Polis şöbəsində üstümə baxış keçirilməsi barədə məlumat verdilər. Məni polis şöbəsində kabinetlərin birinə apardılar, sonra ora üç nəfər şəxsi hal şahidi kimi dəvət etdilər. Hal şahidləri gələndən sonra üstümdə nə varsa stolun üstünə qoymağı təklif etdilər. Cibimdə olan qatlanan cib bıçağını, 2 ədəd 1 manatlıq pul əskinazlarını stolun üstünə qoydum. Baxış zamanı polis əməkdaşları cibimə iki büküm qoyublar. Bunların narkotik vasitə olduğunu bilmişəm və buna etiraz etmişəm. Lakin polis əməkdaşları hədə-qorxu gələrək, narkotik vasitələrin mənə məxsus olmasını etiraf etməyi tələb ediblər. Məcbur etiraf etdim ki, içərisində tiryək olan bükümlər mənə məxsusdur. Protokol yazılarkən bildirdim ki, bədənimdə ağrılar olduğundan narkotik vasitə tiryəkdən istifadə edirəm, həmin tiryəki 3-4 gün əvvəl Bakı şəhərindən gələrkən Şamaxinka adlanan yerdən küçədən tapmışam və həmin vaxtdan üstündə qalıb. Üstümdə aşkar olunaraq götürülmüş içərisində narkotik vasitə olan tiryək elektron tərəzidə çəkilib və kağız zərfə qoyularaq qablaşdırılıb”.

“Nə narkotik vasitə, nə də qumbara mənə məxsus deyil”

Ceyhun Cəbrayılov qeyd edib ki, üstündə olan cib bıçağı da zərfə qoyularaq qablaşdırılıb və möhürlənib. Onun sözlərinə görə, həmin bıçaq uzun müddətdir onların evində olub: “Həmin bıçağı avtomobildə nasazlıq olanda təmir zamanı lazım olduğu üçün götürmüşəm. Üstümə baxış keçirilməsi barədə protokol tərtib olunub, tərtib olunmuş protokol ucadan oxunduqdan sonra mən və baxışda hal şahidi kimi iştirak edən üç nəfər şəxs protokolu, üstümdə aşkar olunaraq götürülmüş narkotik vasitə olan tiryəkin və cib bıçağının qablaşdırıldığı kağız konvertlərin üzərində imza

etdik. Bundan sonra mən və həmin 3 nəfər hal şahidi kimi dəvət olunmuş şəxslərin iştirakı ilə idarə etdiyim VAZ 2110 markalı avtomobilə baxış keçirildi. Baxış zamanı sürücü əyləşən oturacağın altından 1 ədəd salafan bükülü aşkar olundu. Həmin bükülünün içərisində kağıza bükülmüş yaşıl rəngli F-1 markalı qumbaraya oxşar dəmir kütlə aşkar edildi. Amma həmin F-1 əl qumbarası mənə məxsus olmayıb. Həmin qumbaranın kimin tərəfindən avtomobilə qoyulmasından məlumatım olmayıb. Həmçinin əl-qumbarasının büküldüyü sellofana əlim dəyməyib. Buna görə barmaq izlərinin haradan götürülməsi, sellofan torba üzərində barmaq izlərinin haradan peyda olması mənə məlum olmayıb. Bundan başqa avtomobildən 1 ədəd mənə məxsus Nokia markalı mobil telefon və avtomobilin barından isə özümün istifadə etdiyim 1 ədəd “Belamorkanal” siqareti aşkar olunaraq götürülüb. Həmin əl qumbarasına oxşar dəmir kütlə və 1 ədəd “Belomorkanal” siqareti ayra-ayrı kağız konvertdə qablaşdırılaraq mohürlənib. Avtomobilə baxış keçirilməsi barədə protokol tərtib olunub. Həmin protokol ucadan oxunduqdan sonra imza edərək təsdiq etmişəm. Ancaq nə narkotik vasitə, nə də qumbara mənə məxsus deyil. Onlar polis əməkdaşları tərəfindən üstümə və maşınıma qoyulub”.

