Bu gün Səttar Bəhlulzadə adına mədəniyyət sarayında AXCP Etimad Qurultayi keçirilib. 1200 nəfərin iştirak etdiyi qurultayı AXCP EQTK-nın sədri Razi Nurullayev açaraq, iştirakçıları salamlayıb. Daha sonra dövlət himni səsləndirilib. AXCP EQTK sədrinin təklifi ilə Azərbaycan Xalq Cümhuriyyətinin yaradıcısı Məhəmməd Əmin Rəsulzadənin, AXC və AXCP-nin keçmis sədri, ölkəmizin ikinci prezidenti Əbülfəz Elçibəyin, eləcə də torpaqlarımızın azadlığı və bütövlüyü uğrunda canlarını qurban verən şəhidlərin ruhu bir dəqiqəlik sükutla yad edilib.Daha sonra Mandat Komissiyasının hesabatı dinlənilib. Komissiyanın məlumatına görə, qurultayda 212 nəfər qurultay nümayəndəsi iştirak edir. Buna görə də qurultay tam səlahiyyətli elan olunub. Razi Nurullayev, Rafiq Daşdəmirli və Rəfail Becanovdan ibarət sədarət seçidikdən sonra gündəlik təsdiqlənib. Bundan sonra çıxış üçün söz AXCP EQTK-nın sədri Razi Nurullayevə verilib.



“Xalq lider axtarır”

Razi Nurullayev Etimad Qurultayinda geniş nitqlə çixis edib. Razi Nurullayev ilk öncə Etimad Qurultayının keçirilməsinin məqsədindən danışıb: “1988-ci ildə başlayan Milli Azadlıq Hərəkatının qarşısına qoyduğu məqsəd və vəzifələr həyata keçirilməyib. Müstəqillik əldə olunub, ancaq sosial-siyasi, hüquqi vədlər yerinə yetirilməyib. Müxalifət olaraq xalqa verdiyimiz sözü tuta bilmədik. Xalqa vəd etdiyimiz ağ günü göstərə bilmədik. Birbaşa olaraq xalqın yanında ola bilmədik. Çox acı haldır ki, 10 illiklər ərzində xalqın yanında olduğu deyilən insanlar bunu edə bilmədi. Əbülfəz Elçibəyin yaratdığı AXC hər bir ailəni əhatə edirdi. Amma bu gün belə deyil. Elçibəy xalqın adamı idi, səmimi idi, ürəyi xalqla vururdu. Fərqli düşünənlər ola bilərdi, o, çox humanist insan idi. Bu gün belə insanlara ehtiyac var. Zaman-zaman AXC partiyaya çevrildi, ancaq öhdəliklərini yerinə yetirə bilmədi, xalqdan ayrı düşdü. Bunun birbaşa günahkarı kimi Əli Kərimli və digər müxalifət liderlərini görürəm. 10 illiklərlə aparılan bir siyasət müsbət nəticələnmirsə, onlar kənara çəkilməli idilər. Bir lider söz verirsə, nəticə ilə bağlı öhdəlik götürürsə, xalqa vəd verirsə, nəticə göstərməlidir. Əks təqdirdə kənara çəkilməlidir. Bu gün 20 ildir nazir postu tutanlar, icra başçısı, nazir mavinləri var. Bu, bizə xoş deyil. Xalqın güzəranı xoş deyil. Xalqın yarıdan çoxu işsiz vəziyyətdədir, cibində 1 manat yoxdur. Budurmu siyasət? Amma bu zülmə qarşı biz necə dayandıq? Xalq ayaqdadır, əslində müxalifət olaraq xalqı aparacaq insan olmadı. Kürsüdə oturmağa üstünlük verdilər. Xalq da nəticə olmadığına görə başsız qalıb, lider axtarır, yeni sima görmək istəyir, həyatının yaxşılaşmasını istəyir, bahalı maşınları görüb ürəyi bulanır, istəyir ki, uşağı yaxşı təhsil alsın, məmur övladı kimi xaricdə oxusun. İqtidarda təmsil olunanların yox, həm də müxalifət adına iddialı olan yalançı liderlərin də övladları xaricdə oxuyur, sosial problemləri yoxdur. Amma hər bir cəbhəçi zülm içində yaşayır, onlar isə boş vədlər verir. Biz ona görə yarandıq ki, buna “yox” deyək”.

