2001-ci ilin 11 sentyabrı Amerika üçün cəhənnəm oldu. Çox sayda qurban verən ABŞ üçün bu gün həm də ona görə ləntələnmişdi ki, qüdrətli dövlət haqqındakı illuziyalar tamamilə darmadağın olmuşdu. Son zamanlar həmin gün baş verənlərlə bağlı rəsmi versiyaya şübhə ilə yanaşanların sayı getdikcə artır. Cebhe.info xəbər verir ki, əvvəllər gizlədilən bir çox faktın əlçatan olması bu müzakirələri daha da genişləndirir. İlk öncə Amerika rəsmi qurumlarını hadisə ilə bağlı versiyasını yada salaq. Bu versiyaya görə 19 ərəb terrorçusu 4 hava laynerini qaçıraraq onlardan ikisini əkiz qüllələrə, birini isə Pentaqona yönəldib. 4-cü təyyarə isə Pensilvaniyada adamsız yerə düşüb. Hadisənin ilkin təsiri altında bütün dünya ictimaiyyəti bu versiyanın həqiqiliyinə inandı. Həmin zaman üçün kiminsə daha fərqli və inadırıcı versiyası yox idi. Ancaq məüyyən zaman keçdi, ilkin təəssürat dağıldı və yavaş-yavaş diqqətdən yayınan məqamların üzərindən sirr pərdəsi götürülməyə başladı. İlk şübhə terrorçuların təyyarəyə daxil olması və sərnişinlərin heç bir etirazı ilə qarşılaşmayaraq laynerin kabinin giriş imkanı əldə etməsidir. Təyyarəni qaçıranlardan biri olduğu bildirilən Məhəmməd Atta və başqalarının təyyarəni idarə etmə bacarığının hansı səviyyədə olması şübhələri artıran amil idi. Bu insanlar hansısa təlim keçə bilərdilər, ancaq onların təlimi “Boinq”i təkbaşına idarə etmək üçün heç də kifayət deyildi. Əkiz qüllələrin dağıdılması ilə bağlı da şübhələr az deyil. Rəsmi versiyaya görə, yanğın nəticəsində qüllələr dağılıb. Ancaq məlumdur ki, poladın əriməsi üçün olduqca yüksək temperatur lazımdr. Söhbət 1538 dərəcədən gedir. Aviasiya yanacağı buna sadəcə qadir deyil. Poladı əridəcək temperaturun əldə edilməsi üçün atəş uzun müddətli olmalı idi. Ancaq şahidlər atəşin heç də uzun müddət davam etmədiyini, hadisənin qısa zamanda baş verdiyini bildirirlər, cəmi 10 dəqiqə. Bundan başqa Əkiz qüllələr “Boinq 707” ilə toqquşmaya davamlı hazırlanmşdı. Əgər qüllələrdən heç olmasa biri dağılsaydı, bu versiyaya inanmaq mümkün idi. Ancaq indiki halda əzəmətli iki qüllə də dağılıb, üstəlik də təyyarə ilə toqquşmadan və çıxan yanğından... Mütəxəssislərin sözlərinə görə belə partlayış ancaq əvvəlcədən görülən hazırlıq nəticəsində mümkündür. Başqa sözlə, mərtəbələr arasına yerləşdirilən partlayıcılar terrorçulara bir az “yardım edib”. Əvvəllər bu versiya ilə bağlı fikirlər haçalanırdı, çünki hadisə şahidlərindən heç biri partlayış səsi eşitdiyini demirdi. Son illər isə vəziyyət dəyişib, hətta toqquşmadan əvvəl binanın içində partlayış baş verdiyini təxmin etməyə imkan verən videogörüntülər də meydana çıxıb. Dünya Ticarət Mərkəzinin yaxınlığında ofisi olan bir şahid isə binanın 10-15-ci mərtəbələri arasında qığılcımları gördüyünü bildirib. Güclü partlayışların olduğu Ticarət Mərkəzindən 34 kilometr məsafədə yerləşən seysmoqraflar vasitəsilə də qeydə alınıb. Binanın dağıntıları arasında da uzunmüddətli araşdırma aparmaq mümkün olmayıb. Binadan geriyə qalan 300 min ton polad dərhal metalaloma verilib və daha sonra Çinə və Cənibi Koreyaya göndərilib. Beləliklə də bütün dəlillər məhv edilib. Diqqəti çəkən bir məqam da dağıdılan ticarət mərkəzinin yerində təmizləmə işlərini aparılması üçün işin «Controlled Demolition Inc.» şirkətinə verilməsi olub. Bu şirkət nəzarət edilən dağıntılar üzrə ixtisaslaşıb. Bu