Sumqayıt Apelyasiya Məhkəməsində qətl hadisəsi törətməkdə təqsirli bilinən 1986-cı il təvəllüdlü Vüsal Xəlilovun cinayət işi üzrə məhkəmə prosesi başa çatıb. İttihama görə, ötən il dekabrın 8-nə keçən gecə, saat 01.30 radələrində Sumqayıt şəhəri, 41-ci məhəllə, Bakı küçəsindəki 2 saylı yataqxananın arxasında Laçın rayon sakini, 1990-cı il təvəllüdlü Toğrul Astanovun meyiti tapılıb.

Meyitin üzərində zorakılıq əlamətləri müəyyən edildiyindən Toğrul Astanovun qətlə yetirildiyi üzə çıxıb. Həmin gecə cinayəti törədən Vüsal Xəlilov könüllü olaraq 3-cü polis bölməsinə gələrək, təslim olub.

Müəyyən olunub ki, dekabrın 7-si axşam saat 23 radələrində məhəllədə fəaliyyət göstərən çayxanada Vüsalla Toğrul arasında 10 manata görə mübahisə yaranıb. Vüsal Xəlilov bir müddət əvvəl Toğrul Astanova borc verib və həmin gecə pulunu geri istəyib.dikdə, sonuncu borcunu qaytardığını iddia edib, əvvəl çayçıda, sonra isə küçədə yumruq və təpik ataraq, ona dərəcələri təyin olunmayan xəsarətlər yetirib. Vüsal evlərinə gedib və bıçaq götürərək geri qayıdıb. O, Toğrula münasibətlərinə

aydınlıq gətirməyi təklif edib və birlikdə avtomobil yollarının arasında yerləşən xiyabana gəliblər. Orada Vüsal Xəlilov qəflətən Toğrul Astanovun sol döş nahiyəsinə bir zərbə endirərək, onu öldürüb.

Vüsal Xəlilov Cinayət Məcəlləsinin 120.1-ci (qəsdən adam öldürmə) maddəsi ilə ittiham edilib. Bakı Ağır Cinayətlər Məhkəməsinin hökmü ilə Vüsal Xəlilov cəzasını ciddi rejimli cəzaçəkmə müəssisəsində çəkməklə 13 il müddətinə azadlıqdan məhrumetmə cəzasına məhkum olunub. Hökmdən narazı qalan Vüsal Xəlilov apelyasiya şikayəti verərək cəzasının yüngülləşdirilməsini istəyib. Apelyasiya instansiyasında işə hakim Fərmayıl Zeynallının sədrlik etdiyi kollegiyada baxılıb.

Məhkəmə prosesində ifadə verən Vüsal Xəlilov elan olunan ittiham üzrə özünü tam təqsirli bilib. O, ifadəsində həmin axşam çayxanada bir neçə bokal pivə içdiyini və baş verən sonrakı hadisələri tam yadında saxlamadığını göstərib: “Sonra ora gələn Toğrul mənə sataşmağa başladı. Toğrul Astanov məndən aldığı 10 manatı qaytardığını bildirdi. O, pulu başqa uşaqların yanında mənim boynuma qoymaq istədi. Amma onu pulu qaytarmadığını dedim. Bu səbəbdən Toğrul var-yox söyüşü söydü. Toğrul məndən fiziki cəhətdən güclü olduğu üçün ona cavab vermədim və uşaqların yanında çox pərt oldum”.

Vüsal Xəlilovun sözlərinə görə, çayxananın sahibi dava-dalaş olacağından ehtiyatlandığına görə obyekti bağlayıb: “Çölə çıxdıqda Toğrul Astanov mənə əl-qol ataraq, xəsarətlər yetirdi. Bundan əsəbiləşərək evə qgetdim və anamın yatdığı gördüm . Evdən bıçaq götürərək aşağı düşdüm. Toğrulla yataqxananın arxasına çəkildikdə mübahisə etdim. Ondan başqa uşaqların yanında alçaltmamasını və söyməməsini xahiş etdim. Cavab olaraq Toğrul yenə də mənə qarşı söyüş söydü. Onun bu sözləri götürə bilmədim. Gödəkçəmin altından çıxardığım bıçaqla Toğrulun ürək nahiyəsinə qüvvətli zərbə endirdim və bıçağı orada tullayaraq, 3-cü polis bölməsinə gəldim. Polislərə adam öldürdüyünü bildirəndən sonra təsilm oldum”.

Zərərçəkən Cəmşid Astanov bildirib ki, dekabrın 7-də, gecə 2 radələrində Ramin adlı qardaşı zəng edərək Toğrulun “Emil” marketin qarşısında bıçaqlandığını deyib: “Dərhal ora gəldim. Orada təcili yardım işçilərini gördüm və sinəsindən yaralanan qardaşımı həkimlərlə birlikdə xəstəxanaya çatdırdıq. Orada növbətçi həkim qardaşımın artıq keçindiyini bildirdi”.

Hakim heyəti tərəfləri dinləyəndən sonra qərar elan ediblər. Qərara görə, Vüsal Xəlilovun apelyasiya şikayəti qismən təmin edilib və onun cəzası 10 il 6 aya endirilib.

gundemxeber.az