Məhəmməd Məmmədovun hoteli, moteli, restoranı və daha nələri, nələri var?

Məmməd Məmmədovla bağlı mövzu, hələ bir müddət bundan əvvəl də, ölkə mediasının diqqət mərkəzində idi. Bu diqqət onun bir tərəfdən tutduğu yüksək posta sahib olması ilə bağlı idisə, digər səbəb isə, özünün şəxsi keyfiyyətləri ilə bağlıdır. Belə ki, istər idarəçilikdə yol verdiyi ciddi nöqsanlar, istərsə də medianın hər zaman daha çox önəm verdiyi vərdiş və xobbiləri, onun daim diqqət mərkəzinə gətirilməsinə səbəb olan amillər olub. Söhbə, “Aztelekom” İstehsalat Birliyinin baş direktoru Məhəmməd Məmmədovdan gedir. “Gundəm Xəbər” qəzetində Məhəmməd Məmmədovun “portretini cızmağa” çalışacaq. Beləliklə…
Qısa tanışlıq..
Məhəmməd Əsgər oğlu Məmmədov 1957-ci ildə may ayının 9-da Naxçıvan Muxtar Respublikasının Naxçıvan şəhərinin Bulqan kəndində anadan olub. 1979-cu ildə Ç. İldırım adına Azərbaycan Politexnik İnstitutunun Elektrotexnika fakultəsini “Avtomatik elektrik rabitəsi” ixtisası üzrə bitirib.
Həmin ildən rabitə sahəsində çalışan M.Ə. Məmmədov elekrtik mexaniki vəzifəsindən başlayaraq, mühəndis, böyük mühəndis, stansiya xidmətinin rəisi, telefon qovşağının baş mühəndisi, Layihə-Axtarış kontorunun rəisi, Bakı Telefon Rabitəsi İstehsalat Birliyinin Baş mühəndisi və rəisi vəzifələrində işləyib.
04 may 2004-cü il tarixdə isə, “Aztelekom” İB-nin baş direktoru vəzifəsinə təyin edilib.
O, yaxın adamlarını tez-tez İrana nə üçün göndərir?
Əldə etdiyimiz informasiyalarda o da iddia olunur ki, Məhəmməd Məmmədov bahalı antikvar əşyalar həvəskarıdır və həmin əşyaların alınması üçün, o, küllü miqdarda vəsait də xərcləyir. Məlumatlarda o da bildirilir ki, Məhəmməd Məmmədovun adamları ona Təbrizdən, İstanbuldan həvəskarı olduğu antik əşya və xalçalar daşımaqla məşğul olurlar.
Qeyd edək ki, ölkənin ən böyük rabitə müəssisəsi olan «Aztelekom» İstehsalat Birliyi, dövriyyəsinə görə də nəhəng şirkətlər arasındadır. Elə buna görə də, bu müəssisəyə xarici investorların marağı həddindən artıq çoxdur. Hətta, Rabitə və Yüksək Texnologiyalar Nazirliyi də dəfələrlə bəyan edib ki, müraciət edən xarici şirkətlərin sayı hər il artır. Di gəl, bütün bunlara rəğmən, özəlləşdirmə üçün hazır olmadığı bildirilən müəssisənin rəhbərliyi, daha çox pul qazanmaqla məşğuldurlar. Yəni, onlara müəssisənin özəlləşdirilməsi deyil, elə bu şəkildə qalması da sərf edir.
Pullar necə “silinir”?
Məlumatlara görə, “Aztelekom”un direktoru Məhəmməd Məmmədov, rəhbərlik etdiyi quruma daha çox özünün şəxsi obyekti kimi yanaşır. Elə buna görədir ki, müxtəlif vasitələrdən yararlanaraq, hətta investisiya məqsədi ilə ayrılmış pulları da rahatlıqla ələ keçirməyi bacarır. Belə ki, hər il Məhəmməd Məmmədovun rəhbərlik etdiyi müəssisəyə, ən azından 25-30 milyon manat investisiya yatırılır. Yatırılan pulların müxtəlif layihələrə sərf olunduğu qeyd olunsa da, real rəqəmlərlə mövcud işlər arasında tərs mütənasibliyin olduğu bildirilir. Məsələn, rabitə sahəsində görülən və görüləcək işlərin smetası hazırlanan zaman, rəqəmlər ən azından 3 dəfə şişirdilir. Hələ bu yaxınlarda ümumi həcmi ekspertlər tərəfindən 5 milyon manat dəyərində qiymətləndirilən layihəyə 20 milyon manatın ayrılması, qeyd olunan əməliyyatın nümunələrindən biridir.
Türkiyədə də mülkləri var…
Verilən məlumatlarda o da bildirilir ki, Məhəmməd Məmmədov, davamlı olaraq Türkiyəyə gedir və orada istirahətini də edir. Amma, bütün səfərlərin işgüzar səfərlər olması adı altında, həyata keçirilən səfərlər tamam başqa mətləblərdən xəbər verir.
İddialara görə, «Aztelekom»un direktorunun Türkiyəyə səfərinin arxasında, həqiqətən də işgüzar maraqlar dayanır. Bu işgüzarlığın isə, qətiyyən rəhbəri olduğu müəssisə ilə heç bir bağlılığı yoxdur. Çünki, M.Məmmədovun İstanbul və Antaliyada təkcə evləri yox, həm də bir neçə, heç də kiçik olmayan dükanlarının varlığı barədə bilgilər də var. Məlumatlarda o da deyilir ki, müəssisənin direktoru ildə bir neçə dəfə bu şəhərlərə yola düşür və oradakı dükanlarının icarəhaqlarını toplayaraq geri qayıdır. Diqqəti cəlb edən məqamlardan biri də odur ki, Məhəmməd Məmmədov rəhbəri olduğu qurumdan əldə etdiyi pulları, heç də boşuna sərf etməyi xoşlamır. Ona görə də, Türkiyədə sərmayədarlıq etdiyi kimi, Azərbaycanda da bəzi obyektlərini açıb.
Verilən məlumatlarda o da vurğulanır ki, M.Məmmədovun Qubada restoranı və moteli mövcuddur. “Avand” İstirahət Mərkəzi isə, paralel olaraq həm restoran, həm də motel kimi fəaliyyət göstərir. Onu da bildirək ki, “Aztelekom” rəhbərinin Türkiyyə Cümhuriyyətinin Antalya şəhərində hoteli, Ukraynanın Truskavets vilayətində isə möhtəşəm istrahət mərkəzi də var. Maraq doğuran məqamlardan biri də odur ki, hörmətli Məhəmməd müəllim bu qədər milyonlarla dolları öz ölkəmizə yox, xarici ölkələrə sərmayə qoymağa üstünlük verir. Araşdırmalarımız zamanı o da bəlli oldu ki, Rabitə və Yüksək Texnologiyalar naziri Əli Abbasovun da, bu işlərdən az-çox xəbəri var. Ona görə də, şəhər və rayon idarələrinin rəislərindən birinin Məhəmməd Məmmədovun yerinə gətirilməsi, nazirliyin diqqət mərkəzindədir. Beləliklə növbəti yazımızda “Aztelekom” İstehsalat Birliyində baş verən və indiyədək ictimaiyyətə bəlli olmayan şok maxinasiyalardan bəhs etməyə çalışacağıq.

Mətləb