“Gündəm Xəbər” qəzeti olaraq problemin varlığına dəfələrlə toxunmuşuq və yaşanan problemi geniş ictimaiyyətin diqqətinə də çatdırmışıq
Əslən Gədəbəy rayonundan olan və uzun illər ərzində adı çəkilən rayonda sahibkarlıq fəaliyyəti ilə məşğul olan Əliyev Oqtay Qara oğlu, artıq 17 aydan çoxdur ki, böyük bir problemlə üz-üzə qalıb. Onun üz-üzə qaldığı problemin kökündə, şəxsi mülkiyyətində olan 38,5kvm-lik obyektinin heç bir məhkəmə qərarı, hər hansı əsaslandırıcı sənəd olmadan, hətta obyektinin içərisindəki ərzaq məhsulları və avadanlıqlarla birlikdə darmadağın edilməsi olur. Belə ki, ona məxsus obyekt 12 fevral 2015-ci il tarixdə Gədəbəy RİH-i başçısının şifahi tapşırığı əsasında altüst edildikdən sonra, atılan addımların müqabilində ona heç bir kompensasiya ödənilmir. Belə olan halda o, üzləşdiyi problemlə bağlı aidiyyəti qurumlara yazılı, yaxud da şifahi müraciətlərini ünvanlasa da, ötən aylar ərzində Oqtay Qaraoğluna məxsus problem həllini tapmır ki, tapmır. Hətta, elə hallar da olur ki, onun ünvanladığı müraciətlərə bəzi dövlət qurumlarından, cavab belə verilmir. Bu cür vəziyyətlə üz-üzə qalan və olmazın duruma düşən Oqtay Qaraoğu, son anda probleminin ictimailəşməsi üçün ayrı-ayrı media qurumlarına müraciət etmək məcburiyyətində qalır. Belə ki, onun hələ ötən ildən başlayaraq “Gündəm Xəbər”ə etdiyi müraciəti əsasında, probleminin ictimailəşməsi istiqamətində ilkin addımlar da atıldı. Artıq bu gün qəzet və xəbər portallarının çoxsaylı oxucuları, sahibkarlıq fəaliyyəti ilə məşğul olan Oqtay Qaraoğunun problemi haqda az-çox məlumatlıdırlar. Çünki, “Gündəm Xəbər” qəzeti olaraq problemin varlığına dəfələrlə toxunmuşuq və yaşanan problemi geniş ictimaiyyətin diqqətinə də çatdırmışıq.
Onu da vurğulayaq ki, bir-iki gün bundan öncə Oqtay Qaraoğu redaksiyamıza üz tutaraq əməkdaşımızdan bəzi məqamlara toxunmağı xahiş edir və onu da bildirir ki, “problemlə üz-üzə qalan mənəm, problemimlə sperkulyasiya edən isə, bəzi xəbər portallarıdır. Yəni, onu vurğulamaq istəyirəm ki, hansısa xəbər portalının Gədəbəy RİH-nin başçısı və digər vəzifə sahibi olan şəxslərlə hansısa problemi varsa, onlar problemlərini çözmürlər, dolayısı yollarla mənim problemimin varlığından sui-istifadə edib, müəyyən oyun qaydaları oynamağı da bacarırlar. Təəssüf doğuran hal o olur ki, bəzən mənim mövqeyimi öyrənmədən, əlaqə saxlamadan, xəbər portallarının əməkdaşları hansısa saytda mənim adımdan müəyyən açıqlamalar da yerləşdirirlər. Bu da heç cür yolverilməzdir. Mən həmin xəbər portallarının əməkdaşlarından xahiş edirəm ki, hansısa media qurumuna etdiyim müraciəti deyil, daha yaxşı olar ki, konkret mövqeyimi öyrənib açıqlamalarınızı yerləşdirəsiniz. O da düzgün hal deyil ki, vaxtilə pis münasibətdə olduğum, amma üz-üzə qaldığım problemin həllinə bu gün köməklik göstərmək istəyən vəzifə sahibi ilə, məni qarşı-qarşıya qoyursunuz. Odur ki, hər bir xəbər portalının rəhbərindən, sıravi əməkdaşından belə xahiş edirəm ki, mövqeyimi öyrənmədən mənim adımdan hər hansı açıqlama dərc etməyin. Əgər kimsə problemimlə bağlı canıyananlıq edirsə, o halda mənimlə əlaqə saxlasın və konkret mövqeyimi işıqlandırsın”.
Hörmətli oxucular və xəbər portallarının rəhbərləri! Yuxarıda səslənən mövqe Oqtay Qaraoğluna məxsus olduğundan, onunla bağlı hər hansı fikir yürüdə bilmərik.

Akif