Oqtay Əliyev: “Hər dəfə qəbul şöbəsində olduqda, PA-nın səlahiyyətliləri bildirirlər ki, “get Gədəbəyə, rayon rəhbərliyinə lazımi tapşırıqlarımızı vermişik, probleminin həllinə köməklik edəcəklər” deyirlər

Gədəbəy rayon rəhbərliyinin qol qoyduğu əməllərdən, yerli sahibkarları olmazın zülmə salmasından, ünvanlanan şikayət ərizələrinə cavab verilməməsindən, bu günə qədər silsilə açıqlamalarla çıxış etmişdik. Yazıb bildirmişdik ki, ölkə rəhbərinin yerli sahibkarlarla bağlı verdiyi tapşırıqlara məhəl qoymayan Ramiz Yediyarov, bu gün də bu yöndə əməli addımlarını atmaqdadır.

Əslən Gədəbəydən olan və vaxtilə sahib olduğu 38 kvm-lik obyekti qanunsuz sökülən Əliyev Oqtay Qara oğlu bildirir ki, “20 oktyabr 2015-ci il tarixdə Gədəbəy rayon İcra Hakimiyyətinin başçısı Ramiz Yediyarov, yerli sahibkarlarla görüşsə də, keçirilən görüş fərqli məzmun daşıdı. Çünki, mən və bir neçə sahibkar keçirilən görüşdə iştirak etməyə cəhd etsək də, cəhdimiz baş tutmadı. Bu ona görə belə oldu ki, əgər keçirilən görüşdə biz də iştirak etsəydik, o halda rayon rəhbərliyinə deyəcəyimiz sözümüz və ünvanlayacağımız sualımız çox olacaqdı. Belə olan halda bir qrup sahibkarlar məcbur olduq ki, Bakıya gəlib problemlərimizin varlığını, bir daha Prezident Administrasiyasının rəsmilərinə çatdıraq.

22 oktyabr 2015-ci il tarixdə PA-nın qəbul şöbəsində olduq. Qəbul şöbəsində olan vəzifə sahibi, bizi Gədəbəy rayon üzrə olan koordinatorla da danışdıra bildi”. Oqtay Əliyev görüş zamanı onu da bildirir ki, “bu ilin 14 sentyabrında və 12 oktyabrında qəbul şöbəsində olsam da, hələ ki, ortada bir nəticə yoxdur. Çünki, hər dəfə qəbul şöbəsində olduqda, PA-nın səlahiyyətliləri mənə bildiriblər ki, “get Gədəbəyə, rayon rəhbərliyinə lazımi tapşırıqlarımızı vermişik, probleminin həllinə köməklik edəcəklər”. Amma, dəfələrlə icra hakimiyyətində olsam da, üzləşdiyim problemin həllinə bir kimsə köməklik etməyib və bir kimsənin də köməklik etmək fikri yoxdur. Elə ki, haqqımı tələb edirəm, bu zaman onların verdiyi cavab o olur ki, “get kimə istəyirsən şikayətini et” deyirlər

Əslən Gədəbəydən olan digər şikayətçilər, Məmmədov Qasım Nəriman oğlu və Mahmudov Natiq Nuru oğlu isə onu bildirirlər ki, “biz rayon rəhbərliyindən xahiş edirik ki, uçurulmuş obyektimizin müqabilində alacağımız kompensaiyanın ödənilməsinə, rayon rəhbərliyi öz köməkdarlığını etsin. Hal-hazırda ailəmizin durumu olduqca ağırdır və bu gün minbir problemlərlə də üz-üzə qalmışıq. Yeni ticarət mərkəzindən təklif olunan obyektlər isə, sənədsiz olduğundan və yöndəmsiz ərazidə yerləşdiyindən, bizim hər birimiz edilən təklifdən imtina edirik”.

Bəli, bütün bunlar sahibkarlıq fəaliyyəti ilə məşğul olan və çıxılmaz duruma salınan gədəbəyli sahibkarların üzləşdikləri olayların varlığıdır. Baxmayaraq ki, onlar belə bir duruma salınıblar, amma inanırıq ki, zamanı çatanda haqq qalib gələcək.

Problemlərin varlığını diqqətdə saxlayacağıq.

Cəfər

gundemxeber.az