Prokurorluq ər-arvadın cəzasını artırılmasını istədi, məhkəmə onlardan birinnin cəzasını 10 ilə qədər artırdı

İrandan Azərbaycana külli miqdarda narkotik vasitə gətirməkdə ittiham olunan Bərdə şəhər sakini Zeynal Cəfərov və Bakı şəhər sakini Səadət Abbasovanın cinayət işi üzrə məhkəmə prosesi başa çatıb. İttihama görə, Zeynal Cəfərov 16 aprel 2014-cü ildə vətəndaş nikahında olduğu Səadət Abbasova və şəxsiyyəti istintaqla müəyyən edilməmiş İran İslam Respublikası vətəndaşı ilə cinayət əlaqəsinə girib.

Zeynalın göstərişinə əsasən Səadət Abbasova aprelin 17-də Astara Gömrük İdarəsindən keçməklə İran İslam Respublikasına gedib. O, apreli 20-də Ərdəbil şəhərində cinayətkar qrupun istintaqla müəyyən edilməmiş üzvündən külli miqdarda - 500,104 qram narkotik vasitə olan heroin əldə edib.

Səadət Cəfərova malların aşkar edilməsini çətinləşdirən üsullardan istifadə etməklə həmin narkotik vasitə olan heroini 257,799 qram və 242,305 qram olmaqla iki bağlamada qablaşdıraraq ssaxlayıb. O, narkotik vasitə heroin olan bağlamalarından birini əynindəki tumanının altında, digərini isə qoltuğunun altında yerləşdirib. Səadət aprelin 21-də, saat 17 radələrində Astara Gömrük İdarəsinin sərnişin şöbəsindən narkotik vasitəni gizli olaraq keçirib.

“Bir neçə dəfə məhkum olunmuşam”

Təqsirləndirilən şəxslər Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən narkotik vasitələrin təkrar qaçaqmalçılığı), 234.4.1-ci, 234.4.2 və 234.4.3-cü (qabaqcadan əlbir olan bir qrup şəxs tərəfindən külli miqdarda narkotik vasitələri əldə etmə, daşıma, saxlama və ya satma, təkrar törətmə) maddələri ilə ittiham ediliblər. Lənkəran Ağır Cinayətlər Məhkəməsinin hökmü ilə Zeynal Cəfərov 9 il, Səadət Abbasova 8 il müddətinə azadlıqdan məhrum edilib.

Hökmdən narazı qalan Baş Prokurorluq təqsirləndirilən şəxslərin cəzalarının ağırlaşdırılması ilə bağlı apelyasiya protesti verib. Həmçinin təqsirləndirilən şəxslər də cəzalarının yüngülləşdirilməsi barədə apelıyasiya şikayəti veriblər. Hər iki şikakayət araşdırılması üçün Şirvan Apelyasiya Məhkəməsinə göndərilib. Apelyasiya instansiyasında iş hakim Ələsgər Novruzovun sədrlik etdiyi kollegiyada araşdırılıb.

Məhkəmədə ifadə verən Zeynal Cəfərov elan olunmuş ittiham üzrə özünü təqsirli bilib. O, bildirib ki, uzun müddətdir narkotik maddələrdən istifadə edir, narkomaniya xəstəsidir: “Əvvəllər narkotik vasitədən istifadə etdiyimə görə bir-

neçə dəfə məhkum olunmuşam. Həbsxanada olduğum zaman tanış olduğum İran vətəndaşı Yadulla adlı şəxs söhbət zamanı mənə İranın Parsabad şəhərində ailəsi və Vahid adında oğlu olduğunu deyib. Sonuncu dəfə 2007-ci ildə narkotik vasitədən istifadə etdiyimə görə 3 il müddətə azadlıqdan məhrumetmə cəzasına məhkum olunub və 2010-cu ilin əvvəllərində cəzamı çəkdikdən sonra azadlığa buraxıldım”.

“Banka borcum olduğu üçün məni sərhəddən buraxmadılar”

