Ağdaş rayonunda zəlzələ zamanı iki qadın özünü binadan aşağı atıb.

APA-nın yerli bürosunun xəbərinə görə, iki nəfər özünü yaşadığı evin ikinci mərtəbəsindən atıb, bir nəfər isə qaçarkən pilləkəndən yıxılaraq xəsarət alıb.

Ağdaş Mərkəzi Rayon Xəstəxanasının qəbul şöbəsindən sayta verilən məlumata görə, Ağdaş şəhərinin Müşfiq İsayev küçəsindəki 45 saylı evdə yaşayan, 1986-cı il təvəllüdlü İsmayılova Vəfa Fazil qızı və Ərəbocağı kənd sakini, 1953-cü il təvəllüdlü Hüseynova Səkinə Əmirqulu qızı zəlzələ zamanı qorxu və həyəcandan özünü yaşadığı evin ikinci mərtəbəsindən ataraq ağır kəllə-beyin travması və sınıq xəsarətləri alıblar.

Onlar xəstəxanaya yerləşdiriliblər və vəziyyətləri orta-ağır qiymətləndirilir.

***

Bu gün baş verən zəlzələ nəticəsində Zərdab rayonuna da ciddi ziyan dəyib. Rayondan Avropa.info-ya verilən məlumata görə, Xaməmmədli, Hüseynxanlı, Şahhüseynli, Məmmədqasımlı və digər kəndlərində onlarla evin divarında çatlar əmələ gəlib.

Hazırda rayon İcra Hakimiyyətində Fövqəladə Hallar Komissiyasının iclası keçirilir. İclasda zəlzələnin nəticəsi ilə bağlı məsələlər müzakirə olunur.

***

Artıq sosial şəbəkələrdə zəlzələnin nəticələrini əks etdirən ilk fotolar yayılıb. Həmin fotolardan da aydın görünür ki, binalardın divarlarında dərin çatlar yaranıb.

Yerli sakinlərin verdiyi məlumatlara görə, dağıntılar var. Amma insan tələfatı haqda heç bir məlumat yoxdur.

Bu gün səhər saatlarında Şəkidə baş verən güclü təbii fəlakət nəticəsində dağıntılar baş verib.

Bu barədə rayonun icra başçısı Elxan Usubov bildirib. Onun sözlərinə görə, hazırda zəlzələ nəticəsində əmlaklarında dağıntı-uçqun və çatlar yaranan vətəndaşlar Şəki Rayon İcra Hakimiyyətinə (RİH) müraciət edirlər.

“Hazırda dağıntılarla bağlı müraciətlər gəlməkdədir. Biz gələn müraciətləri qeydə alırıq və qeyd edilən yerlərə mütəxəssislər göndərilir. Zəlzələ nəticəsində, şükürlər olsun ki, insan tələfatı qeydə alınmayıb. Gün ərzində baş verən dağıntıların hesabatı aparılacaq və sayları məlum olacaq”, - deyə Elxan Usubov bildirib.

İcra başçısı deyir ki, araşdırmalardan sonra zəlzələ nəticəsində dəyən ziyanın miqdarı məlum olacaq.

Virtualaz.org saytının xəbərinə görə, Mingəçevirdən olan deputat Aydın Mirzəzadə isə öz facebook səhifəsində yazıb ki, bu şəhərdəki bəzi binalara ciddi zərər dəyib.

“Mən icra hakimiyyətinə zəng vurdum. Oradan dedilər ki, Mingəçevirdə ciddi dağıntılar yoxdur” - deyə deputat bildirib.

“Ölkə ərazisində bir neçə rayon və şəhərdə baş verən zəlzələ Gəncədə də hiss olunsa da heç bir dağıntı törətməyib”.

Bu barədə virtualaz.org saytına Gəncə Şəhər İcra Hakimiyyətindən məlumat verilib.

Məlumata görə, hazırda şəhərdə hər şey qaydasındadır.

“Düzdür, zəlzələ hiss olunsa da heç bir panika yaranmayıb. Hər şey yaxşıdır, hamımız işimizin başındayıq” - deyə icra hakimiyyətinin nümayəndəsi bildirib.

Göyçayda zəlzələ nəticəsində iki uşaq anası su quyusuna düşərək ölüb.

"Report" xəbər verir ki, rayonun Məlikkənd kənd sakini, 1987-ci il təvəllüdlü İbadova Ruhiyyə Mustafa qızı zəlzələ baş verən zaman yaşadığı evin həyatyanı sahəsində su quyusunun yanında olub. Təkanların təsirindən ayağı sürüşərək su quyusuna düşüb.

Quyuda elektrik enerjisi ilə işləyən su motoru işlək vəziyyətdə olduğundan, cərəyan R.İbadovanı öldürüb.

***

Bu gün səhər saatlarında Azərbaycanın bir sıra bölgələrində zəlzələ olub.

Sakinlərin bildirdiyinə görə, yeraltı təkan paytaxt Bakı ilə yanaşı Gəncə, Mingəçevir, Ağdam, Füzuli, Biləsuvar, Xaçmaz, Tovuz, Yevlax, Gədəbəy, Zaqatala, Balakən, Şəki, Ucar, Göyçay, Ağdaş, Şamaxı, İsmayıllı və digər rayonlarda hiss olunub.

Mingəçevir sakinlərinin azvision.az verdiyi məlumata görə, zəlzələdən təşvişə düşən sakinlər evlərini tərk etməyə başlayıblar.

Mingəçevir rayon İcra Hakimiyyəti də faktı təsdiqlədi.

Bildirilib ki, hələlik dəyən ziyan barədə məlumat yoxdur. Hazırda zəlzələ ilə bağlı araşdırma aparılır.

***

AMEA Respublika Seysmoloji Xİdmət Mərkəzi ölkə ərazisində baş verən zəlzələ ilə bağlı rəsmi məlumat yayıb.

Bildirilib ki, yerli vaxtla saat 09:49:36-da Şəkidən 29km aralı Şəki ərazisində zəlzələ qeydə alınıb.

Zəlzələ episentrdə 7 bal, yaxın yaşayış məntəqələrində 6-5 bala qədər hiss olunub.

***

Ölkənin aran zonasında zəlzələ olub.

Bunu Trend-ə Yevlax sakinləri məlumat veriblər. Verilən məlumata görə, zəlzələ hiss olunub. Yerli sakinlər təşvişə düşüb.

Gələn məlumatlara görə, zəlzələnin təkanları Mingəçevirdə, İsmayıllıda, Ağcabədidə, Şirvanda, Şamaxıda, Göyçayda, Ağdaşda və başqa yaxın rayonlarda da hiss edilib.

Respublika Seysmoloji Xidmət Mərkəzinin əməkdaşı Tahir Məmmədov oxu.az-a bildirib ki, zəlzələnin olması ilə bağlı hazırda araşdırma aparılır.

AMEA Respublika Seysmoloji Xidmət Mərkəzindən APA-ya verilən məlumata görə, zəlzələ bu gün saat 09.49-da Şəki arazisində qeydə alınıb.

Zəlzələ episentrdə 6 bal, yaxın yaşayış məntəqələrində 4 bala qədər hiss olunub.

Zəlzələnin dərinliyi 13 km olub.

Dağıntılar və xəsarət alanlar barədə hələlik məlumat yoxdur.

Xatırladaq ki, bir neçə gün əvvəl də Şəkidə zəlzələ olmuşdu.