Sahib Mirzəyev “plyonka ovu”nda

KİV-dən də məlum olduğu kimi, Sumqayıt Şəhər Polis İdarəsinin rəisi general-mayor Sahib Mirzəyevin öz vəzifəsinə təyin olunduğu ilk gündən etibarən vətəndaşların qanunlara riayət etməsi baxımından ciddi yeniliklərə imza atıb. Bugünlərdə bilgili qaynaqdan redaksiyamıza verilən məlumatda S.Mirzəyevlə bağlı yeni məqamlar yer alıb.

General reyd başında

Mənbənin sözlərinə görə, ölkə başçısının plyonkalarla bağlı məlum çıxışından sonra respublikanın bütün şəhərlərində olduğu kimi Sumqayıtda da silsilə reydlərə start verilib. İşin ən maraqlı tərəfi isə S.Mirzəyevin şəxsən özünün bu cür reydlərdə iştirak etməsi ilə bağlıdır: “Ölkə başçısının plyonkalı avtomobillərlə bağlı xəbərdarlığından sonra DYP əməkdaşları ardıcıl reydlərə başlayıb ki, bu reydlər respublikanın üçüncü ən böyük şəhəri olan Sumqayıtda fasiləsiz surətdə həyata keçirilməkdədir. Sumqayıtda keçirilən “plyonka ovu”nun ən mühüm özünəməxsusluqlarından biri şəhər polis idarəsinin rəisi general S.Mirzəyevin şəxsən bu reydlərdə iştirakı ilə bağlıdır. Keçirilən reydlərin səviyyəsi ilə tanış olmaq üçün Sumqayıtın DYP əməkdaşları tərəfindən keçirilən reydlərə qatılan general, avtomobilində pərdə və ya plyonkadan istifadə edən şəxslərin cəzalandırılması, müvafiq protokolların yazılmasına da şahidlik edib. Bugünün özündə də S.Mirzəyevin günün müxtəlif saatlarında reydlərə qatılaraq qayda pozuntularına qarşı aparılan mübarizəni şəxsən nəzarətdə saxlayır”.

Polis generalı həmkarlarına da güzəştə getməyib

Məlumatlı mənbənin bildirdiyinə görə, yol polisinin keçirdiyi reydlərdə iştirak edən S.Mirzəyev reyd əsnasında qaydanı pozan yüksək çinli polis məmurlarını da cəzalandırıb: “S.Mirzəyevin iştirak etdiyi reydlər zamanı xeyli sayda maraqlı olaylar baş verib. Bunlardan biri qayda pozuntusu ilə diqqət çəkən bəzi yüksək vəzifəli polis əməkdaşlarının S.Mirəzyevin zavalına gəlməsi ilə bağlıdır. Reydlər əsnasında avtomobili içkili vəziyyətdə idarə edən, habelə avtomobilində plyonkalardan istifadə edən polis əməkdaşları təsbit edilərək cəzalandırılıb. S.Mirzəyev qanun pozuntusuna yol verən polis əməkdaşlarına heç bir güzəşt etməyib və bu səbəbdən də qayda pozan polis yetkliləri qanunun bütün sərtliyi ilə cəzalandırılıb”.
Mənbənin bildirdiyinə görə, S.Mirzəyevin öz həmkarlarına belə güzəştə getməməsi Sumqayıt polisində nizam və dispilinin artmasına səbəb olub: “S.Mirzəyevin reydlərdə ortaya qoyduğu iradə göstərdi ki, polis generalı heç kimə - hətta öz həmkarlarına belə güzəştə getməməkdə israrlıdır və buna görə də hər hansı bir şəxs öz vəzifə və rütbəsindən istifadə edərək qanunlara etinasız münasibət bəsləyərsə dərhal cəzalandırılacaqdır. Ümumiyyətlə, bu gün S.Mirzəyevin formalaşdırdığı ab-hava Sumqayıt polisində nizam-intizamın daha da artmasına, polis əməkdaşlarının qanun pozuntularına qarşı daha həssas münasibət bəsləməsinə səbəb olub”.

Icra yetkililəri xof içində

Bilgili qaynağın məlumatına görə, S.Mirzəyevin şəhər həyatına gətirdiyi yeniliklər xırda və orta məmurlarıla yanaşı, Sumqayıt Şəhər İcra Hakimiyyətinin yetkililəri tərəfindən də narahatlıqla izlənməkdədir: “İcra yetkliləri bugünə qədər özlərini Sumqayıtın şəriksiz ağası hesab etdikləri üçün istədikləri kimi davranır, qanunlara hörmət etmir, öz davranışlarında qanunları deyil, şəxsi istək və arzularını əsas götürürdülər. Lakin S.Mirzəyevin gəlişi və ortaya qoyduğu iradə icra başçılarının ərköyünlüyünə də son qoyub. Əvvəlki dövrlərdən fərqli olaraq S.Mirzəyevlə üz-üzə gəlməmək üçün kifayət qədər ehtiyatlı davranan icra yetkililəri, polis generalı ilə toqquşmamaq üçün qanunlara mümkün qədər əməl etməyə çalışırlar. Icra yetkililəri hesab edir ki, S.Mirzəyevin onların törətdiyi qanun pozuntusuna hər hansı formada müdaxiləsi onların nüfuzuna mənfi təsir göstərər ictimaiyyət arasında hörmətdən sala bilər. Məhz bu səbəbdən də icra yetkililərinin heç biri indiki etabda qanun pozuntusu ilə gündəmə gəlməməyə çalışır. İcra yetkililəri hesab edir ki, “mövcud narahatlıq” keçicidir və yaxın gələcəkdə icra məmurlarının şəhərdəki ağalığı bərpa olunacaq”.

Polis generalı daha kimləri “sındıracaq”?

S.Mirzəyevin harınlamış məmurlara qarşı mübarizədə israrlı olduğunu bildirən mənbə, yaxın günlərdə xalqa yuxarıdan aşağı baxan daha bir neçə məmurun “sındırılacağını” bildirdi: “S.Mirzəyevdən öncə bir çox məmur qanunlarla hesablaşmır, hər şeyə mənəm-mənəmlik prinsipi ilə yanaşırdı. Lakin bu gün onların hamısı ortalıqda çox görünməməyə çalışır. S.Mirzəyevin bugünə qədərki fəaliyyəti onlara göstərdi ki, yeni polis rəisi qanundan başqa ağa tanımır və bu səbəbdən də qanuna ağa olmaq istəyən hər kəsi qanun çərçivəsində cəzalandırmaqda israrlıdır. Buna görə də şəhərin məmur elitasının demək olar ki, tamamı kölgəyə çəkilərək hadisələrin sonunu gösləməkdədir. Məlum sona kimi isə hələ çox məmurun öz harınlığının qurbanına çevriləcəyi şübhəsizdir”.
İlqar Rəsulov