Sahib Mirzəyev heç kimi bağışlamaq fikrində deyil

Sumqayıt Şəhər Polis İdarəsinin rəisi, polis general-mayoru Sahib Mirzəyev son günlər şəhər daxilində ictimaiyyət tərəfindən məmnunluqla qarşılanan sistemli fəaliyyətə start verib. Küçə və yollarda ictimai nəqliyyatın işini yaxşılaşdırmaq, ayrı-ayrı iş adamları və məmurlar tərəfindən qanunsuz olaraq zəbt edilən səki və meydanları boşaltmaq yönündə fəaliyyətə başlayan general, artıq bu sahədə müəyyən uğurlara imza atıb. Bununla bağlı redaksiyamızı məlumatlandıran özəl mənbənin sözlərinə görə, S.Mirzəyevin zavalına gələn ilk iş adamlarından biri də sabiq millət vəklili, “Sumqayıt” və “Cavid” Ticarət Mərkəzlərinin sahibi Nizami İsgəndərovdur.

Generaldan iş adamına ilk zərbə

Mənbənin bildirdiyinə görə, S.Mirzəyevin N.İsgəndərovla ilk toqquşması “Cavid” Ticarət Mərkəzinin sağ tərəfində, “Göyərçin” abidəsindən avtovağzala doğru uzanan magistral yolun sağındakı ərazi üzərində baş tutub: “Bu ərazi “Cavid” Ticarət Mərkəzinin əsas girişlərindən biri olduğu üçün N.İsgəndərov və onun yaxın qohumları öz avtomobillərini yolun məhz bu hissəsinə - ticarət mərkəzinin yaxınlığındakı yol kənarına park edirdi. Həmin əraziyə başqa avtomobillərin daxil olmaması və iş adamının istənilən vaxt öz avtomobili ilə məlum məkana rahat bir şəkildə giriş-çıxışını təmin etmək üçün digər maşınların yol kənarında park edilməsi yasaqlanmışdı. “Kənar avtomobillər”in girişini yasaqlamaq üçün yolun hərəkət hissəsinə doğru qırımızı rəngdə xüsusi dəmir lövhələr qoyulmuşdu ki, bu da məlum ərazidə avtomobil saxlamağın yasaq olduğu anlamına gəlirdi. Təxminən 3 gün bundan öncə dövlət yolunun qanunsuz olaraq yasaqlanması general S.Mirzəyevin diqqətini cəlb edib. Bundan sonra S.Mirzəyev dərhal həmin dəmir lövhələrin götürülməsi və dayanacaq kimi istifadə edilən yol kənarının bütün avtomobillərin park edilməsi üçün açıq elan edilməsinə göstəriş verib. Əmr dərhal yerinə yetirilib və ərazi bütün avtomobillərin istifadəsinə verilib”.

Nizami İsgəndərov üçün yeni rəqib?

Bilgili qaynağın sözlərinə görə, proseslər sadəcə sabiq millət vəkili ilə məhdudlaşsaydı, o zaman təbii ki, bunu N.İsgəndərov üçün yeni bir rəqibin meydana gəlməsi kimi xarakterizə etmək olardı. Lakin S.Mirzəyev yalnız N.İsgəndərova deyil, qayda və qanunlara riayyət etməyən bütün iş adamları və məmurlara qarşı barışmaz münasibət ortaya qoyub ki, bu da əksər iş adamlarının hədəfdə olduğunu göstərir: “Sumqayıt Şəhər Polis İdarəsinin rəisi vəzifəsinə təyin ediləndən sonra ilk növbədə Bakı-Sumqayıt yolu kənarındakı pritonların ləğvinə nail olan S.Mirzəyev bununla da kifayət qədər prinsipial biri olduğunu ortaya qoydu. Bunun ardınca şəhər daxilində baş verən proseslərlə bağlı müəyyən informasiya araşdırması aparan S.Mirzəyev, daha ciddi addımlar üçün zəmin hazırlamağa başladı. N.İsgəndərovla bağlı baş verənlər isə göstərir ki, artır polis generalı qəti olaraq hərəkətə keçib. Deyilənlərə görə, S.Mirzəyev kimliyindən asılı olmayaraq qanunu pozan, dövlətə və vətəndaşlara etinasızlıq sərgiləyən hər kəsin qanunlar çərçivəsində cəzalandırılacağını bildirib. Habelə, polis generalı qeyd edib ki, heç kim özünü toxunulmaz və əlahiddə şəxs hesab etməsin. Qanun hamı üçündür və qanunu tapdayan hər kəs onun nəticəsi ilə qarşılaşmalı olacaq”.

Eldar Əzizovun başı dərddə

Mənbənin məlumatına görə, S.Mirzəyevin aktivliyindən ciddi mənada zərər çəkəcək şəxslərdən biri də Sumqayıt Şəhər İcra Hakimiyyətinin başçısı Eldar Əzizov hesab edilir. Buna səbəb icra başçısının vətəndaşlarla “burda mənəm Bağdadda kor xəlifə” prinsipi ilə davranmasıdır. Bu baxımdan yaxın günlərdə polis generalı ilə icra başçısının ciddi mənada qarşı-qarşıya gələcəyi qaçınılmaz hesab olunur: “S.Mirzəyevin hədəfinə gələcək şəxslərdən birinin də şəhərin birinci şəxsi – icra başçısı Eldar Əzizov olduğu gözlənilir. Ən azından ona görə ki, E.Əzizovun Sumqayıt şəhəri öz dədə mülki kimi rəftar etməsi ilə bağlı onlarla fakt mövcuddur və KİV-də bu faktların geniş siyahısı ilə tanış olmaq mümkündür. Çox güman ki, E.Əzizovun məlum özbaşınalıqları S.Mirzəyevin də diqqətini cəlb edəcək və polis generalı öz prinsipiallığını E.Əzizovla münasibətdə də nümayiş etdirəcəkdir. Münasibətlərin gərginləşməsindən kimin daha çox zərərlə çıxacağına gəlincə, bu şəxsin icra başçısı olacağı şübhəsizdir. Belə ki, E.Əzizova müxalif olan çoxlu sayda iş adamı və sadə vətəndaş var ki, S.Mirzəyev məlum sosial bazadan istifadə edərək icra başçısı haqqında yüzlərlə mənfi rəy ala, ona qarşı vətəndaş müraciətinə əsaslanaraq istənilən tədbiri ala bilər. Bundan başqa, prezident İlham Əliyevin regionların sosial-iqtisadi inkişafının dördüncü ildönümü münasibəti ilə keçirilən konfransdakı çıxışı da indiki məqamda polis generalının xeyrinə işləyən amildir. Prezidentin kəskin tənqid üzərində qurulan çıxışında icra başçılarını təhdid etməsi və hüquq-mühafizə orqanlarını qanunsuzluqlara qarşı daha ciddi fəaliyyətə səsləməsi yalnız Sumqayıtda deyil, respublikanın hər yerində hüquq-mühafizə orqanlarının başında dayanan şəxsləri aparıcı qüvvəyə çevirib. Bu baxımdan ictimaiyyətdə özü ilə bağlı mənfi rəy formalaşdıran E.Əzizovun da S.Mirzəyevə qarşı gələcəyi təqdirdə ciddi şəkildə cəzalandırılması mümkündür”.
İlqar Rəsulov