“Biz iqtidara, YAP-a, İlham Əliyevə müxalifətdəyik”

Daha sonra Razi Nurullayev tezislər şəklində bəzi məsələlərə münasibət bildirib. İlk öncə ünvanlarına səsləndirilən ittihamlara cavab verib: “Bizi günalandırırlar ki, sərt tənqid etmirik. Bəyan edirəm ki, biz müxalifətyönümlüyük, hazırkı iqtidara, İlham Əliyevə, YAP-a qarşı müxalifətdəyik. Amma söyüş söyə, təhqir edə bilmərik. Ən real müxalifətik, qanun çərçivəsində mübarizə aparacağıq. Siyasi məhbusların şəklini burda görmürəm. 30-dan çox mətbəə ilə danışdıq, bir neçəsi söz verdi siyasi məhbusların fotolarını çap etməyə. Amma sonra heç bir mətbəə bunu üzərinə götürmədi. Qorxdular, YAP-dan qorxdular, polis zülmündən qorxdular, bu, düzgün siyasət deyil. YAP-a, onun rəhbərliyinə, iqtidara səslənirəm- məənvi təhdiqlə demokratik dövlət qurmaq olmaz. Cibə narkotik atıb, həbs edib, övladları universitetdən qovmaqla onları düz yoldan çəkindirməməlisiz. Azərbaycana normal mədəni siyasət gətirmək istidarında olan müxalifət bizik. Hökumətə, YAP-a təkliflərimizi burdan bildiririk. Normal səviyyəli müxalifət yoxdursa, normal hökumət qurmaq mümkün deyil. Müxalifət olmalıdır ki, qanunsuzluqları iqtidarın üzünə desin. Hakimiyyətin qanunsuzluğu olacaqsa, müxalifət bunu deməli, iqtidar da bunu normal qarşılamalıdır. Əgər Yap “biz yaxşıyıq” deyirsə, o zaman biz ondan da yaxşıyıq. Əgər müxalifət pisdirsə, o zaman YAP və hökumət bizdən də pisdir. Sistem belə qurulmalıdır. Hökumətlə danışıqlara gedə bilərik, təklif verək ki, cəmiyyətə normal olan nədir. Əgər razılaşmayacaqsa, o zaman bunu da xalqa çatdıracağıq. Deyəcəyik ki, özləri tək idarə etmək istəyirlər, bu isə yolverilməzdir. Xalqımıza böyük sərvətlər verilib, amma elə rayon var ki, qaz yoxdur, meyvə ağacını kəsib qızınırlar. Qazı dünyaya satıır, amma öz vətəndaşımızın evində qaz yoxdur. Özünə müxalifət deyən liderlər zamanında buna nail ola bilərdilər. Amma öz kreslolarını düşündülər, heç bir danışığa getmədilər, öz nüfuzlarını məhv etdilər. Əli Kərimlinin xalq vəd etdiyi qəhrəmanlıq formulu bilirsinizmi nədir? Hökuməti, bizi, onu tənqid edənləri təhqir etmək. Biz onu təhqir etmədik, onun siyasətini tənqid etdik, onlar isə bizə söyüş söydülər, hətta analarımıza belə söyüş söyməkdən çəkinmədilər. Onaların bir çoxu Əli Kərimli ilə çiyin-çiyinə dayanan insanlardır. Bu gün də bu siyasət davam edir. Belə sistem yaradılıb ki, hər cümlənin başında İlham Əliyevin, Ramiz Mehdiyevin, YAP-ın adını çəkmək qəhrəmanlıq sayılr. Amma bu, qəhrəmanlıq deyil. Bu insanlarda ikrah hissi yaradır. Bu gün deyim, gəlib bizi burda döysünlər, sizi həbsxanaya aparsınlar. Mən qəhrəman olacağam. Hər yerə şəkillərim vurulacaq. Nə baş verəcək? Mənə investisiya qoymaq istəyənlər artacaq, mən normal yaşayacağam, sizlər isə problemlərlə üzləşəcəksiniz. Mən belə yalançı qəhrəmanlıq istəmirəm. Zorla insanları polislə qarşıdurmaya göndərir. Gənclər ömrünün 7-8 ilini həbsdə çürüyür, valideynlə həbsxana qarşısında boynu bükük dayanırlar. Budurmu siyasət? Biz güclənərək hökumətə təkliflərimizi qəbul etdirə bilərik. Xalq 100 minlərlə ayağa qalxanda İlham Əliyevə və komandasına təkliflərimizi qəbul etdirə bilərik. Amma bu zalı dağıtmaq üçün bir polis alayı kifayət edər. Biz buna getməyəcəyik. Xalqın firavanlığı bizim üçün əsasdır”.