“Polislər bizə xəsarət yetirdi”

Digər təqsirləndirilən Seyfəddin Əliyev də elan olunmuş ittiham üzrə özünü təqsirli bilməyib. O, bildirib ki, Xaçmaz şəhərində yaşayıb, həbs olunana kimi heç yerdə işləməyib. Seyfəddin Əliyevin sözlərinə görə, 2011-ci ildə Xaçmaz Rayon Məhkəməsinin hökmünə əsasən Cinayət Məcəlləsinin n 234.1-ci maddəsi ilə təqsirli bilinib və 3 il azadlıqdan məhrum edilib: “2013-cü ilin dekabr ayında cəzamı başa vuraraq azadlığa çıxmışam. Azadlığa çıxdıqdan sonra heç bir yerdə işləməmişəm. Xaçmaz şəhər sakinləri Sərdar Şirinovu, Ceyhun Cəbrayılovu və Cavid İsmayılovu uzun müddətdir tanıyıram, onlarla yaxın münasibətlərim olub. Martın 22-də Ceyhun, Cavid və Sərdarla görüşərək Xaçmaz şəhərində çay içməyə getdik. Ceyhun əvvəl avtomaşına yanacaq vurması üçün Qımıl yolunda yerləşən yanacaqdoldurma məntəqəsinə girdi. Orada bizi polis əməkdaşları saxladı. Polislər bizi döyərək, xəsarət yetirdilər və polis şöbəsinə apardılar. Polis Şöbəsində biz bir-birimizdən ayrıldıq”.

“Təqsirim yoxdur”

Seyfəddin Əliyevin sözlərinə görə, polis əməkdaşları onun şalvarının cibinə iki ədəd siqaret kağızı bükümü qoyublar: “Bunun narkotik vasitə olduğunu bilmişəm və etiraz etmişəm. ,Lakin polis əməkdaşları zorla üzərimdə axtarış aparıblar. Beləliklə, əynimdəki şalvarın cibindəki bir manatı, iki ədəd siqaretin kağızına bükülmüş heroini,

gödəkçəmin cibindəki Nokia markalı mobil telefonu və alışqanı çıxardılar. Məcbur olaraq bükümlərin içərisindəkinin narkotik vasitə olan heroin olduğunu, həmin heroini 3-4 gün əvvəl bazara gedərkən küçədən tapdığımı və özüm istifadə etdiyim üçün cibimdə saxladığımı dedim. Polis əməkdaşları məni saxlayarkən xəsarət yetiriblər. Lakin polis əməkdaşlarının təzyiqi ilə xəsarəti yıxılarkən aldığım barədə izahat vermişəm. Mənim heç bir təqsiri yoxdur. Əvvəllər də heç bir günahı olmadan cinayət məsuliyyətinə cəlb edilmişəm və barəmdə bəraət verilməsini istəyirəm”.

“Nəşənin mənə məxsus olduğunu etiraf etməyi bildirdilər”

Sərdar Şirinov da ittiham üzrə təqsirli bilməyərək bildirib ki, Ceyhun Cəbrayılov və Seyfəddin Əliyevlə birlikdə olduqları zaman polis əməkdaşlarının hücumuna məruz qalıb. Onun sözlərinə görə, polis şöbəsinə aparılıb və orada üzərinə baxış keçirilib: “Baxış zamanı 200 manat və ə 1 ədəd sellofan bükülünü çıxarılıb. Mənə həmin bükülüdəkinin nəşə olduğunu dedilər. Polis əməkdaşları həmin nəşənin özümə məxsus olmasını etiraf etməyimi bildirdilər. Məni hədələdilər ki, əgər həmin narkotik vasitənin özümə məxsus olmasını etiraf etməsəm, əlavə iki kibrit qutusu nəşəni də üstümdən tapacaqlar. Bu səbəbdən həmin narkotik vasitənin mənə məxsus olmasını etiraf etmişəm və guya bazar ətrafından tapdığını göstərmişəm. Baxış zamanı polis əməkdaşları cibinə qoyduqları nəşəni və 200 manat pulu ayrı-ayrı kağız zərflərə qoyaraq qablaşdırdılar. Əslində narkotik vasitə qəbul etmirəm və narkotik vasitəni üzərimə polis əməkdaşları atıblar. Ona görə də barəmdə bəraət verilməsini xahiş edirəm”.

Məhkəmənin hökmü ilə Ceyhun Cəbrayılov 4 il 6 ay, Seyfəddin Əliyev 2 il 4 ay, Sərdar Şirinov 2 il 3 ay müddətinə azadlıqdan məhrum edilib.