sahədə dünya lideri hesab olunur. Məhz bu şirkət hadisə yerindən bütün izlərin silinməsi ilə məşğul olub. Bütün bunlar nəzərə alınaraq Əkiz qüllələrin təkcə təyyarə çırpılması nəticəsində dağılması versiyası şübhə doğurur. Rəsmi versiyada şübhəli görünən başqa bir məqam isə Pentaqonda yanğındır. Rəsmi versiyaya görə, “American Airlines”ə məxsus “Boinq 757” Pentaqonun binasına çırpılıb. Nəticədə binanın bir sektorunda yanğın olub, ancaq qəribədir ki, yanğın təmir aparılan sektorda qeydə alınıb. Həmin sektorda əvvəlcə terrorizmlə mübarizə idarəsi yerləşirmiş. Ancaq hadisədən əvvəl həmin idarə sektoru tərk edib, onun yerinə köçməli olan dəniz flotu isə hələ yerləşməyib. Binada ancaq mülki personal olub və hadisənin qurbanları da məhz onlardır. Həlak olanlar arasında ancaq bir general var. Laynerin Pentaqon binasına çırpılması özü də sirlidir. Belə ki, təyyarə Pentaqona horizontal traektoriya üzrə yaxınlaşıb. Ancaq necə olubsa işıq dirəklərinin arasında bacarıqla keçə bilib, hansı ki, aralarındakı məsafə “Boinq 575”in qanadlarının ölçüsündən də azdır. Bu manevri hansısa ərəb terrorçusunun yerinə yetirməsi də şübhəli görünür. Əlbəttə, heç kəs onun bacarığını şübhə altına almır, amma 2 aylıq yay kursunu bitirən Hani Hancur adlı terrorçunun bunu bacardığına inanmaq çox çətindir. Bundan başqa hadisə yerindən çəkilən fotolarda təqribən 100 tona yaxın metallın görüntüsü sanki yoxa çıxıb. Bəs hardadır binaya çırpılan “Boinq”dən geriyə qalan metal? Üstəlik təyyarənin bortunda 56-64 nəfərin olduğu bildirilir. Əgər bu təyyarə içindəki sərnişinlərlə binaya çırpılıbsa, bəs o zaman sərnişinlərin cəsədi və yükü hardadır? Axı bütün qəzalarda cəsədlər olur, hətta tanınmaz hala düşmüş şəkildə olsa belə ortada cəsədlər olmalıdır. Bu halıda isə sərnişinlərin cəsədlərinin ortada olmaması belə bir sual doğurur. Bəlkə bu sərnişinlər təyyarə Pentaqona çırpılmazdan daha əvvəl başqa yerdə ölüblər? Həqiqətdə nə baş verib? Bu sualı “911 əməliyyatı: kamikadze-pilot olmayıb” məqaləsinin müəllifi Kerol Valentin cavablandırmağa çalışıb. Bu məqalədə müəllif təyyarlərin uzaqdan idarə edilməsinin mümkünlüyü versiyasını irəli sürür. Əlbəttə, bu versiyanın da çatışmayan tərəfləri var. Doğrudur, məsafədən idarəetmə texnologiyası mümkündür, ancaq bunu 4 təyyarə ilə eyni zamanda 2 saat müddətində həyata keçirmək üçün çox sayda ixtisaslı kadra ehtiyac var. O əməkdaşlara ki, minimum səhv və informasiya qapalılığında onlara tam etibar etmək mümkün olsun. Bu əməliyyata verilən önəm və sərf edilən vəsait hər hansı səhv ehtimalını sıfıra endirirdi. Əməliyyat barədə nə qədər az adam bilərdisə, onun uğuru bir o qədər çox təmin edilmiş olardı. Bununla yanaşı bu versiyanın həqiqliyinə inansaq belə bir sual açıq qalır: sərnişinlər hara yox olub? Bu suala nə rəsmi versiyalarda cavab verilib, nə də bu versiyanı inkar edənlər sualın cavabını tapıb. Dəlilləri ümumiləşdirəndə isə belə qənaət yaranır: 11 sentyabrla bağlı rəsmi versiya ABŞ hakimiyyəti tərəfindən düşünülüb. Bununla yanaşı indiyə qədər heç kəs onu bütünlüklə inkar edə bilməyib. Rəsmi versiyanın yoxlanılması üçün xüsusi komissiya yaradılıb. Ancaq bu komissiya da 11 sentyabr barədə yeni söz deməyib. İndiyə qədər də aydın deyil, bu terraktı kim hazırlamışdı: Bin Ladenə qarşı gələcək əməliyyatda özünü sığortalamaq istəyən ABŞ, yoxsa ərəb terrorçuları?