“Bizim siyasətimiz səviyyəsi ilə fərqlənəcək” Digər tezislərini də qısa şəkildə çatdıran Razi Nurullayev siyasətə yeni simaların gəlməsinin vacibliyini qeyd edib: “Xalqın ləyaqətli, savadlı insanları çoxdur. Xalqın adından danışa biləcək kifayət qədər gənclər var və onlar burdadır. O gənclər Etimad Qurultayındadır. Bu insanlar Azərbaycanın yeni tarixini yaradacaqlar. Dəyənək siyasətindən, ancaq fərdi maraqlar üzərində qurulan siyasətdən fərqlənəcək. Bütün idarələrdə, PA, MM-də gəncləşməyə ehtiyac var. O insanlar bu partiyadan çıxacaq. Bunun şahidi olacaqsınız. Bizim siyasətimiz nəticəsi, səviyyəsi, kübarlığı ilə fərqlənəcək”. “Siyasi məhbusların azadlığı üçün çalışacağıq” Siyasi məhbuslar məsələsinə münasibət bildirən Razi Nurullayev deyib: “Onların günahı hakimiyyəti tənqid etmək olub, bu gün həbsdədirlər, hətta biz onların şəkillərini burdan asa bilmədik. Amma onlar bizim ürəyimizdədir, onların azadlığı üçün çalışacağıq. Bizim dostlarımız olan Seymur Həzi, Akif Yusifli, İntiqam Əliyev, Leyla Yunus, Arif Yunus, Xədicə İsmayıl, onlarla digər insanlar həbsxanadadır. Onlara azadlıq arzulayırıq, hökumət özündə güc tapıb şər və böhranla həbs etdirdiyi bu insanları azad etməldiir. Valideynlərin göz yaşına yol vermək olmaq. Sabahdan daha çox zamanımızı buna sərf edəcəyik”.



“Qarabağla bağlı kompromisə gedə bilmərik” Dağlıq Qarabağla bağlı mövqeyini çatdıran Razi Nurullayev “Biz heç bir zaman Qarabağ üzərindən çirkin oyuna gedə bilmərik. Hər qarşı torpağımız əzizdir. Heç bir zaman, heç bir şərt altında Qarabağla bağlı bir kompromisə gedə bilmərik. Ərazi bütövlüyümüz ata-anamızdan, canımızdan, övladımızdan da müqəddəsdir” deyə vurğulayıb. “Azərbaycan Avropanın bir hissəsi olmalıdır” Avropaya inteqrasiyaya münasibətini bildirən Razi Nurullayev “İnsanlar yaxşı həyat üçün Avropaya üz tutur” deyib: “Səfirlik qarşısında növbədə dayananlar var. Avropada şəffaflıq, iş, gözəl təhsil, demokratiya, insan şəxsiyyətinə hörmət, qanun və qanunçuluq var. Ona görə də Azərbaycan Avropanın bir hissəsi olmalıdır. Azərbaycanda saf, sivil, kübar bir dövlət yaratmalıyıq. “Xalq ağır durumdadır” İqtisadi durumla bağlı danışan Razi Nurullayev hər bir Azərbaycan vətəndaşının indiki sosial vəziyyətinin ağırlığını vurğulayıb: “ İpoteka ala bilmir, hər kəs bankın girovuna çevrilib. İnsanlara daha çox sosial şərtlərlə kreditlər verilməli idi ki, insanlar girova çevrilməsin. Halbuki bunların heç biri olmadı və xalqın vəziyyəti günbəgün ağırlaşdı”.



Qonaqlar qurultaydan razıdır

Məruzədən sonra Qurulataya qatılan qonaqlardan Gürcüstanın keçmiş prezidenti Eduard Şevardnadzenin siyasi partiyalar üzrə köməkçisi Qriqoriy Kuçava təbrik nitqi söyləyib: “AXCP-nin Azərbaycan siyasi həyatında bundan sonra daha fəal mübarizəyə qoşulacağına inanıram. İnanıram ki, gələcək parlament və prezident seçkilərində partiya qələbə qazanacaq”. Qurultayın qonaqlarından daha biri, İberiya Televiziyasının prodüsseti Tina Şavadze də qurultay barədə təəssüratlarını bölüşüb. Siyasi mübarizədə AXCP-yə uğurlar arzulayan Tina Şavadze Azərbaycan-Gürcüstan dostluğunun davamlı olacağına əminliyini ifadə etdi. Qonaqlardan sonra məruzə ətrafında çıxışlar dinlənilib. Partiyanın Nəzarət- Təftiş Komissiyasına (NTK) 5 nəfər açıq səsvermə yolu ilə seçilib.

