38 milyon manatla bağlı qalmaqallı məhkəmədə şok
isimlər - Kəmaləddin Heydərovun müavini, Məhərrəm Əliyevin
oğlu, Arzu Kazımovun qohumu və bir neçə sabiq polis zabiti

Bir neçə il əvvəl ayrı-ayrı əmanətçilərin 38 milyon manatını dələduzluq yolu ilə mənimsəmiş "Texnikabank" ASC-nin (Bu bankın Müşahidə Şurasının sədri və pay sahibi olan Etibar Əliyevin həbsindən sonra adı dəyişdirilib-F.Ə.) Bakı Filialının sabiq rəhbəri Zal Yusifov və oğlu İslam Yusifov da daxil olmaqla, 14 nəfərin cinayət işi üzrə Ali Məhkəmənin ötən ay çıxardığı hökm zərərçəkənləri narazı salıb. Artıq zərərçəkənlər həbsdə olan bankir və yaxınlarının hərəkətləri səbəbindən vurulan zərərin ödənilməsi məqsədi ilə hüquqi müstəvidə yenidən mübarizəyə başlayıblar. Onlar əvvəlcə Bakı Ağır Cinayətlər Məhkəməsinə hökmdən yenidən şikayət etmək üçün müraciət ünvanlayıblar. Həmin məhkəmənin verdiyi qərar üzrə isə Bakı Apellyasiya Məhkəməsinə üz tutublar. Artıq qarşıdakı həftədən Bakı Apellyasiya Məhkəməsində ölkədə böyük səs-küyə səbəb ola biləcək yeni məhkəmə prosesinə start veriləcək.
Baş verənlər haqda yazan "reytinq"ə daxil olan məlumata görə, ötən ay Ali Məhkəmə Bakı Ağır Cinayətlər Məhkəməsinin bir neçə il əvvəl verdiyi hökmdə dəyişiklik edərək, iş üzrə gözlənilməz qərar verib: "Ali Məhkəmə Cinayət Məcəlləsinin 178.3.1, 178.3.2, 313, 320.2, 179.3.1 və 179.3.2-ci maddələri ilə əmlakı müsadirə olunmaqla 15 il müddətinə həbs olunmuş Zal Zakir oğlu Yusifov, CM-nin 178.3.1 və 178.3.2-ci maddələri ilə 8 il həbsə məhkum olunmuş oğlu İslam Yusifov və CM-nin 32.5, 178.3.2 və 32.5, 179.3.2-ci maddələri ilə cəzalandırılan qardaşı Camal Zakir oğlu Yusifov və digər yaxın qohumlarından (Behbudov Vüqar Ќüsrət oğlu, Məmmədova Səmayə Hacan qızı, Əhmədov Rauf Vaqif oğlu, Hüseynov Ülvi Sərdar oğlu, Hüseynov Fəxri Müseyib oğlu, Sultanov İntiqam Bahəddin oğlu, Mürsəlov Məhəmməd Təmraz oğlu, Həsənov Elşən Həsən oğlu, Ќəsirov Dağıstan Aslan oğlu, Həsənov Akif Mayıl oğlu, Zeynalov Mübariz İlyas oğlu və Qasımov Saleh Həmid oğlu) ibarət olan dəstənin işi üzrə verilmiş hökmdə dəyişiklik edib. Ali Məhkəmənin qərarı ilə adıçəkilənlər zərərçəkənlərə vurduqları zərəri ödəməkdən azad olunublar. Bundan əlavə, onların əmlaklarının müsadirəsi ilə bağlı hissə də hökmdən çıxarılıb. Bu isə illərdir dələduzluq yolu ilə vəsaitləri mənimsənilmiş zərərçəkənləri narazı salıb. Artıq onlar Ali Məhkəmə tərəfindən ləğv olunmuş Bakı Ağır Cinayətlər Məhkəməsinin hökmündən apellyasiya şikayəti vermək üçün hüquqi yollara əl atıblar. Bakı Ağır Cinayətlər Məhkəməsi iş üzrə zərərçəkənlərin müraciətinə 31 yanar 2013-cü ildə baxıb. Lakin bu məhkəmənin həmin tarixdə verdiyi qərar məsələni bir qədər də qəlizləşdirib. İndi zərərçəkənlər Bakı Apellyasiya Məhkəməsinə müraciət edərək, Ali Məhkəmənin hökmündən şikayət vermək üçün ötürülmüş müddətin bərpasını xahiş edirlər".
Aldığımız məlumata görə, ümumilikdə 38 milyon manatları batmış zərərçəkənlərin verdiyi şikayət artıq Bakı Apellyasiya Məhkəməsi tərəfindən icraata qəbul olunub: "Zərərçəkənlərin şikayəti Bakı Apellyasiya Məhkəməsinin hakimi Rizvan Səfərovun icraatına verilib. Hakim Rizvan Səfərov Zal Yusifov, Vüqar Behbudov, Səmayə Məmmədova, İslam Yusifov və qeyrilərinin barələrindəki hökmdən Bakı Ağır Cinayətlər Məhkəməsinin 31 yanvar 2013-cü il tarixli qərarı ilə apellyasiya şikayəti vermə müddətinin bərpası üzrə verilmiş ərizəyə fevralın 20-də, saat 14.30-da baxacaq".
Məlumatlı şəxsin sözlərinə görə, iş üzrə zərərçəkənlər arasında ölkənin tanınmış simaları da var. Bunlar Bakı Baş Polis İdarəsinin sabiq rəisi, hazırda Prezident Administrasiyasında işləyən general Məhərrəm Əliyevin oğlu Polad Əliyevdən tutmuş, Yasamalın keçmiş polis rəisi Zakir Babayev, həmçinin Ќərimanov yol polisinin Ənvər adlı əməkdaşı və digər tanınmış şəxslərdir: "Məhərrəm Əliyevin oğlunun 300 min avrosunu mənimsəyiblər. Elə şəxs də var ki, onun 1,5 milyon manatı ələ keçirilib. Həmin məbləğin müəyyən hissəsi geri ödənilsə də, borc tam bağlanmayıb".
Məlumatlı şəxs bildirib ki, Zal Yusifovun cinayət işində ötən ilin noyabr ayında ABU rektoru Elşad Abdullayevin şikayətləri əsasına həbs olunmuş Arzu Kazımovun qayının da adı hallanır: "Arzu Kazımovun qayını "Kapitalbank"ın "Tərəqqi" Filialının müdiri işləmiş Hüseyn Səfərovun da adı Zal Yusifovun dələduzluq əməlində çəkilir. Bu, o Hüseyn Səfərovdur ki, hazırda həbsdədir. Onu da dələduzluq yolu ilə "Kapitalbank"dan 50 milyon manatı mənimsəməkdə ittiham ediblər. Onun ittiham aktında isə Fövqəladə hallar naziri Kəmaləddin Heydərovun müavini Etibar Mirzəyevlə bərabər, Arzu Kazımovun qardaşının da adı çəkilirdi. Lakin sonradan onların adları istintaq materiallarından çıxarıldı".
Mənbəmiz bildirib ki, zərərçəkənlər məhkəmə ilə bərabər, ictimai yöndə də fəaliyyətlərini mərkəzləşdirmək istəyirlər. Onların bəziləri mətbuat konfransı keçirərək, bu və ya digər məsələləri ictimaiyyətin diqqətinə çatdırmaq fikrindədirlər.