Düzdür, qeyd olunan qurumda səlahiyyət sahibi olanlar tərəfindən Əliyev Oqtay Qara oğlu qəbul edilib dinlənilsə də, bu gün də bir nəticə yoxdur. Buna səbəb, Ramiz Yediyarovun PA səlahiyyətlilərinin vermiş olduğu tapşırıqlara məhəl qoymamasıdır

Son aylar mətbuatın gündəmini zəbt edən mövzulardan biri də, əslən Gədəbəydən olan sahibkar Əliyev Oqtay Qara oğlunun başına gətirilən olayların varlığıdır. Yaşanan problem haqda məlumatlı olanlar yəqin bilirlər ki, icra başçısı Ramiz Yediyarovun vermiş olduğu qanunsuz tapşırıq əsasında, 12 fevral 2015-ci il tarixdə ona məxsus 38.5 kv.m-lik mağaza yerlə-yeksan edilir. Həyata keçirilən söküntü işlərini başa çatdıran və bu gün də Gədəbəy şəhər icra nümayəndəliyinə rəhbərlik edən Şahbaz Bayramov, fürsət düşdüyündən sahibkara məxsus ərzaq mallarını, mağazanın içərisində olan dəmir seyfi itbata salır. Həmin vaxtdan Oqtay Əliyev nə sökülmüş mağazası ilə bağlı ala biləcəyi kompensasiyasını, nə də ki, itbata salınmış dəmir seyfini əldə edə bilir. Baxmayaraq ki, həmin mağaza 08 iyul 2008-ci ildə Daşınmaz Əmlakın Dövlət Reystri Xidməti tərəfindən Oqtay Əliyevin xüsusi mülkiyyətinə verilir və bu haqda ona məxsus MH/0001695 saylı Çıxarış da var.

Ayrı-ayrı mətbu orqanlara, o cümlədən “Gündəm Xəbər” qəzetinə etdiyi müraciətində o, bildirir ki, “mənə məxsus obyekt darmadağın edilərkən xəbərim olmayıb və söküntünün aparılması haqda bir kimsə də məlumat verməyib. Nəticədə xüsusi mülkiyyətimdə olan mağaza,

ayrı-ayrı firmalardan nisyə aldığım ərzaq malları, mağazamın içərisində olan avadanlıqlarım və.s, ələ gələsi olmadı. Və belə bir vandalizm addımın qarşılığında, dəymiş ziyanın kompensasiyası belə ödənilmədi. Hər kəsin mülkiyyət hüququnun qanunla qorunmasına baxmayaraq, bu gün Ramiz Yediyarovun rəhbərlik etdiyi Gədəbəydə təkcə Əliyev Oqtay Qara oğlu deyil, neçə-neçə sahibkarlar gözümçıxdıya salınıblar” deyir.

Ümumiyyətlə, torpaqların dövlət ehtiyacları üçün alınması Azərbaycan Respublikası MM-nin 246-cı və 249-cu maddələrinin tələblərinə uyğun həyata keçirilməsinə baxmayaraq, Ramiz Yediyarov qanunun belə bir tələbinə məhəl qoymur və sahibkarlıq fəaliyyəti ilə məşğul olan bir neçə sahibkarlara, o cümlədən Əliyev Oqtay Qara oğluna, Rasim Həziyevə, Əliyev Oqtay İbrahim oğluna, Müzəffər Həsənova, Mahmudov Natiq Nuru oğluna, Vaqif Səfərova və digərlərinə qarşı elə bir addımlar atır ki, bu gün də onlar PA-na gedib gəlməkdədirlər.

Əldə etdiyimiz digər məlumatlarda o da bildirilir ki, həmin sahibkarlar üzləşdikləri problemlərin həlli üçün, Gədəbəydə müraciət etmədikləri vəzifə sahibləri qalmayıb. Amma, nə fayda! Çünki, Ramiz Yediyarovun tətbiq etdiyi idarəçilik problemləri həll etmir, yeni-yeni problemlərin əmələ gəlməsinə yollar açır. Diqqəti cəlb edən hallardan biri də o olur ki, ötən müddət ərzində Oqtay Əliyevin etdiyi müraciətlər əsasında, ona yağlı vədlər verilsə də, problem həllini tapmır ki, tapmır. Nəticədə o, daha yuxarı instansiyalara, o cümlədən PA da müraciət etmək məcburiyyətində qalır.