AXCP-nin Nizamnaməsinə tarixi dəyişiklik

Daha sonra AXCP-nin Nizamnaməsinə dəyişikliklər edildi. Dəyişikliyə əsasən AXCP sədri iki dəfədən artıq seçilə bilməz. Razi Nurullayev bu dəyişikliyin əhəmiyyətini vurğulayaraq onu “tarixi qərar” adlandırıb.

Alternativli seçki

Qurutayda partiya sədrliyinə səsvermənin gizli keçirilməsi qərara alınıb. AXCP Etimad Qurultayında partiya sədrliyinə namizədlər Razi Nurullayev, Mehman Muradli və Səbuhi Aslanbəyli olublar. Namizədlərə özlərini qurultay iştirakçılarına tanıtması üçün şərait yaradılıb.



AXCP-də şəffaf və gizli səsvermə

Hesablama Komissiyası yaradıldıb və qurultay nümayəndələrinə gizli səsvermə üçün yaradılan şəraitlə bağlı məlumat verilib. Bildirilib ki, səsvermə üçün 4 kabina və 2 şəffaf qutu təşkil olunub. Partiya sədrliyinə seçki 14:00-da baslayıb və gizli səsvermə yolu ilə keçirilib. Bir saat çəkən səsvermə prosesindən sonra səslər sayılıb. Hesablama Komissiyasının sədri Xətai Qasımlı Qurultaya səsvermənin nəticələri ilə bağlı məlumat verib. Qurultayina keçirilən səsvermədə Razi Nurullayev 165, Mehman Muradli 24, Səbuhi Aslanbəyli 14 səs toplayıb. Beləliklə Razi Nurullayev AXCP sədri seçilib. Razi Nurullayev AXCP sədri seçildikdən sonra rəqibləri olan Mehman Muradli və Səbuhi Əliyevi kürsüyə dəvət edərək, onların əlini sıxıb və bundan sonra da birgə olacaqlarını bildirib.


Əli Kərimliyə müraciət

Daha sonra AXCP sədri kimi çıxış edən Razi Nurullayev daim xalqın yaninda olacaqlarını bildirib: "Çətinliklərimiz olacaq. Ancaq lap Himalayı qarşımıza atsınlar, biz yol tapıb təmas quracağıq, xalqımızın və onun nümayəndələri olan sizlərin yanında olacağıq. Heç bir zaman sizlərin əziyyəti, əməyiniz üzərində qəhrəman olmaq istəməyəcəyik. Azərbaycanda dəyişiklik olacaqsa, bunun sonunda xoşbəxt həyat olacaqsa, bu, sizin əməyiniz, sizin qəhrəmanlığınız olacaq. Biz parlament seçkisində iştirak etmədik, çünki saxtakarlıqda iştirak etmək istəmədik. Çünki saxta seçkidə iştirak edərək xalqın vəkili olmaq mümkün deyil. Təyinatla olan mandata “yox” deyirik. Bizə sizin seçdiyiniz vəkil daha dəyərlidir. Sizin seçiminiz nəticəsində sizin hər birinizin vəkiliyik. Elçibətin istədiyi AXCP budur. Biz bunu qurduq və bərpa etdik. Bunun sonunda AXCP-ni zəbt edən, nəticəsiz siyasətə imza atan, Azərbaycan gənclərini həbsxanaya göndərən və bunun nəticəsində xalqı təqiblərə məruz qoyan Əli Kərimliyə deyirəm: Əsl AXCP burdadir. Azərbaycana xidmətin bu andan etibarən istefa verməyin ola bilər. Qoy sənin yanındakılar da bizim yanımızda, Elçibəyin qurduğu partiyada yer alsınlar".

Üzeyir Hacıbəyovun “Üvertura”sı səsləndirildikdən sonra qurultay bağlı elan olunub.

Cebhe.info