Təqsirləndirilən şəxsin sözlərinə görə, azadlığa çıxdıqdan sonra Səadət Abbasova ilə tanış olub, sonra isə qeyri-rəsmi olaraq ər-arvad kimi birlikdə kirayə ev tutaraq yaşayıblar: “2010-cu ilin avqust ayında İranın Parsabad şəhərinə getdim. Orada həbsxanada tanış olduğum Yadullanın oğlu Vahidlə görüşdüm. Vahidlə görüşən zaman özümün istifadə etməyim üçün “kokos” (narkotik vasitə heroin) istədim. Vahid də atasının təzə tutulduğunu, bir müddət keçdikdən sonra narkotik vasitə tapmaq üçün mənə xəbər edəcəyini bildirdi. Mən də Vahidlə razılaşdım. 2014-cü ilin yanvarın 15-də Vahidlə yenidən əlaqə saxladım. Ondan “kokos” almaq məqsədilə İrana getmək istədim. Lakin banka borcum olduğu üçün məni sərhəddən buraxmadılar. Aprel ayında arvadım Səadətin ayağında ağrıları olduğundan müalicə olunmaq üçün qızmı Sima ilə birlikdə İranın Ərdəbil şəhərinə getdilər. Onlar 2 gün orada qaldıqdan sonra evə qayıtdılar. Həmin vaxtdan bir az sonra evdə Səadət ayağını əməliyyat etdirmək üçün İrana gedəcəyini bildirdi. Həmin vaxt Səadətə dedim ki, İranda Vahid adlı tanışı var, Vahidə zəng edərək onu həkimə aparmağı, qayıdanda da Vahid mənim üçün narkotik vasitə hesab olunan “kokos” verəcək, həmin narkotik maddəni gətirməyi dedim. Səadətdə narkotik maddələrdən istifadə etdiyim üçün mənimlə razılaşdı. Sonra istifadə etdiyim mobil telefondan Vahidin telefonuna zəng etdim. Söhbət əsnasında Vahidə həyat yoldaşım Səadətin müalicə olunmaq üçün İrana gedəcəyini, ona köməklik edərək xəstəxanaya aparmasını, geri qayıdanda isə mənim üçün bir az narkotik vasitə olan “kokos” göndərməsini xahiş etdim. Vahid də mənimlə razılaşdı”.

“2400 dollarlıq narkotik maddə sifariş vermişəm”

Zeynal Cəfərov qeyd edib ki, Səadət aprelin 17-də İrana gedən vaxtı Vahidin nömrəsini ona verdim: “Səadətə 2400 ABŞ dolları verdim, sonra isə Səadət və qızım Simanı taksi ilə Astara rayonuna gətirdim. Onları Astara gömrüyündən İrana yola saldım. Səadətgil İrana gedəndən sonra Vahidlə əlaqə saxladım. Söhbət zamanı Vahid sifariş etdiyim narkotik vasitəni Səadətə verdiyini və onların aprel ayının 22-də geri qayıdacaqlarını bildirdi. Aprelin 22-də evdə olan zaman bir neçə nəfər mülki geyimli şəxslər yaşadığım evə gələrək özlərini Dövlət Gömrük Komitəsinin əməkdaşları kimi təqdim etdilər və məni gömrük idarəsinə apardılar.

Gömrük Komitəsində olarkən bildim ki, Səadət sərhəddi keçən zaman üstündə narkotik vasitə ilə tutulub. Orada dindirilərkən etiraf etdim ki, Səadətin İranda Vahiddən alaraq gətirdiyi narkotik maddəni özüm sifariş etmişəm və həmin narkotik maddə mənə məxsusdur. Narkotik maddənin çəkisinin nə qədər olmağını bilməmişəm. Vahidə verdiyim 2400 dollarlıq narkotik maddə sifariş vermişəm. Həmin narkotik maddəni özümün istifadəm üçün sifariş vermişəm, satmaq məqsədim olmayıb. Əməlimdən peşmanam”.

“Ərim bir neçə dəfə məhkum olunub”

Digər təqsirləndirlən Səadət Abbasova bildirib ki, əvvəllər narkotik maddələrdən istifadə etdiyinə görə bir dəfə məhkum olunub: “1995-ci ildə Zeynal Cəfərovla tanış olmuşam. Həmin vaxtdan ər-arvad münasibətində olmaqla birlikdə yaşamağa başlamışam. Ərim Zeynal da narkotiklərdən istifadə etdiyinə görə bir neçə dəfə məhkum olunub. Zeynal 2007-ci ildə narkotikdən istifadə etdiyinə görə məhkum olunub və 2010-cu ildə azadlığa çıxmışam. Zeynal azadlığa buraxıldıqdan sonra birlikdə Nəsimi rayonu, H.Əliyev küçəsi, ev 1, mənzil 12-də yaşamağa başlamışıq. Qızım Sima da mənimlə birlikdə mənzildə yaşayırıq. Ayağımda ağrılar olduğundan müalicə olunmaq üçün aprelin 4-də İranın Ərdəbil şəhərinə getdim. Qızım Sima da mənimlə birlikdə olub. Ərdəbil şəhərində olan xəstəxanada həkimə müraciət etdim. Lakin pulum olmadığı üçün əməliyyat oluna bilməmişəm Həkim aprel ayının 16-dan sonra gəlməyimi bildirdi. İki gündən sonra geri qayıtdım. Aprelin 16-da Zeynala dedim ki, ayağımı əməliyyat etdirmək üçün İrana gedəcəkəm. Zeynal da İranda Vahid adlı tanışı olduğunu və Vahidin məni həkimə aparacağını dedi”.