Düzdür, qeyd olunan qurumda səlahiyyət sahibi olanlar tərəfindən Oqtay Əliyev qəbul edilib diqqətlə dinlənilsə də, bu gün də ortada bir nəticə yoxdur. Çünki, Ramiz Yediyarov açıq-aydın PA səlahiyyətlilərinin vermiş olduğu tapşırıqlara məhəl qoymur. Bu zaman hər kəsdə, o cümlədən bizlərdə də belə bir sual yarana bilər ki, görəsən ona “daydayılıq edən” hansı vəzifə sahibidir ki, o, bir kimsəni saya salmır? Məsələn, bu ilin 14 sentyabr günü Oqtay Əliyev Prezident Administrasiyası rəhbərinin müavini, regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyevlə görüşmək istəsə də, o, buna nail ola bilmir. Nəticədə onun müavini Tağı Tağıyevlə görüşür və Gədəbəydə üzləşdiyi problemlərin mahiyyətini ona çatdırır. Düzdür, PA-nın rəsmisi Oqtay Əliyevi diqqətlə dinləyib deməsi ki, “get Gədəbəyə, biz rayon rəhbərliyinə lazımi tapşırıqlarımızı verəcəyik ki, probleminin həllinə köməklik etsin”. Amma, həmin gündən təqribən bir aya yaxın vaxt keçməsinə baxmayaraq, onu nə icra başçısı qəbul edir, nə də ki, hansısa vəzifə sahibi Oqtay Əliyevə probleminin həlli üçün köməklik göstərir. Belə olan halda o, bir neçə sahibkarla birlikdə, 08 oktyabr günü Fəxri Xiyabanda ulu öndər Heydər Əliyevin məzarını ziyarət etmək istəsələr də, ilk öncə buna razılıq verilmir və PA-na getmələri məsləhət görülür. Elə ki, həmin qurumdan razılıq verilir, Oqtay Əliyev digər sahibkarlarla birlikdə ulu öndərin məzarını ziyarət etdikdən sonra, PA-nın qəbul şöbəsində olurlar. Qeyd olunan qurumdan onlara bildirilir ki, “gedin, 12 oktyabrda saat 14-də təkrar gələrsiniz. Sizi Prezident Administrasiyası rəhbərinin müavini, regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev qəbul edəcək. Həmin gün şikayətçi sahibkarlar Zeynal Nağdəliyevlə görüşmək istəsələr də, qəbul otağında onun müavini Tağı Tağıyev olur. Və hər bir şikayətçini təkbətək qəbul etdikdən sonra, o, Oqtay Əliyevə bildirir ki, “biz rayon rəhbərliyinə tapşırmışıq, o, sizin probleminizi həll etməlidir” deyir. Bütün bunlara baxmayaraq o, qəbuldan çıxdıqdan sonra Gədəbəy rayonu üzrə də olan zona kordinatoru Əlibala müəllimlə əlaqə saxlayıb, ona da ümumi vəziyyət haqda məlumat verir. Oqtay Əliyevin suallarını cavablandıran Əlibala müəllim bildirir ki, “darıxmayın, mütləq sizə zəng olunacaq və bir cavab da veriləcək” desə də, bu günəcən cavab almadığını bildirən şikayətçi sahibkar onu da vurğulayır ki, “əgər mənə bir cavab verilməsə, ölkə rəhbəri ilə görüşməyə çalışacağam. Bu addımım da baş tutmasa məcburam ki, mətbuat konfransı keçirib geniş ictimaiyyəti bu yöndə məlumatlandıram ki, Gədəbəydə haqsızlığın, qanunsuzluğun həddi-hüdudu yoxdur”.

Bütün bunlardan sonra kim deyə bilər ki, Gədəbəydə haqq-ədalət var? Əslinə baxsan, yaşanan olayların kökündə Ramiz Yediyarovun tətbiq edib həyata keçirdiyi idarəçilik durur ki, bu da çoxsaylı sahibkarları gözümçıxdıya salmaqdadır.

Digər məqama da toxunaq ki, axı ölkə rəhbəri cənab İlham Əliyev keçirilən görüşlərdə, müxtəlif tədbirlərdə daim vurğulayır ki, “mən kimi hara rəhbər təyin edirəmsə ilk öncə

tapşırıqlarımı verirəm ki, gedin əhali ilə işləməyi bacarın, onların qayğılarına qalın, problemlərinin həllinə dəstək verin” deyir. Bu belə olduğu halda, görəsən Gədəbəy rayon rəhbərliyinin atdığı addımlara hansı qiyməti vermək mümkün olar? Odur ki, bu haqda düşünmək, bir qədər də götür-qoy etmək gərəkdir ki, əksər mətləblərdən xəbər tutmaq mümkün olsun.

Problemlərin varlığını diqqətdə saxlayacağıq.

gundemxeber.az