Deyəsən, DİN-nin strukturunda vəzifə sahibi olan bəzi polis əməkdaşlarımız, “falçılıqla” məşğul olurlar

Bir kimsənin hüquqları pozulduqda, yaxud da hansısa qanunsuzluqla, özbaşınalıqla və.s üz-üzə qaldıqda, həmin şəxs tədbir görülməsi üçün ərazi üzrə hüquq-mühafizə orqanı əməkdaşlarına müraciət etmək məcburiyyətində qalır. Bəs vətəndaşın hüquqları DİN-nin strukturunda olan qrum əməkdaşları tərəfindən pozulduqda, bir qədər də dəqiq desək tapdaqlar altına atıldıqda, o, hara, hansı ünvana şikayət etməlidir? Bax, bu haqda düşünmək, bir qədər də götür-qoy etmək gərəkdir ki, bəzi mətləblərdən xəbər tutmaq mümkün olsun. Çünki,...

Elə bu düşünməyin nəticəsidir ki, polis əməkdaşının özbaşınalığı ilə üz-üzə qalan Bakı şəhəri, Sabunçu rayonu Zabrat qəsəbəsi Kuybışev küç. ev-4 ünvanında yaşayan Rüfət Yaqub oğlu da, artıq qeyd olunan ünvanı tapa bilmədiyindən, o, ölkə rəhbəri cənab İlham Əliyevə müraciət etmək məcburiyyətində qalır. O, üzləşdiyi problemin mahiyyəti haqda fikirlərini açıqladıqdan sonra, Sabunçu rayon Polis İdarəsi “narkobiznes” şöbəsinin əməkdaşı Emin İsmayılovun əməllərindən zinhara gəldiyini bildirir və redaksiyamıza ünvanladığı şikayət ərizəsində yazır: “2014-cü ilin sentyabr ayında Emin İsmayılov mənə iki darvaza və bir seyf qapısı sifariş verdi. Ümumi söz-söhbət zamanı o, general Vaqif Axundovun adını çəkdiyindən, mən ona hörmət əlaməti olaraq 2700 manat pul verəcəyini bildirdim. Yəni, həmin pul yalnız alınmış materialların və ustaların əmək haqlarına çatırdı. Elə ki, onun vermiş olduğu sifariş hazır oldu, bu zaman Emin İsmayılov 2700 manatı verməkdən boyun qaçırdı. Belə olan təqdirdə şikayət edəcəyimi bildirdim, dərhal o, məni şərləyərək Bakı şəhər Baş Polis İdarəsinə apardı və orada güclə məndən 4000 manat pul alıb buraxdılar. Və mənə bildirdi ki, “bir də şikayət etsən, səni həbs etdirəcəyəm deməklə rus dilində onu da vurğuladı ki, “general Vaqif Axundov “dyadya mayevo vtorovo jenı”.

Üzləşdiyim problemlə bağlı vəkilə ərizə yazdırıb aidiyyəti qurumlara ünvanladım. Çox keçmədi ki, Bakı şəhər Baş Polis İdarəsi, Daxili Təhqiqatlar İdarəsinin rəisi Əziz Hidayev, heç bir əsası olmayan 16 iyul 2015-ci il tarixdə N9/D.T.Ş-393 saylı cavab məktubunu həm bizə, həm də

DİN-nə ünvanlayır. Verilən cavab məktubunda yazılır ki, guya bizim şikayətimiz əsasında DİN-nin rəhbərliyi, 06 aprel 2015-ci il tarixdə Emin İsmayılovu müvafiq əmri ilə tutduğu vəzifədən azad etmişdir. Halbuki, bizim ilk yazdığımız ərizə 26 may 2015-ci il tarixdə, ikinci ərizəmiz isə 12 iyun 2015-ci il tarixdə yazılmasına baxmayaraq, verilən cavab məktubunda göstərilir ki, Emin İsmayılov 06 aprel 2015-ci il tarixdə işdən azad olunub. Bu da o deməkdir ki, DİN-nin strukturunda vəzifə sahibi olan bəzi polis əməkdaşlarımız “falçılıqla” məşğul olurlar”.

Sözsüz ki, bütün bunlar redaksiyamıza üz tutub üzləşdiyi problemin içtimailəşməsinə çalışan və ölkə rəhbərinə müaciətini qəzetimiz vasitəsilə çatdıran Rüfət Yaqub oğlunun fikirləridir. O, bu gün istəyir ki, Emin Süleymanovdan alacağı 2700 manat pulunu və Bakı şəhər Baş Polis İdarəsiində şərlənərək əlindən alınmış 4000 manat pulunu geri qaytara bilsin. “Mən sadə bir adamam, çörək pulumu güclə qazanıram, himayəmdə də iki azyaşlı övladım var. Fəhlələrin pulunu da güclə verirəm. İnanıram ki, mənim müraciətim diqqətdə saxlanacaq, ən azından DİN-nin rəhbərliyi də, üzləşdiyim problemin həllində, alacağım pulların geri qaytarılmasında mənə köməkdarlıq edəcək. Mən buna inanıram və böyük ümid bəsləyirəm”.

Biz də bir redaksiya olaraq onu bildirmək istəyirik ki, bu cür addımların atılması, nəinki Azərbaycan polisinin adına, ümumiyyətlə cəmiyyətimizə başucalığı gətirməyən hallardır. Qarşı tərəfin də mövqeyini dinləməyə hazırıq.

“Gündəm Xəbər”