“Narkotik vasitələri ayrı-ayrı bağlamalara bükdüm”

Təqsirləndirilən şəxs daha sonra ifadəsində Zeynal Vahidin ona narkotik vasitə verməsindən, bunun üçün 2400 dollar verməsindən, sonra da gömrükdən İrana yola salmasından danışıb. Onun sözlərinə görə, İrana gedərkən üstündə Zeynalın ona verdiyi 2400 ABŞ dollar və özünün əməliyyat olunması üçün götürdüyü 1600 ABŞ dolları olub: “İran tərəfə keçdikdən sonra Vahidə zəng etdim. Vahid taksi sürücüsü olduğundan avtomobilinə minərək Ərdəbil şəhərinə gəldik. Həmin gecə qızım ilə Ərdəbil şəhərində mehmanxanada qaldıq. Aprelin 18-də Vahidlə görüşərkən ayağımın əməliyyat etdirəcəyimi dedim. Vahid nə qədər pulum olduğunu soruşdu. Üstümdə 4000 ABŞ dolları olduğunu bildirdim. Vahid təklif etdi ki, 4000 ABŞ dollarlıq narkotik maddə “kokos” verə bilər, bu narkotik vasitəni aparıb satandan sonra yenidən gələrək ayağımı əməliyyat etdirə bilərəm. Vahidin təklifi ilə razılaşdım. Aprelin 19-da Vahidə 4000 ABŞ dolları verdim. Səhərigün Vahid bir ədəd bağlamada narkotiki gətirdi. Həmin vaxt istifadəm də olan

telefonun nömrəsini Vahidə verdim. Vahid də sərhədi keçəndən sonra əlaqə saxlamam üçün mənə bir nömrə verdi. Bundan sonra Vahiddən ayrılaraq otelə getdim. Oteldə qızım Simanın otaqda olmadığını gördüm və Vahiddən aldığım bağlamanı açaraq iki yerə böldüm. Narkotik vasitələri ayrı-ayrı bağlamalara bükdüm”.

“Gizlətdiyim bağlama aşkar edildi”

Səadət Abbasova bildirib ki, aprelin 21-də, səhər saatlarında həmin bağlamaların birini alt paltarında, digərini isə sol qoltğunun altında gizlədib: Bundan sonra qızım ilə birlikdə geri qayıtmaq üçün Astara gömrüyünə gəldilər. Astara gömrüyündə pasport qeydiyyatından keçdikdən sonra əl yükləri ilə yoxlama yerində olan gömrük əməkdaşlarına yaxınlaşdım. Gömrük bəyannaməsini doldurandan sonra gömrük əməkdaşına təqdim etdim və bildirdim ki, üstümdə və əl yüklərimdə qadağan olunmuş heç bir şey yoxdur. Sonra məni və qızımı şəxsi yoxlama aparmaq üçün otağına apardılar. Yoxlama otağında olan pərdənin arxasında olarkən gömrük əməkdaşının arxası ona tərəf olmasından istifadə edərək qoltuğumun altında gizlətdiyim bağlamanı çıxardım, yoxlama xəttində olan rəfin üstündəki sellofan torbaların arxasına qoydum. Sonra isə orada üstümə baxış keçirildi. Baxış zamanı tumanının altında gizlətdiyim bağlama aşkar edildi. Gömrük əməkdaşı yenidən şifahi sorğu-sual edərək üzərimdə yenə də narkotik maddənin olub-olmamasını soruşdu. Gömrük əməkdaşlarına rəfin üzərində olan sellofan torbanın arxasına gizlətdiyim bağlamanın yerini bildirdim. Gömrük əməkdaşları da rəfin üstündə olan sellofan torbaların arxasına qoyduğum paketi oradan götürdülər. Gömrük əməkdaşları bağlamaların içərisində nə olduğunu soruşdu, həmin bağlamaların içərisində narkotik maddə hesab olunan “kokos” olduğunu bildirdim”.

Hakim kollegiyası sonda Baş Prokurorluğun apelyasiya protestinin təmin edilməsi barədə qərar elan edib. Qərara görə, Lənkəran Ağır Cinayətlər Məhkəməsinin hökmü Zeynal Cəfərova aid hissədə dəyişdirilib və onun cəzası 10 ilə qədər artırılıb. Təqsirləndirilən şəxslərin apelyasiya şikayəti təmin edilməyib.

gundemxeber.az